މާދަމާ ސަރުކާރު ބަންދު!

މާދަމާ އަކީ ސަރުކާރު ބަންދު ދުވަހެއް ކަމުގައި ރައީސް އަބްދުﷲ ޔާމީން މިއަދު ހަމަޖައްސަވައިފި އެވެ.

ރައީސް އޮފީހުން ބުނީ މި ގޮތަށް ރައީސް ހަމަޖެއްސެވީ މިއަދު މުޅި ރާއްޖޭގައި ބޭއްވި ލާމަރުކަޒީ އިންތިހާބުގެ އެކި ކަންކަމުގައި ސަރުކާރުގެ ގިނަ އަދަދެއްގެ މުވައްޒަފުންނާއި އާންމުންގެ ގިނަ އަދަދެއްގެ ބަޔަކު ވަރަށް ބުރަކޮށް އުޅެން ޖެހިފައިވާތީ ކަމަށެވެ.

މީގެ ކުރިން ވެސް އިންތިހާބުތަކާ ގުޅިގެން، އިންތިހާބުތަކުގައި މަސައްކަތް ކުރާ މީހުންނަށް ލުޔެއް ދިނުމުގެ ގޮތުން ސަރުކާރު ބަންދު ކޮށްފައިވެ އެވެ. އަދި މިނިވަން ދުވަހާއި އީދު ބަންދާ ގުޅުވައިގެން ވެސް ސަރުކާރު ބަންދުކޮށްފައިވެ އެވެ.

މިއީ މި އަހަރުގެ ރަސްމީ ބަންދު ދުވަސްތައް ފިޔަވައި އެހެން ދުވަހެއް ބަންދުކުރި ފުރަތަމަ ފަހަރެވެ.