އޭދަފުށި ބަލިކޮށް ގަމުން ޝީލްޑް ދިފާއުކޮށްފި

ރާއްޖޭގެ އެންމެ ބޮޑު ފުޓްސަލް މުބާރާތް ކަމަށްވާ ގޯލްޑަން ފުޓްސަލް ޗެލެންޖް ފެށުމުގެ ގޮތުން ރޭ ކުޅުނު ޗެރިޓީ ޝީލްޑް މެޗުގައި 1-0 އިން ބ. އޭދަފުށި ބަލިކޮށް ލ. ގަމުން ޝީލްޑް ދިފާއުކޮށްފި އެވެ.

ރެހެންދި ފުޓްސަލް ދަނޑުގައި ރޭ ކުޅުނު ކުޅުނު މެޗުގައި ގަމުން ޖެހި ހަމައެކަނި ގޯލު ދެ ވަނަ ހާފުގައި ކާމިޔާބުކޮށްދިނީ އަބްދުﷲ ޖުނެއިދު (ޖެންނޭ) އެވެ.

ގަމުން ރޭގެ މެޗަށް ނުކުތީ އަނިޔާއާ ގުޅިގެން އެ ޓީމުގެ ހުސެއިން ޝަރީފް (އޮންލީ) އާއި އަލީ ޝާމިސް (ތޮއްޕޭ) ނުހިމަނަ އެވެ. ހަމަ އެއާއެކު މިދިޔަ އަހަރު އޭދަފުށިން ޗެމްޕިއަންކަން ނެގި އިރު އެ ޓީމުގައި މުހިއްމު ދައުރެއް އަދާކުރި އަލީ ފާސިރު (ސެންޓޭ) އާއި ހަމްޒާ މުހައްމަދު (ހަމްޕު) އަދި ހައިޝަމް ހަސަން (ބިޑި) މި ފަހަރު ނުކުޅެ އެވެ. އެއީ އެ ކުޅުންތެރިން ފުރަތަމަ ޑިވިޝަނުގައި ފުޓްބޯޅަ ކުޅޭ މާޒިޔާ އިން ރިލީޒް ނުދޭތީ އެވެ.

ގަމުން މިދިޔަ އަހަރު ޝީލްޑް ކާމިޔާބު ކުރީ 3-2 އިން ތ. ތިމަރަފުށި ބަލިކޮށްގެންނެވެ. ނަމަވެސް ގޯލްޑަން ފުޓްސަލް ޗެލެންޖްގެ ފައިނަލްގައި އެ ޓީމު ވަނީ 4-2 އިން އޭދަފުށި އަތުން ބަލިވެފަ އެވެ.

ކުރީ ދެ އަހަރުގެ ޗެމްޕިއަނުންގެ މެދުގައި ކުޅޭ ގޮތަށް ޝީލްޑް މެޗު ކުޅެން ފެށީ 2023 ވަނަ އަހަރެވެ. އެ އަހަރު ކުޅުނު ފުރަތަމަ ޝީލްޑް މެޗުގައި ކ. ގާފަރުން ވަނީ 3-2 އިން ތިމަރަފުށި ބަލިކޮށްފަ އެވެ.

ރޭގެ މެޗުން ގަން ޓީމަށް ލިބުނު 25،000 ރުފިޔާ ވަނީ ޗެރިޓީގެ ގޮތުގައި ފަލަސްތީނުގެ ޣާޒާގެ ރައްޔިތުންނަށް ހަދިޔާ ކޮށްފަ އެވެ.

މިއަހަރުގެ ގޯލްޑަން ފުޓްސަލް ޗެލެންޖްގައި 129 ރަށަކުން ވާދަކުރެ އެވެ. މިރޭ މުބާރާތް ފެށުމަށް ހަމަޖެހިފައި ވަނީ ހއ. އާއި ހދ. އަތޮޅުގެ މެޗުތަކުންނެވެ.