އަރަބި ލީގުން ގޮވާލީ ޣައްޒާގެ ހަމަލާތައް ހުއްޓުވަން ބައިނަލްއަގުވާމީ ޕްރެޝަރަށް

އިޒްރޭލުން ފަލަސްތީނުގެ ޣައްޒާގައި ދެމުން ގެންދާ ލާއިންސާނީ ހަމަލާތައް ހުއްޓުމަކަށް ގެންނަން ބައިނަލްއަގުވާމީ ޕްރެޝަރު އިތުރުކުރުމަށް އަރަބި ލީގުގެ ސަމިޓުގައި އިއްޔެ ގޮވާލައިފި އެވެ.

އިރާގުގެ ވެރިރަށް ބަޣްދާދުގައި ބޭއްވި ބައްދަލުވުމުގައި އަރަބި ގައުމުތަކުން މިކަމަށް ގޮވާލީ އިޒްރޭލުން ޣައްޒާގައި ކުރިއަށްވުރެ ވަރުގަދަ އާ އޮޕަރޭޝަނެއް ފަށައިފިކަން އިއުލާނުކޮށްފައި ވަނިކޮށެވެ.

އަރަބި ލީގުގެ މެމްބަރުންގެ ގުޅިފައިވާ ބަޔާނުގައި، ޣައްޒާ އަލުން ބިނާކުރުމުގެ ޕްލޭނަށް އެއްބާރުލުން ދިނުމަށް ވެސް އެދިފައިވެ އެވެ. މިއީ ޣައްޒާއިން މީހުން ބާލުވައި ހުސްކުރުމަށް ފަހު އަލުން އެތަން ތަރައްގީކުރާނީ ކަމަށް އެމެރިކާގެ ރައީސް ޑޮނަލްޑް ޓްރަމްޕު ވިދާޅުވެފައި ވާތީ ދިން ރައްދެކެވެ. ބަޔާނުގައި ބުނެފައިވަނީ ޣައްޒާގެ ރައްޔިތުން އެ ބިމުން ނެރުމުގެ ކޮންމެ ވިސްނުމަކަށް އަރަބި ގައުމުތަކުން ކަނޑައެޅިގެން ދެކޮޅު ހަދާ ކަމަށެވެ.

އަރަބި ލީޑަރުން ވަނީ ހަމަނުޖެހުންތައް ހުއްޓުވުމަށް ބައިނަލްއަގްވާމީ މުޖުތަމައުން ޕްރެޝަރު ކުރުމަށާއި ޣައްޒާގައި ހާލުގައި ޖެހިފައިވާ މީހުންނަށް އެއްވެސް ހުރަހެއް ނެތި އިންސާނީ އެހީތެރިކަން ފޯރުކޮށްދިނުމުގެ ފުރުސަތު އަވަސް ކޮށްދިނުމަށް އެދިވަޑައިގެންފަ އެވެ.

ސަމިޓްގައި މެހެމާނެއްގެ ގޮތުގައި ބައިވެރިވެ ވަޑައިގަތް ސްޕެއިންގެ ބޮޑުވަޒީރު ޕެޑްރޯ ސަންޗޭޒް ވެސް ވަނީ ޣައްޒާގައި ހިންގަމުންދާ ލޭއޮހޮރުވުން ހުއްޓުމަކަށް ގެނައުމަށް ބައިނަލްއަގުވާމީ ޕްރެޝަރު ބޮޑުކުރުމަށް ގޮވާލައްވައިފަ އެވެ.

މިސްރުގެ ރައީސް އަބްދުލް ފައްތާހު އަލް ސީސީ ވަނީ ހަނގުރާމަ ހުއްޓުވަން ކުރެވެން ހުރި ހުރިހާ މަސައްކަތެއް ކުރުމަށް އެމެރިކާގެ ރައީސް ޑޮނަލްޑް ޓްރަމްޕްގެ ކިބައިން އެދިވަޑައިގެންފަ އެވެ.

އދ.ގެ ވެރިޔާ އެންޓޯނިއޯ ގުޓަރޭޒް ސަމިޓްގައި ވިދާޅުވީ "މިހާރު ބޭނުންވަނީ ދާއިމީ ހަނގުރާމަ ހުއްޓާލަން" ކަމަށެވެ. އޭނާ ވަނީ ޣައްޒާގައި އިޒްރޭލުގެ އަސްކަރީ ހަރަކާތްތައް އިތުރަށް ފުޅާކުރަން ނިންމާފައި ވާތީ އެކަމާ އިތުރަށް ކަންބޮޑުވެ ވަޑައިގަންނަވާ ކަމަށް ވެސް ވިދާޅުވެފަ އެވެ.

"ޣައްޒާގެ އާންމުން ތަކުރާރުކޮށް ގެދޮރުން ނެރެ އެކި ތަންތަނަށް ވިއްސިވިހާލިކުރަމުން ދިއުމާ ދެކޮޅުހަދަން. ހަމަ އެހެން، ޣައްޒާއިން ބޭރަށް ގަދަކަމުން އެ މީހުން ގެންދިއުމާ ވެސް ދެކޮޅު،" ގުޓަރޭޒް ވިދާޅުވި އެވެ.

ސަމިޓަށް ފަހު ބޭއްވި ޕްރެސް ކޮންފަރެންސްގައި އޭނާ ވަނީ ޣައްޒާއަށް އެހީ ވެއްދުން ހުއްޓުވާފައި އޮންނަ އޮތުން އިޒްރޭލުން ނިމުމަކަށް ގެންނަން ވެސް ގޮވާލައްވައިފަ އެވެ.