ޔާމީން އެންމެ ދެރަވީ އެކުގައި ހުންނެވި ޣައްސާން ފެއަށް ވަޑައިގަތުމުން

ޕީޕީއެމް/ ޕީއެންސީ ކޯލިޝަނުގައި އެ މަނިކުފާނާ އެކުގައި ތިއްބެވި ބޭފުޅުންގެ ތެރެއިން ޑިފެންސް މިނިސްޓަރު ޣައްސާން މައުމޫން ކަންތައް ކުރެއްވި ގޮތާ މެދު ދެރަވާ ކަމަށް ކުރީގެ ރައީސް އަދި ޣައްސާންގެ ބޮޑުބޭބެ، އަބްދުﷲ ޔާމީން ރޭ ވިދާޅުވެއްޖެ އެވެ.

ޔާމީން އެހެން ވިދާޅުވީ، އެ މަނިކުފާނުގެ ޕީއެންއެފުން ބޭއްވި ޖަލްސާގައި މިދިޔަ ރިޔާސީ އިންތިހާބުގެ ކެމްޕެއިން ދުވަސްވަރު ޕީޕީއެމް/ޕީއެންސީ ކޯލިޝަނުގެ އިސް ލީޑަރުން ދެއްވި ޕްރެސް ކޮންފަރެންސްގެ ރެކޯޑިން ދެއްކުމަށް ފަހު ވާހަކަފުޅު ދައްކަވަމުންނެވެ.

ފިޝަރިޒް މިނިސްޓަރު އަހުމަދު ޝިޔާމާއި ޑިފެންސް މިނިސްޓަރު ޣައްސާން މައުމޫނާއި ލޯކަލް ގަވަމެންޓް މިނިސްޓަރު އާދަމް ޝަރީފްގެ އިތުރުން ރައްޔިތުންގެ މަޖިލީހުގެ ރައީސް އަބްދުއްރަހީމް އަބްދުﷲ ވެސް ވަނީ އެ ބޭފުޅުން ތިއްބެވީ "ރައީސް ޔާމީނާ އެކު ވަރަށް ސާބިތުކަމާ އެކު ކަމަށް" އެ ވީޑިއޯގައި ވިދާޅުވެފަ އެވެ.

ވީޑިއޯއާ ގުޅޭ ގޮތުން ޔާމީން ރޭ ވިދާޅުވީ، އެ މަނިކުފާނު އެންމެ ހިތްހަމަޖެހިވަޑައިނުގަތީ އަދި ދެރަފުޅުވީ ވެސް ޣައްސާންގެ ވާހަކަތަކާ ގުޅިގެން ކަމަށެވެ. އެއްވެސް ޝަރުތެއް ނެތި، ޣައްސާން އެކުގައި ހުންނަވާނެ ކަމަށް ކަމަށް އުއްމީދު ކުރެއްވި ކަމަށް ޔާމީން ވިދާޅުވި އެވެ.

ޔާމީން ދެކެވަޑައިގަންނަވާ ގޮތުގައި ނަމަ އެކަހަލަ ވާހަކަތަކެއް ދެއްކެވުމަށް ފަހު، ޑިފެންސް މިނިސްޓަރުގެ މަގާމުގައި ޣައްސާން ހުންނެވުމަކީ އިތުބާރު ގެއްލޭނެ ކަމެކެވެ.

"އަޅުގަނޑު ގަބޫލުކުރިން އެއީ ހަމަ އެއްވެސް ކަހަލަ ކޮންޑިޝަނެއް ނެތި އަޅުގަނޑާ އެކު ހުރި ބޭފުޅެއް ކަމަށް. އާއިލާގެ ގާތްތިމާގެ ކަމުގެ ލޭގެ އިތުރުން ޑެޑިކޭޓެޑް އަދި ވަރަށް ޑިވޯޓެޑް، އެކަމަކު އެ ވަރުގެ ވަރުގަދަ ވާހަކަފުޅުތައް ރައްޔިތުންގެ ކުރިމަތީގައި ދައްކަވާފައި މިއަދު ޑިފެންސްގެ މަގާމުގައި ހުންނެވީމަ ރައްޔިތުން އިތުބާރެއް ނުކުރާނެ،" ޔާމީން ވިދާޅުވި އެވެ.

ޔާމީންގެ ވެރިކަމުގައި، ބައްޕާފުޅު، ކުރީގެ ރައީސް މައުމޫން އަބްދުލްގައްޔޫމަށް ތުހުމަތުތަކަކާ އެކު ޖަލަށް ލި އިރު ވެސް ޣައްސާން ހުންނެވީ ޔާމީނާ އެކުގަ އެވެ.

ޔާމީން ރޭ އިޝާރާތް ކުރެއްވި ވީޑިއޯގައި ވެސް ޣައްސާން ވިދާޅުވެފައި ވަނީ އޭނާ ކުރިއަށް އޮތްތަނުގައި ވެސް ސިޔާސީ މައިދާނުގައި ހުންނަވާނީ ޔާމީނާ އެކު ކަމަށެވެ.

