ލޮސް އެންޖެލިސްގެ ނެއިބަހުޑްތައް އަޅިއަށް، އަދިވެސް އަނދަނީ

އެމެރިކާގެ ލޮސް އެންޖެލިސްގައި އަނދަމުންދާ އަލިފާނުގައި ބައެއް ނެއިބަހުޑްތައް އެއްކޮށް އަޅިއަށް ވެފައި ވާއިރު އަދިވެސް ހާލަތު އިތުރަށް ނުރައްކާވެދާނެ ކަމުގެ އިންޒާރު ދީފި އެވެ.

މުއްސަނދިން ގިނަ ޕެސިފިކް ޕެލިސޭޑާއި އުތުރުގެ އަވަށެއް ކަމަށްވާ އަލްޓަޑެނާގެ އެކި ހިސާބުގައި ރޯވެ އަނދަމުން ދާއިރު އެ އަލިފާން އެއްވެސް ވަރަކަށް ކޮންޓްރޯލްނުވާ ކަމަށް އަލިފާން ނިއްވުމުގެ މަސައްކަތުގައި އުޅޭ މީހުން ދަނީ ބުނަމުންނެވެ.

"އަލްޓަޑެނާ މިހާރު އޮތީ އެއްކޮށް ހަލާކުވެފައި،" ގެދޮރު ގެއްލިފައިވާ 1،000 މީހުން ހިޔާވަހިކަން ހޯދަމުން ދިޔަ ތަނަކަށް ޒިޔާރަތް ކުރެއްވި އެ ސަރަހައްދު ތަމްސީލު ކުރައްވާ އެމެރިކާގެ ކޮންގްރެސް މެންބަރު ޖޫޑީ ޗޫ ވިދާޅުވި އެވެ.

"އެ މީހުން ތިބީ ގަބުވެފައި. މި އަލިފާންގަނޑު ކޮންޓްރޯލް ވުމުން އެމީހުން އެނބުރި ދާނީ ކޮން ތާކަށް ކަމެއް ނޭނގޭ،" ލޯކަލް ނިއުސް ކޭޓީއެލްއޭ އަށް ދިން އިންޓަވިއުއެއްގައި ޖޫޑީ ވިދާޅުވި އެވެ.

އަލިފާނުގެ ނުރައްކާ ބޮޑުވުމާ އެކު، އެމެރިކާގެ ހުޅަނގުގެ މެޓްރޮޕޮލިސްގެ 130،000 އަށް ވުރެ ގިނަ މީހުން މީހުން ރައްކާތެރި ހިސާބުތަކަށް ގެންދިއުމުގެ އަމުރެއް ނެރެފައި ވާއިރު މޫސުން ލަފާކުރާ އިދާރާތަކުން ބުނެފައިވަނީ ވަޔާއި ހޫނު ގަދަކަމުން ނުރައްކާ ދާނީ ބޮޑުވަމުން ކަމަށެވެ.

މޫސުމާ ބެހޭ ގައުމީ އިދާރާގެ ބުލެޓިންގައި ބުނެފައި ވަނީ ބުރާސްފަތި ދުވަހާއި ހުކުރު ދުވަހާ ހަމައަށް އަލިފާނުގެ ހާދިސާތައް ވަރަށް ބޮޑަށް އިތުރުވުން އެކަށީގެންވާ ކަމަށެވެ.

މިލިއަން ޑޮލަރުގެ ގެތައް އަޅިއަށް

ގަދަ ވަޔާ އެކު ފެތުރި އަނދަމުންދާ އަލިފާންގަނޑުތަކުގެ ސަބަބުން 2،000 އަށްވުރެ ގިނަ އިމާރާތް ވަނީ އަޅިއަށް ވެފަ އެވެ. އޭގެ ތެރޭގައި ގިނައީ އެތައް މިލިއަން ޑޮލަރެއްގެ ގެތަކެކެވެ.

އެމެރިކާގެ ދެވަނަ އަށް އެންމެ ބޮޑު ސިޓީގެ ވަށައިގެން ރޯވެ އަނދަމުން ދާއިރު އެތަނުގެ އާންމުން ތިބީ ހަދާނެ ގޮތް ހުސްވެ ބިރުވެރިކަމުގެ ތެރޭގަ އެވެ.

ގަޑިއަކު 100 މޭލު (160 ކިލޯމީޓަރު) ގެ ބާރުމިނުގައި ވައި ޖެހެމުން ދިޔައިރު ޕެސިފިކް ޕެލިސޭޑްސް އަވަށުގެ ވަށައިގެން އަލިފާން ގަނޑު ފެތުރުނީ "ވިދުވަރުގެ ބާރުމިނުގަ" އެވެ.

އެތަނުގައި 17،000 އޭކަރު (6،900 ހެކްޓަރު) އަނދާފައިވާއިރު، 1،000 ގެ އާއި ވިޔަފާރިތައް ވަނީ ހަލާކުވެފަ އެވެ. އެ ސިޓީގެ އުތުރުގައި އޮންނަ އަލްޓަޑެނާގެ ވަށައިގެން 10،600 އޭކަރު (4،300 ހެކްޓަރު) ގެ އަލިފާނުގެ ހާދިސާގައި އަނދަމުން ދިޔަ އިރު، އެ ސަރަހައްދުގެ އަވަށްތަކުގެ މަގުތަކުގައި ވެސް ރޯވި އެވެ.

ލޮސް އެންޖެލިސް ކައުންޓީގެ ޝެރިފް ރޮބަޓް ލޫނާ ވިދާޅުވީ އަލިފާނުގެ ސަބަބުން ފަސް މީހަކު މަރުވިކަން މިހާތަނަށް ޔަގީންވެފައިވާ ކަމަށާއި އިތުރު ބަޔަކު މަރުވުމުގެ ބިރު އެބައޮތް ކަމަށެވެ.

ހޮލީވުޑްގެ މަޝްހޫރު ތަރިންނާއި އެތައް މަހުޖަނުންނެއްގެ ގެތައް ހުންނަ ހިސާބުތަކަށް ވެސް ބައެއް އަލިފާންގަނޑުތައް ފެތުރި އެތައް ގެއެއްވެސް ވަނީ އަނދައިފަ އެވެ.