މިހާރު އެނގިއްޖެ: ޝަލަބީ އަކީ އިމާމެއް، ގުރުއާން ޓީޗަރެއް، ސޭލްސް ބޯއީއެއް!

ޝަލަބީ އިބްރާހިމަކީ ރާއްޖޭގެ އެންމެ މަޝްހޫރު އެއް ނަމެވެ. އެންމެ ފުރަތަމަ ބޭއްވި މޯލްޑިވިއަން އައިޑަލް އިން ދެވަނަ ހާސިލްކޮށް، ގިނަ ބައެއްގެ ލޯބި ހޯދާފައިވާ ޒުވާން ލަވަކިއުންތެރިޔާ އާންމުންނަށް ފެނުމުގެ ކުރިން އުޅުނު ގޮތް ވެސް ޝައުގުވެރި އެވެ.

ޝަލަބީ ވަނީ، އާންމު ބަހުރުވައިން ނަމަ، ލައްކަ ގިނަ ކަންކަން ކޮށްފަ އެވެ. މިސްކިތުގެ އިމާމެކެވެ. އުފަން ރަށް، މުލަކު ސްކޫލު ކުދިންގެ ގުރުއާން މުދައްރިސެކެވެ. މަޝްހޫރު ވުމުގެ ދުވަސްކޮޅެއް ކުރިން އޭނާ ވަޒީފާ އަދާކުރީ، މަޖީދީމަގުގައި ހުންނަ އަގޯރާގައި ސޭލްސް ބޯއީއެއްގެ ގޮތުގަ އެވެ.

ހިތްހެޔޮ މި ޒުވާނާ ބުނި ގޮތުގައި އޭނާ ލަވަކިޔަން ފެށީ ވަރަށް ފަހުންނެވެ. އޭގެ ކުރިން އޭނާ މޮޅީ ރީތިކޮށް ގުރުއާން ކިޔަވާށެވެ. ގްރޭޑް ފަހަކާއި ހަޔެއް އަދި ސާނަވީ އަހަރުތަކުގައި އަރަބިއްޔާ ސްކޫލުގައި އުޅުނު އިރު، ޗުއްޓީއަށް ރަށަށް ދާއިރު އޭނާއަކީ މިސްކިތުގެ ވަގުތީ އިމާމެވެ. ގުރުއާން ކިޔަވާލެއް ރީތިކަމުން އެ ފުރުސަތު ލިބުނީ އެވެ.

ސްކޫލަށް ގުރުއާން ޓީޗަރެއްގެ ގޮތުގައި އޭނާ ދާން ފެށީ ވެސް އެ ދުވަސްވަރު އެވެ. ރަށުގައި ހުންނައިރު މަދަހަ މުބާރާތެއް ނުވަތަ ގުރުއާން މުބާރާތެއް އޮވެއްޖެ ނަމަ، ދަސްކޮށްދޭން ލާރި ދީފައި ވެސް އޭނާ ގެންދެ އެވެ. އެހެންވެ، އޭނާ ކައިރިން ގުރުއާން އުނގެނިފައި ތިބި ދަރިވަރުން މަދެއް ނުވާނެ އެވެ.

ސްކޫލު ނިންމުމަށް ފަހު، ދެ އަހަރު ވަންދެން ޝަލަބީ އެއްވެސް ވަޒީފާއެއް އަދައެއް ނުކުރެ އެވެ. އާއިލާ މީހުންގެ އެދުމުގެ މަތިން ދެން އޭނާ ދިޔައީ އަގޯރާއަށެވެ. އޭނާ މަސައްކަތް ކުރީ އެތަނުގެ ޗޮކުލެޓް ވިއްކާ ބައިގަ އެވެ.

"އަގޯރާއިން މަހަކު 8،000 ރުފިޔާ ލިބެޔޭ ބުނާތީ ދިޔައީ. އޭރު ހުންނާނީ ވެސް އަގޯރާ ކުދިން ލާ ކަހަލަ ރަތް ކުލައިގެ ޓީޝާޓު ލައިގެން. ދެން ވަރަށް މަޖާ ކަމެއް އެއީ،" ޝަލަބީ މަޖާވެފައި ކިޔައިދިނެވެ.

މޯލްޑިވިއަން އައިޑޮލްއަށް ފުރުސަތު ހުޅުވާލީ އެ ދުވަސްވަރު އެވެ. އެހެންވެ، އޭނާގެ ރަހުމަތްތެރިންގެ އެދުމުގެ މަތިން، ވަޒީފާ ދޫކޮށްލާފައި އެ ފުރުސަތުގެ ބޭނުން ހިފީ އެވެ.