ޣައްސާންގެ އިތުރުން ދެން މާޔޫސް ވަނީ މިނިސްޓަރު އާދަމް ޝަރީފްގެ ވާހަކަތަކުގެ ސަބަބުން ކަމަށް ވެސް ޔާމީން ވިދާޅުވި އެވެ. އާދަމް ޝަރީފް ބޭފުޅަކަށް ހައްދަވައިދެއްވީ އެ މަނިކުފާނު ކަމަށް ޔާމީން ވިދާޅުވި އެވެ.

"ވަރަށް ޑިސްއެޕޮއިންޓްވޭ އާދަމް ޝަރީފް މިގޮތަށް މި ވާހަކަ ދެއްކުމުން. އާދަމް ޝަރީފް އުފެދިގެން އައިސް ޑިފެންސް މިނިސްޓަރަކަށް ހަދައި މިހުރިހާ ކަމެއް ކުރީ އަޅުގަނޑު،" ޔާމީން ވިދާޅުވި އެވެ.

އެކަމަކު އެ ދެބޭފުޅުން ފިޔަވައި ދެން ތިއްބެވީ ސިޔާސީ ބޭފުޅުން ކަމަށާއި އެ ބޭފުޅުންގެ ވާހަކަތަކުން ދެރަފުޅު ނުވާ ކަމަށް ވެސް ޔާމީން ވިދާޅުވި އެވެ.

"އަބްދުއްރަހީމަކީ ސިޔާސީ ބޭފުޅެއް. އެމްޕީ ޝިޔާމަކީ ސިޔާސީ ބޭފުޅެއް. އެހެންވީމަ އެ ބޭފުޅުން އެ ވާހަކަ ދެއްކީމަ އަޅުގަނޑުގެ އެހާ ބޮޑު ހާޓެއް ނެތް އެކަމުގައި. އެކަމަކު ޣައްސާން އެ ކުރެއްވި ކަމަކީ ގަބޫލުކުރެވޭ ކަމެއް ނޫން."

މި ސަރުކާރު އުފެދެންދެން، ޔާމީނާ އެކުގައި ތިއްބެވި ޕީޕީއެމް/ޕީއެންސީގެ ސެނެޓުގެ ބޭފުޅުން އެ މަނިކުފާނާ ދުރަށް ވަޑައިގަތީ، ވެރިކަމުގެ ވަރަށް ކުރީކޮޅު ޔާމީން ކަންކަން ކުރައްވަން ފެއްޓެވި ގޮތުން ކަމަށް އެ ބޭފުޅުން ވިދާޅުވެފައި ވެ އއެވެ. ޕާޓީގެ މަގާމުތައް ބަދަލުކުރައްވައި އެ މަނިކުފާނު ބާރުވެރިކަން ހޯއްދަވަން އުޅުއްވުމާ އެކު އުފެދުނު ހިޔާލު ތަފާތުވުންތަކަށް ފަހު ޕީޕީއެމުން ވަކިވެވަޑައިގެން ޕީއެންއެފް އުފެއްދެވީ ވެސް ޔާމީނެވެ.

ޣައްސާނާއި ސެނެޓުގެ އެހެން ބޭފުޅުން ކުރިއަށް ވަޑައިގަތީ ނު ސަރުކާރާއެކުގަ އެވެ.

ޔާމީން ކަން ކުރެއްވި ގޮތާ ގުޅޭ ގޮތުން ވާހަކަ ދައްކަވަމުން ޣައްސާން ކުރިން ވިދާޅުވެފައިވާ ގޮތުގައި، ޕީޕީއެމް ދޫކުރެއްވިއިރު މައްސަލައެއް އުޅޭކަމެއް ވެސް ޔާމީން ވިދާޅެއް ނުވެ އެވެ. ޔާމީން ޕީޕީއެމް ދޫކުރެއްވީ އެއްވެސް ކަމެއް އަންގަވާ ނުލައްވާ ކަމަށް ޣައްސާން ވިދާޅުވެފައިވެ އެވެ.

ޣައްސާން ވިދާޅުވެފައި ވަނީ އޭނާ ފިޔަވައި ޔާމީނަށް ހެޔޮ އެދިވަޑައިގަންނަވާ އެހެން ބޭފުޅަކު ނުހުންނާނެ ކަމަށެވެ.

ޕީއެންއެފް އުފެއްދެވި ފަހުން ޔާމީން ގެންދަވަނީ އެ ޕާޓީގެ ބައްދަލުވުންތަކުގައި، ކުރީގެ ޕީޕީއެމާއި ޕީއެންސީގެ އިސް ބޭފުޅުން ހިމެނިވަޑައިގަންނަވާ މި ސަރުކާރަށް ވަރަށް ބޮޑަށް ފާޑުވިދާޅުވަމުންނެވެ.