ކުދި ކުށްތަކުގައި ރައީސްގެ އިސް ނެގުމުގައި ލުއި ދެވޭނީ ނުރައްކާތެރި ނޫން މީހުންނަށް

ކުދި ކުށްތައް ސާބިތުވެފައި ތިބޭ މީހުންގެ ތެރެއިން، ރައީސުލްޖުމްހޫރިއްޔާގެ އިސް ނެންގެވުމުގެ މަތިން އަދަބު ލުއިކޮށްދެވޭނީ ބޮޑު ކުށެއްގެ ދައުވާ އުފުލިފައި ނެތް އަދި މުޖުތަމައަށް ނުރައްކާ ނޫން މީހުންނަށް އެކަނި ކަމަށް ކަނޑައަޅައި، އެކަމާ ބެހޭގޮތުން ވަކި އުސޫލެެއް ހަދައިފި އެވެ.

ރައީސްގެ އިސް ނެންގެވުމަށް އަދަބު ލުއިކޮށް ދިނުމާ ގުޅޭގޮތުން އޮންނަ ގަވާއިދުގައި ކުރިން ބަޔާންކޮށްފައިވާ ގޮތުން، ކުދި ކުށްތައް ސާބިތުވެފައި ތިބޭ މީހުންގެ ތެރެއިން ހުކުމުގެ ހަތަރު ބައިކުޅަ އެއްބައި ތަންފީޒުކޮށް ނިންމާފައިވާ މީހުންނަށް ރައީސްގެ އިސް ނެންގެވުމުގައި އަދަބު ލުއިކޮށް ދެވިދާނެ އެވެ. އެކަމަކު ގަވާއިދުގެ އެ ބައި އުވާލުމަށް ފަހު، އިއްޔެ ވަނީ އެފަދަ މީހުންގެ އަދަބު ލުއިކޮށް ދިނުމާ ގުޅޭ ވަކި އުސޫލެއް ހަދައިފި އެވެ.

އިއްޔެ އިން ފެށި އަމަލުކުރަން ފެށި އެ އުސޫލު ބުނާގޮތުން، ކުދި ކުށްތައް ސާބިތުވެފައި މީހުންނަށް ރައީސްގެ އިސް ނެންގެވުމުގައި އަދަބު ލުއިކޮށް ދެވޭނީ ސީރިއަސް ކުށެއްގެ ދައުވާ އުފުލިފައި ނެތް އަދި މުޖުތަމައަށް ނުރައްކާ މީހެއް ކަމަށް ފުލުހުން ކަނޑައަޅާފައި ނުވާ މީހުންނަށެވެ. އަދި އެ މީހެއްގެ ހުކުމް އިސްތިއުނާފް ކުރަން އިސްތިއުނާފްގެ ފުރުސަތު ބަންދުވެފައި ވުމަކީ ވެސް އެފަދަ މީހުންގެ އަދަބު ލުއިކޮށް ދިނުމުގެ ޝަރުތެކެވެ.

އެ އުސޫލުގައިވާ ގޮތުން އެފަދަ މީހުންގެ އަދަބު ލުއިކޮށް ދިނުމުގަައި ރައީސަށް ލަފާ ދިނުމަށް ހޯމް މިނިސްޓްރީން ފަންނީ ކޮމެޓީއެއް އެކުލަވައިލަން ވާނެ އެވެ. ހަތް މެމްބަރުންގެ އެ ކޮމެޓީގައި ހޯމް މިނިސްޓްރީ އާއި ކަރެކްޝަނަލް ސާވިސް އާއި ފުލުހުންނާއި އާންމު ދެ މެމްބަރަކާއި މެޑިކަލް ޑޮކްޓަރެއް ހިމަނަންޖެހެ އެވެ.

ކޮމެޓީގެ ޒިންމާ އަކީ އެ އުސޫލުގެ ދަށުން ލުއި ދިނުމުގެ ފުރުސަތު އޮތް މީހުންގެ މައުލޫމާތު އެއް ކުރުމާއި އެ މީހުންގެ އެސެސްމަންޓް ހެދުމާއި މައުލޫމާތު ރައީސް އޮފީހަށް ފޮނުވުމެވެ.

އެ އުސޫލުގެ ދަށުން ރައީސްގެ އިސް ނެންގެވުމުގެ ދަށުން ލުއި ދެވޭނީ ޝަރުތުތަކާ އެކު އެވެ. ޝަރުތު ކުރެވޭނީ، އެ މީހަކަށް އައިސްފައިވާ ހުކުމުގައި ބާކީ އޮތް މުއްދަތަށް ބެލުމަށް ފަހު، އެކި މީހުންނަށް އެކި މިންވަރަށެވެ. ޝަރުތުގެ މުއްދަތު ނިމުމުގެ ކުރިން އެއާ ޚިލާފުވެއްޖެ ނަމަ އެ މީހެއްގެ ހުކުމުގެ ބާކީ އޮތް މުއްދަތު ތަންފީޒު ކުރަންޖެހޭނެ ކަމަށް އުސޫލުގައިވެ އެވެ.

މީގެ އިތުރުން މަސްތުވާތަކެެތި ބޭނުންކޮށްގެން ޑްރަގް ކޯޓުގެ ރިހެބިލިޓޭޝަން ފުރިހަމަކޮށްފައިވާ ނަމަ، އެ މީހާގެ ހާލަތަށް ބަލައި، އެ މީހާ އަށް އައިސްފައިވާ އެހެން ހުކުމްތަކުގެ އަދަބު ރައީސްގެ އިސް ނެންގެވުމުގައި ލުއިކޮށް ދެވޭ ގޮތަށް ވެސް ގަވާއިދު ވަނީ އިސްލާހުކޮށްފަ އެވެ.

މި ގަވާއިދު މިގޮތަށް އޮތަސް، މާފު ދިނުމާއި އަދަބު ލުއިކޮށް ދިނުމުގެ ގާނޫނުގެ އާންމު އުސޫލުގެ ތެރެއިން އަދަބު ލުއިކޮށް ދިނުމަށް ނުވަތަ މާފު ދިނުމަށް އެދި ކްލެމެންސީ ބޯޑަށް ހުށަހެޅުމުގެ ފުރުސަތު ކޮންމެ ކުށްވެރިއަކަށް ވެސް އޮޮންނާނެ އެވެ. މި އުސޫލަކީ ރައީސްގެ އިސް ނެންގެވުމުގައި އަދަބު ލުއިކޮށް ދިނުމުގެ އުސޫލެވެ.