ޝަލަބީގެ އިސްތަށިގަނޑާއި ހެދުން އެޅުން

ޝަލަބީގެ ޓްރޭޑްމާކް ލުކަކީ އޭނާގެ ދިގު އިސްތަށިގަނޑާއި ގަޔަށް ދޫ ބޮޑެތި ގަމީސްތަކެވެ. ސްކޫލު ނިންމާލުމަށް ފަހު ދޭތެރެ ދޭތެރެއިން އޭނާ އިސްތަށިގަނޑު ދިގުކުރެ އެވެ. އިސްތަށިގަނޑާއި ހެދުން އެޅުމުގެ ވައްޓަފާޅި އެންމެ ވައްތަރީ ކުރީގެ މަޝްހޫރު ލަވަކިޔުންތެރިޔާ އަލީ ރަމީޒާ އެވެ. އެކަމަކު މިއީ އެއްގޮތަކަށް ވެސް އަލީއާ ވައްތަރުވާން ކުރާ ކަމެއް ނޫން ކަމަށް އޭނާ ބުނެ އެވެ. އެހާ ދިގުކޮށްފައި އިސްތަށިގަނޑު ބަހައްޓަން ފެށީ، ޝަލަބީ ބުނިގޮތުގައި، އޭނާގެ ހަށިގަނޑުގައި ހުންނަ "އައިބެއް" ފޮރުވާށެވެ.

"ޝަލަބީގެ ކަރު ވަރަށް ދިގު ވާނެ. އެހެންވެ ހިތަށްއެރީ ކަރު ނުފެންނަ ވަރަށް އިސްތަށިގަނޑު ދިގު ކުރާނީއޭ. މިގޮތަށް އިސްތަށިގަނޑު ދެ ފަރާތަށް ވައްޓާލާފައި ހުންނައިރު [ރަނގަޅު]،" ޝަލަބީ ބުންޏެވެ.

އިސްތަށިގަނޑު ދިގުކުރާކަށް ނުވަތަ ރީތިކޮށް ބާއްވާކަށް އޭނާ ހާއްސަ އެއްޗެއް ބޭނުމެއް ނުކުރެ އެވެ. ދައްތަ ގަނެގެން ގެއަށް ގެންނަ އެއްޗެއް ބޮލުގައި ލަނީ އެވެ. ގިނަ ފަހަރަށް އެއްވެސް އެއްޗެއް ބޮލަކު ނުލަ އެވެ.

ދެން ގިނަ ބައެއްގެ ހިތުގައި އުފެދިދާނެ ސުވާލެކެވެ؛ ޝަލަބީގެ އިސްތަށިގަނޑު ކޮށާފާނެ ހެއްޔެވެ؟

"އާނ! ކޮށާލަފާނަން. އެކަމަކު އެއީ ވަރަށް ހާއްސަ ދުވަހަކުން. އެކަމަކު އެއީ ސިއްރެއް،" އޭނާ ބުންޏެވެ.

ޝަލަބީ ބުނި ގޮތުގައި ގޮޅިޖެހި ބޮޑެތި ގަމީސް ލާން ފެށީ މާ ބޮޑަށް ހިކިކޮށް ހުންނާތީ އެވެ. އެއީ އެންމެ ކުރިން ވެސް އޭނާ ހުންނަ ސްޓައިލް ކަމަށް ބުންޏެވެ.

ޝަލަބީ ކުރިން އެއްވެސް ވަރަކަށް ލަވަ ކިޔާހިތެއް ނުވެ އެވެ. އޭނާގެ ޝައުގުވެރިކަން ހުރީ ބިލިއާޑް ކުޅޭށެވެ. ނުވަތަ ފުޓުބޯޅަ ކުޅޭށެވެ. ރަށަށް އޭނާ މަޝްހޫރުވެފައި އޮންނަނީ ރީތިކޮށް ގުރުއާން ކިޔަވާ ޒުވާނެއްގެ ގޮތުގަ އެވެ. ލަވަ ކިޔަން ފެށި ސަބަބާ ގުޅޭ ގޮތުން ސުވާލުކުރުމުން ބުނީ އެއީ ވަރަށް ދިގު ވާހަކައެއް ކަމަށެވެ. އަދި މިހާތަނަށް އެކަން އެނގޭނީ ވެސް އެންމެ މީހަކަށް ކަމަށް ބުނެލި އެވެ.

ދެން ޝަލަބީގެ ކޮން ސިއްރެއް ހެއްޔެވެ؟

އޭނާ އެއްވެސް ގޮތަކަށް ފިޔައެއް ނުކަ އެވެ. އާއްމު ކެއުންތަކާ ވެސް ވަރަށް ދުރެވެ. ކުޑައިރު ރަށުގައި އުޅުނު އިރު ދުވާލަކު ފަސް ފަހަރު މޫދަށް އެރުނެވެ.

މިވަރުން އަސްލު ޝަލަބީ އެނގޭނެ ކަމަށް ހީކުރަމެވެ.