އެއާޕޯޓުގައި ހިންގި މާރާމާރީއެއްގައި ގިނަ ބަޔަކަށް އަނިޔާވެ ފަރުވާދެނީ

ވެލާނާ އިންޓަނޭޝަނަލް އެއާޕޯޓް (ވީއައިއޭ)ގެ ޓާމިނަލްގެ މަސައްކަތްކުރާ ބިދޭސީންތަކެއްގެ މެދުގައި ބޮޑު މާރާމާރީ ހިންގައި ގިނަ ބަޔަކަށް އަނިޔާވެގެން ފަރުވާ ދޭން ފަށައިފި އެވެ.

ފުލުހުން ބުނީ ވީއައިއޭ ޓާމިނަލް ހެދުމުގެ މަސައްކަތްކުރަމުންދާ ބިދޭސީންގެ މެދުގައި ހިންގި މާރާމާރިއަކާ ގުޅިގެން ފުލުހުން ހަރަކާތްތެރިވަމުންދާ ކަމަށެވެ.

އެ މާރާމާރީގައި އަނިޔާވީ ކިހާ ބަޔަކަށް ކަމެއް އަދި ސާފެއް ނޫނެވެ. އެކަމަކު އެ މީހުންނަށް ހުޅުމާލޭ ހޮސްޕިޓަލާއި ޓްރީޓޮޕްގައި ފަރުވާދެމުން އަންނަ ފުލުހުން ބުންޏެވެ.

ހުޅުމާލޭ ހޮސްޕިޓަލުގެ މީޑިއާ އޮފިޝަލް "މިހާރު" އަށް ވިދާޅުވި ގޮތުގައި އެ ހޮސްޕިޓަލުގައި 10 މީހަކަށް އަންނަނީ ފަރުވާ ދެމުންނެވެ. އެކަމަކު އެ މީހުންނަށް ސީރިއަސް އަނިޔާތަކެއް ލިބިފައި ނުވާ ކަމަށް އޭނާ ވިދާޅުވި އެވެ.

"އެކި ކަހަލަ އަނިޔާތައް ލިބިފައި ހުރީ. އެއްވެސް މީހަކަށް ސީރިއަސް އަނިޔާއެއް ނެތް ލިބިފައި،" އޭނާ ވިދާޅުވި އެވެ.

އެތަނުގައި ފަރުވާދެމުން އަންނަނީ ޗައިނާ އާއި އަރަބި ބަޔަކަށް ކަމަށް ވެސް އޭނާ ވިދާޅުވި އެވެ.

ހުޅުމާލެ ހޮސްޕިޓަލްގެ އިތުރުން ޓްރީ ޓޮޕްގައި ފަރުވާ ދެމުން އަންނަނީ ކިތައް މީހުންނަށް ކަމެއް އަދި ނޭނގެ އެވެ. ގިނަ ބަޔަކު ބައިވެރިވި މި މާރާމާރީ ހިނގަން މެދުވެރިވި ސަބަބެއް ވެސް އަދި ސާފެއް ނުވެ އެވެ.