ބާރަށުގައި ސިހުރު ހަދާ ކަމުގެ ތުހުމަތުގައި 8 ތަނެއް ފާސްކޮށް 8 މީހަކާ ސުވާލުކޮށްފި

ހއ. ބާރަށުގައި ސިހުރު ހަދާ ކަމުގެ މައުލޫމާތު ފުލުހުންގެ އިންޓެލިޖެންސަށް ލިބުމާ ގުޅިގެން އެ ރަށުގެ 8 ތަނެއް މިއަދު ފާސްކޮށްފައިވާ ކަމަށް ފުލުހުން ބުނެފި އެވެ.

ފުލުހުން މީޑިއާތަކާ ހިއްސާކުރި މެސެޖެއްގައި ބުނީ، މިއަދުގެ ހެނދުނު ހަތަކުން ފެށިގެން ކުރިއަށް ގެންދިޔަ އެ އޮޕަރޭޝަންގައި ބާރަށުގެ 8 ތަނެއް ބަލައި ފާސްކޮށް 8 މީހަކު ފުލުހުންގެ ބެލުމުގެ ދަށަށް ގެންދިޔަ ކަމަށެވެ. އެކަމަކު، ސުވާލު ކުރުމަށް ފަހު އެ މީހުން މިހާރު ދޫކޮށްލާފައިވާ ކަމަށް ފުލުހުން ބުންޏެވެ.

ފުލުހުން ބުނިގޮތުގައި އެ 8 ތަން ބަލައިފާސްކޮށް، މައްސަލައާ ގުޅުން ހުރި ކަމަށް ބެލެވޭ ތަކެތި ފުލުހުންގެ ބެލުމުގެ ދަށަށް ގެންދިޔަ އެވެ.

"ފުލުހުން ގެންދަނީ މި މައްސަލަ ތަހުގީގު ކުރަމުން،" ފުލުހުންގެ މީޑިއާ އޮފިޝަލް ވިދާޅުވި އެވެ.

ހދ. ކުޅުދުއްފުށީގައި ވެސް ސިހުރުގެ މައްސަލަ ބޮޑުވެ، ފުލުހުން މިދިޔަ ފެބްރުއަރީ 20 ގައި ހިންގި އޮޕަރޭޝަނެއްގައި 10 ގެއެއް ބަލައި ފާސްކޮށް 8 ގެއަކުން ސިހުރު ހަދާ ސާމާނު ހޯދާފައި ވެ އެވެ. އެ މައްސަލާގައި ބަޔަކު އޭރު ހައްޔަރެއް ނުކުރެ އެވެ. ފަހުން އޭގެ އެއްވެސް ތަފުސީލެއް ފުލުހުން މީޑިއާ ހިއްސާއެއް ނުކުރެ އެވެ.