އެޗް1އެން1އަށް ޕޮޒިޓިވްވި މީހުންގެ އަދަދު 200 އަށް ވުރެ މައްޗަށް

ރާއްޖޭގައި މިހާރު ފެތުރެމުންދާ އެޗް1އެން1އަށް ޕޮޒިޓިވްވި މީހުންގެ އަަދަދު 200 އަށް ވުރެ މައްޗަށް ހިނގައްޖެ އެވެ.

ހެލްތް ޕްރޮޓެކްޝަން އޭޖެންސީ (އެޗްޕީއޭ) އިން މިއަދު އާއްމުކުރި މައުލޫމާތުތައް ދައްކާގޮތުން އެޗް1އެން1 އަށް 619 މީހުން ޓެސްޓުކުރި އިރު އޭގެ ތެރެއިން 222 މީހަކު ވަނީ ޕޮޒިޓިވްވެފަ އެވެ. އަދި އެޑްމިޓްކޮށްގެން 20 މީހަކަށް ފަރުވާ ދެމުން އަންނަ ކަމަށް އެޗްޕީއޭއިން ބުންޏެވެ.

އެޗް1އެން1 އަށް ފަރުވާދިނުމަށް ފަހު، މިދިޔަ 48 ގަޑިއިރު ތެރޭގައި 10 މީހަކު ދޫކޮށްލާފައިވާ ކަމަށް ވެސް އެ މައުލޫމާތުތަކުން ދައްކަ އެވެ.

މިިދިޔަ ހޯމަ ދުވަހާ ހަމައަށް އެޗް1އެން1 އަށް ޕޮޒިޓިވް ވި މީހުންގެ އަދަދު އުޅުނީ 199 ގަ އެވެ. އެހެންކަމުން ދެ ދުވަހުގެ ތެރޭގައި އެ ބައްޔަށް، އިތުރު 23 މީހަކު ވަނީ ޕޮޒިޓިވް ވެފަ އެެވެ.

އެ ހިސާބުތައް ދައްކާގޮތުން ރޯގާ ޖެހިގެން އިއްޔެ ޑޮކްޓަރަށް ދެއްކި މީހުންގެ އަދަދު ވަނީ، އޭގެ ކުރީ ދުވަހަށް ވުރެ މަދުވެފަ އެވެ. ހޯމަ ދުވަހު އަތޮޅުތަކުން 824 މީހުން ރޯގާ ޖެހިގެން ރިޕޯޓުކުރިއިރު މާލެއިން ރިޕޯޓުކުރި އަދަދު އުޅެނީ 357 ގަ އެވެ. ހޯމަ ދުވަހު 1181 މީހުން ރިޕޯޓުކުރިއިރު އިއްޔެ އެ އަދަދު އުޅުނީ 1154 ގަ އެވެ.

އެޗް1އެން1 ޖެހިގެން މިހާތަނަށް ހަ މީހަކު ވަނީ މަރުވެފަ އެވެ.

ރޯގާއާ ގުޅިގެން ސްކޫލްތައް ބަންދުކުރުމަށް ފަހު މިދިޔަ އާދީއްތަ ދުވަހު އަލުން ހުޅުވި އެވެ. ނަމަވެސް ހޯމަ ދުވަހު އަނެއްކާވެސް ވަނީ ތިން ދުވަހަށް ބަންދުކޮށްފަ އެވެ. ސްކޫލްތައް ހުޅުވި ނަމަވެސް ސްކޫލްތަކަށް ދަރިވަރުން ނުދާތީ ސްކޫލްތައް އޮތީ ހުސްކޮށެވެ. އެޗްޕީއޭއިން ބުނީ މާލެއާ ބައެއް އަތޮޅުތަކުގައި ފެތުރެމުންދިޔަ އަރިދަފުސް ރޯގާއާ އިންފްލެއެންޒާގެ ހާލަތު ވަރަށް ބޮޑަށް ރަނގަޅުވެފައިވާ ކަމަށެވެ. އަދި އެ ބަލި ކޮންޓްރޯލްކުރަން ގިނަ ކަންތައްތަކެއް ކުރަމުންދާ ކަން އެޗްޕީއޭއިން ފާހަަގަކުރި އެވެ.