އިނގިރޭސި ސަފީރު ޒަޚަމްކޮށްލި ހަމަލާ ދިން މީހާ ބަންގްލަދޭޝް އިން ދަންޖައްސައިފި

ޑާކާ (އެޕްރީލް 13) - އިނގިރޭސި ސަފީރު ޒަޚަމްވި އަތު ބޮމުގެ ހަމަލާ ދިން ބަންގްލަދޭޝްގެ އިސްލާމީ ހަނގުރާމަވެރިޔާ އިއްޔެ ދަންޖައްސައިފި އެވެ.

ހަރަކާތުލް ޖިހާދުލް އިސްލާމީ ޕާޓީގެ ލީޑަރު މުފްތީ އަބްދުލް ހަންނާނާ އެކު އިއްޔެ ވަނީ އޭނާގެ ދެ ބައިވެރިއަކު ވެސް ދަންޖައްސައިފަ އެވެ. މި އެންމެން ވެސް ވަނީ 14 ވަނަ ގަރުނުގެ ސޫފީ އަޅުކަންކުރާ ތަނަކަށް 2004 ވަނަ އަހަރު ދިން ހަމަލާގައި ކުށްވެރިވެފަ އެވެ. އެ ހަމަލާގައި ވަނީ ތިން މީހުން މަރުވެފަ އެވެ. އޭގެ އިތުރުން އިނގިރޭސި ސަފީރު އަންވަރު ޗައުދަރީ ޒަޚަމްވި އެވެ. ބަންގްލަދޭޝް އަށް އުފަން ޗައުދަރީ އަށް އަމާޒުކޮށް އެ ހަމަލާ ދިން އިރު އޭނާ މަގާމާ ހަވާލުވެވަޑައިގެންނެވިތާވީ އެންމެ 18 ދުވަހެވެ.

ޗައުދަރީ އޭރު އޭއެފްޕީ އަށް ވިދާޅުވީ އަތު ބޮން ގޮސް ޖެހުނީ އޭނާގެ ބަނޑުގައި ކަމަށާއި ނަމަވެސް ބޮން ގޮވީ އޭނާ ބިން މައްޗަށް ވެއްޓުނު ފަހުން ކަމަށެވެ.

މަރުގެ އަދަބު ދިން ހަންނާން ވަނީ ސޯވިއެޓް ސިފައިންނާ ދެކޮޅަށް އަފްޣާނިސްތާނުގައި ވެސް ހަނގުރާމަ ކޮށްފަ އެވެ. ހަރަކާތުލް ޖިހާދު ޕާޓީއާ އޭނާ ހަވާލުވެފައި ވަނީ 1990 އަހަރުތަކުގެ ފަހުކޮޅު އެވެ. އޭނާ މަރަން ހުކުމްކޮށްފައި ވަނީ 2008 ވަނަ އަހަރު އެވެ. އެ ހުކުމް އުމުރު ދުވަހުގެ ޖަލު ހުކުމަށް ބަދަލު ކުރަން ކުރި މަސައްކަތް ވަނީ ފޭލްވެފަ އެވެ.