ހަތަރު ދުވަސްތެރޭ ޣައްޒާއިން 200 ކުޑަކުދިން ޝަހީދުކޮށްލައިފި

މިދިޔަ އަންގާރަ ދުވަހު އިޒްރޭލުން ފަލަސްތީނުގެ ޣައްޒާއަށް އަލުން ހަމަލާދޭން ފެށި ފަހުން މިހާތަނަށް 200 ކުޑަކުދިންނާއި 110 އަންހެނުން ޝަހީދުވެފައިވާ ކަމަށާއި މިއީ ބިރުވެރި މަންޒަރުތަކެއް ކަމަށް އދ. ގެ ހިއުމަން ރައިޓްސް އޮފީހުން ބުނެފި އެވެ.

އިޒްރޭލުން ރޭ ދިން ހަމަލާތަކުގައި ވެސް ފަސް ކުއްޖަކު ޝަހީދުވެފައިވާ ކަމަށް އަލް ޖަޒީރާއިން ބުންޏެވެ. އަދި މި ކުދިންގެ އާއިލާތަކުގެ އަށް މީހަކު، ވެއްޓިފައިވާ އިމާރާތްތަކުގެ ދަށުގައި ތާށިވެފައިވާ ކަމަށް ވެސް ބުންޏެވެ.

މި ހަމަލާ ދިން އިރު އިޒްރޭލުން ވަނީ ޣައްޒާގައި ހުރި ކެންސަރުގެ ފަރުވާއަށް ހާއްސަ ހަމައެކަނި ހޮސްޕިޓަލަށް ވެސް ހަމަލާ ދީފަ އެވެ. ތުރުކީން ފަލަސްތީނަށް ހަދިޔާކޮށްފައިވާ އެ ހޮސްޕިޓަލަށް ހަމަލާ ދިން އިރު އެތަން ހުރީ ހުސްކޮށެވެ. ޣައްޒާގެ ހެލްތު މިނިސްޓްރީން ވަނީ މިއީ އިޒްރޭލުން ގަސްތުގައި ހިންގި ލާއިންސާނީ ބޮޑު ޖަރީމާއެއް ކަމަށް ބުނެފަ އެވެ.

ހުއްޓުމެއް ނެތި ހަމަލާތައް ދެމުން ދާއިރު، ހަމަލާތައް ހުއްޓުމަކަށް ގެނެސް އިޒްރޭލާއި ހަމާސް ޖަމާއަތުގެ ސުލްހައިގެ އެއްބަސްވުމަށް އަލުން އަމަލުކުރަން ފެށޭތޯ ވެސް އަންނަނީ މަސައްކަތް ކުރަމުންނެވެ. ފަލަސްތީންގެ ބައެއް އޮފިޝަލުންނާ ހަވާލާދީ އޭއެފްޕީން ބުނި ގޮތުގައި ސުލްހައިގެ މެދުވެރިންގެ ގޮތުގައި މަސައްކަތްކުރާ މިސްރާއި ގަތަރުން ވަނީ ފަލަސްތީނުގެ ގައިދީންގެ ބަދަލުގައި އިޒްރޭލުގެ ރަހީނުން މިނިވަންކުރުމާ ބެހޭ އާ ހުށަހެޅުމެއް އަނެއްކާވެސް ހުށަހަޅައިފަ އެވެ.

އޮފިޝަލުން ވިދާޅުވެފައިވާ ގޮތުގައި މިކަމުގައި މިހާރު އޮތީ "ޓައިމްލަނަކާ މެދު އެއްބަސްވުން" އެކަންޏެވެ.

އިޒްރޭލުން މިފަހަރު ހަމަލާތައް ފެށީ ޖެނުއަރީ މަހު އަމަލުކުރަން ފެށި ހަމަލާ ބަދަލުކުރުން މެދުކަނޑާލުމުގެ އެއްބަސްވުމުގެ ފުރަތަމަ މަރުހަލާ ނިމި ދެ ވަނަ މަރުހަލާ ތަންފީޒުކުރުމަށް އުޒުރުތައް ދެއްކުމަށް ފަހުގަ އެވެ. މިފަހަރުގެ ހަމަލާތަކުގައި މިހާތަނަށް ޝަހީދުކޮށްލި މީހުންގެ އަދަދު ވަނީ 600 އަށް އަރައިފަ އެވެ.

ޣައްޒާގެ ހެލްތު މިނިސްޓްރީގެ އެންމެ ފަހުގެ ހިސާބުތައް ދައްކާ ގޮތުން އިޒްރޭލުން އޮކްޓޫބަރު 7، 2023 ގައި ޣައްޒާއަށް ހަމަލާ ދޭން ފެށިފަހުން މިހާތަނަށް ޝަހީދުވި މީހުންގެ އަދަދު އެންމެ މަދުވެގެން ވެސް 49،617 އަށް އަރަ އެވެ. މީގެ އިތުރުން 112،950 މީހަކު ޒަހަމްވެފައިވާ ކަމަށް ވެސް ބުންޏެވެ. އެކަމަކު ޣައްޒާގެ ސަރުކާރު މީޑިއާ އޮފީހުން ބުނާ ގޮތުގައި އެ މީހުންގެ ހިސާބުތަކުން، 61،700 މީހަކު ޝަހީދުވި ކަމަށް ދައްކަ އެވެ. އެއީ އެތައް ހާސް ބަޔަކު އިމާރާތްތަކުގެ ދަށުގައި ތާށިވެ އަދިވެސް ނުފެންނައިރު އެ މީހުން މަރުވެފައިވާ ކަމަށް ބެލެވޭތީ އެވެ.