ބޮޑު ބަޔަކަށް މޫސުން ގޯސް ވެއްޖެ، ދެން މޫސުން ރަނގަޅުވަނީ ހުކުރު ދުވަހު

މިއަދާއި މާދަމާ ވެސް ރާއްޖޭގެ ބޮޑު ބަޔަކަށް މޫސުން ގޯސްވާނެ ކަމަށް މޫސުމާ ބެހޭ އިދާރާ އިން ބުނެފި އެވެ.

މެޓް އޮފީހުގެ އޮފިޝަލަކު "މިހާރު" އަށް މިއަދު ވިދާޅުވީ މިއީ އިރުވައި މޫސުން ނިމި، ހުޅަނގު މޫސުން ފެށުމުގެ މަރުހަލާގައި ކުރާ ވިއްސާރައެއް ކަމަށެވެ.

ރާއްޖެއަށް ހުޅަނގު މޫސުން އަދި ނުފެށޭ ކަމަށާއި މިއީ ދެ މޫސުން ބެދޭ ދުވަސްވަރާ ދިމާކޮށް ކުރާ ގަދަ ވިއްސާރައެއް ކަމަށް ވެސް އޭނާ ވިދާޅުވި އެވެ.

އޮފިޝަލް ވިދާޅުވި ގޮތުގައި ކުރިއަށް އޮތް ވަގުތުތަކުގައި ވަރަށް ބޯކޮށް ވާރޭވެހޭނެ ކަމަށް ދައްކަ އެވެ. މާދަމާގެ ނިޔަލަށް މި ވިއްސާރަ ދެމިގެންދާނެ ކަމަށާއި އެކަމަކު ހުކުރު ދުވަހު މަޑުމަޑުން މޫސުން ރަނގަޅުވަމުންދާނެ ކަމަށް ވިދާޅުވި އެވެ.

މާލެ އަށް ރޭ ފަތިހުން ފެށިގެން މެދުނުކެނޑި ވެހެމުންދާ ބޯ ވާރެއާ ގުޅިގެން ގާތްގަނޑަކަށް ހުރިހާ މަގެއްގައި ފެން ބޮޑުވެ، ހިނގައިބިނގާވެ އުޅުމަށް މިހާރު ވަނީ ވަރަށް ބޮޑަށް ދަތިވެފަ އެވެ.

މޫސުން ގޯސްވެ، މެޓް އޮފީހުން ވަނީ މިހާރު ވެސް ބޮޑު ބަޔަކަށް ދެ އެލާޓެއް ނެރެފަ އެވެ. އޭގެ ތެރެއިން މޫސުން ތަންކޮޅެއް ގޯސްވާނެތީ ޔެލޯ އެލާޓް ނެރެފައި ވަނީ ރ. އަތޮޅުން ފެށިގެން އދ. އަތޮޅާ ހިސާބަށެވެ. އެ ސަރަހައްދަށް ބޯކޮށް ވާރޭވެހުމާ އެކު ގުގުރާނެ ކަމަށް ލަފާކުރެ އެވެ.

މެޓުން ވަނީ ގަޑިއަކު 19 މޭލާއި 24 މޭލާ ދެމެދުގައި ވައި ޖެހި، ވިލާގަނޑުގައި 40 މޭލަށް ވައިގަދަވާނެ ކަމަށް ލަފާކޮށް ގއ. އަތޮޅުން ފެށިގެން އައްޑުއާ ހަމައަށް ވައިޓް އެލާޓް ނެރެފަ އެވެ. އެ ސަރަހައްދަށް ކަނޑުތައް ގަދަވާނެ ކަމަށް ވެސް ލަފާކުރެ އެވެ.

އެ ސަރަހައްދުތަކަށް މޫސުން ގޯސްވާނެ ކަމަށް ލަފާކޮށް އެލާޓް ނެރުނުއިރު ރޭ ފަތިހު ވެސް ވަނީ ހއ. އިން ފެށިގެން ލ. އަތޮޅާ ދެމެދަށް ވައިޓް އެލާޓް ނެރެފަ އެވެ.