އީސީގެ ވޯކް-އިން އިންޓަވިއު އަށް 100 އަށް ވުރެ ގިނަ މީހުން ހިނގައްޖެ

އަންނަ އަހަރުގެ އޭޕްރީލް މަހު ބާއްވާ ލޯކަލް ކައުންސިލް އިންތިހާބުގެ މަސައްކަތަށް މުވައްޒަފުން ނެގުމަށް އިލެކްޝަންސް ކޮމިޝަން (އީސީ) އިން ކުރިއަށް ގެންދާ ވޯކް-އިން އިންޓަވިއުއަށް އިއްޔެ 100 ވުރެ ގިނަ މީހުން ހިނގައްޖެ އެވެ.

އީސީގެ ވެބްސައިޓުގައި ބުނީ ލޯކަލް ކައުންސިލްތަކުގެ އިންތިހާބާއި އަންހެނުންގެ ތަރައްގީއަށް މަސައްކަތްކުރާ ކޮމިޓީގެ އިންތިހާބުގެ މަސައްކަތްތަކަށް ބޭނުންވާ މުވައްޒަފުން ހޯދުމަށް ދެ ދުވަހަށް ކުރިއަށް ގެންދާ ވޯކް-އިން އިންޓަވިއުގެ ތެރެއިން އިއްޔެ ބޭއްވި ސެޝަނަށް ވަރަށް ބޮޑު ތަރުހީބެއް ލިބިފައިވާ ކަމަށެވެ.

އެ ކޮމިޝަނުން ބުނީ ކަލާފާނު ސްކޫލްގައި އިއްޔެ ބޭއްވި ވޯކް-އިން އިންޓަވިއުއަށް 100 އަށް ވުރެ ގިނަ މީހުން ދިޔަ ކަމަށެވެ. އޭގެ ތެރޭގައި ގިނައީ އުމުރުން 18 އަހަރާއި 25 އަހަރާ ދެމެދު ޒުވާނުން ކަމަށާއި އެންމެ ގިނައިން ފޯމު ހުށަހަޅާފައި ވަނީ އޮފިސަރުންނަށާއި ސީނިއާ އޮފިސަރުންގެ މަގާމަށް ކަމަށް ވެސް އެ ކޮމިޝަނުން ބުންޏެވެ.

އީސީގެ ވޯކް-އިން އިންޓަވިއުގެ ދެވަނަ ސެޝަން ހުޅުމާލެ 2 ގައި ހުންނަ ކާމިލް ދީދީ ޕްރައިމަރީ ސްކޫލުގައި މިއަދު އަންނަނީ ބާއްވަމުންނެވެ. ވޯކް-އިން އިންޓަވިއު މިރޭ 10:00 އާ ހަމައަށް ކުރިއަށް ގެންދާނެ އެވެ.

ވޯކް-އިން އިންޓަވިއުއަށް ދާއިރު އައިޑީ ކާޑާއި ތައުލީމީ ސެޓްފިކެޓް އަދި ސީވީގެ ކޮޕީ ގެންދިއުމަށް އީސީން ވަނީ އެދިފަ އެވެ. އަދި ޝަރުތު ހަމަވާ މީހުން ފޯމު ހުށަހެޅުމާއި ވަގުތުން އިންޓަވިއުކުރުމާއި ޕްރެކްޓިކަލް ޓެސްޓް ހެދުމުގެ އިންތިޒާމްތައް ވެސް ވަނީ ހަމަޖައްސައިފަ އެވެ.

ކައުންސިލް އިންތިހާބުގެ މަސައްކަތަށް 260 އަށް ވުރެ ގިނަ މުވައްޒަފުން ހޯދަން އީސީން ވަނީ އިއުލާންކޮށްފަ އެވެ.

ވޯކް-އިން އިންޓަވިއުއަށް ފަހު އެ މަގާމުތަކަށް މުވައްޒަފުން ހަމަނުވާ ނަމަ، އެ މަގާމުތަކަށް އިއުލާނުގައިވާ އަދަދަށް މުވައްޒަފުން ހަމަވަންދެން، އަންނަ މަހު އެކަކުން ފެށިގެން ކޮންމެ 15 ދުވަހަކުން މަގާމަށް ކުރިމަތިލާފައިވާ މީހުން އިވެލުއޭޓްކޮށް މީހުން ނަގަމުން ދާނެ ކަމަށް އީސީން ކުރިން ބުނެފައިވެ އެވެ.