މިފްކޯ ހަމަައަކަށް އަޅުވަން ސަރުކާރުން 46 މިލިއަން ރުފިޔާގެ ލޯނެއް ދީފި

މާލީ ބޮޑެތި މައްސަލަތަކެއް ކުރިމަތިވެގެން ހިންގަން ދަތިވެފައިވާ މިފްކޯ ހަމައަކަށް އަޅުވަން ސަރުކާރުން 46.3 މިލިއަން ރުފިޔާގެ ލޯނެއް މިއަދު ދީފި އެވެ.

ފިނޭންސް މިނިސްޓްރީގައި ބޭއްވި ހާއްސަ ރަސްމިއްޔާތުގައި ލޯނު އެއްބަސްވުމުގައި ސޮއި ކުރެއްވީ މިނިސްޓަރު އަހުމަދު މުނައްވަރާއި މިފްކޯ ހިންގަމުން އަންނަ އެސްޓީއޯގެ މެނޭޖިން ޑިރެކްޓަރު އަހުމަދު ޝަހީރު އެވެ.

އެސްޓީއޯގެ ދަށަށް ބަދަލުކޮށްފައިވާ ސަރުކާރުގެ މަސްކުންފުންޏަށް ލޯނު ދޫކުރީ ފަސް އަހަރުން ދައްކާ ގޮތަށް، ހަތް ޕަސެންޓުގެ އިންޓްރެސްޓަކާ އެކުގަ އެވެ.

މިފްކޯ އިން ބުނީ ލޯނު ބޭނުން ކުރާނީ މަސްވެރިންނަށް ދިމާވެފައިވާ މައްސަލަތަކާއި މަސްވެރިކަމުގެ ސިނާއަތު ޒަމާނީ ފެންވަރަކަށް ތަރައްގީ ކުރަން ބޭނުންވާ ތަކެތި ގަތުމަށް ކަމަށެވެ. އަދި އެ ކުންފުނިން ބޭނުންކުރަމުންދާ އިންފްރާސްޓްރަކްޗާ މަރާމާތު ކުރުމުގެ މަސައްކަތަށް ވެސް ލޯނު ފައިސާ ބޭނުން ކުރާނެ ކަމަށް މިފްކޯ އިން ބުންޏެވެ.

އެ ކުންފުނިން ބުނިގޮތުގައި މަސްވެރިންގެ އަތުން މިހާރަށް ވުރެ ގިނައިން މަސް ގަނެ، ރައްކާކުރެވޭނެ އިންތިޒާމް ހަމަޖައްސަން ވެސް ވަނީ ނިންމައިފަ އެވެ. އަދި މިހާރަށް ވުރެ ހަރަދު ކުޑަކޮށް މިފްކޯގެ މަސައްކަތްތައް ކުރިއަށް ގެންދަން ބޭނުންވާ އިކުއިޕްމަންޓް ގަތުމަށް ވެސް އެ ފައިސާ އިން ހަރަދުކުރާނެ ކަމަށް މިފްކޯ އިން ބުންޏެވެ.

މިދިޔަ އަހަރުގެ ސެޕްޓެމްބަރު މަހުގެ ތެރޭގައި އެސްޓީއޯއާ ހަވާލުވިއިރު 300 މިލިއަން ރުފިޔާގެ ދަރަންޏެއް އޮތެވެ. ނަމަވެސް، މިފްކޯގެ މާލީ ހާލަތު މިހާރު ރަނގަޅުވަމުން އަންނަ ކަމަށް އެސްޓީއޯ އިން ވަނީ ބުނެފަ އެވެ.