މެދުނުކެނޑި ވާރޭވެހި މުޅި މާލޭގައި ފެންބޮޑުވެއްޖެ، ފުލުހުންނާއި ސިފައިން އެހީތެރިކަން ފޯރުކޮށްދެނީ

މިއަދު ހެނދުނުން ފެށިގެން މެދުނުކެނޑި ވެހެމުންދާ ވާރޭގައި މުޅި މާލޭގައި ފެންބޮޑުވެ، ބައެއް ގެތަކާއި ފިހާރަތަކަށް ފެން ވަނުމުން ފުލުހުންނާއި ސިފައިން އެހީތެރިކަން ފޯރުކޮށްދެމުން އެބަދެ އެވެ.

މަޖީދީ މަގާއި އަމީނީ މަގާ އެކު މާލޭގެ ހުރިހާ މަގެއްގައި ކަހަލަ ގޮތަކަށް ފެންބޮޑުވެ ހިނގާ މީހުންނާއި ދުއްވާ އެއްޗިއްސަށް ވަނީ ދަތިތަކަކާ ކުރިމަތިލާން ޖެހިފަ އެވެ. ވިއްސާރައިގައި އެންމެ ބޮޑަށް ފެންބޮޑުވާ މަގުތަކުގެ ތެރެއިން، ކަނބާއައިސާރަނި ހިނގުމާއި އިއްޒުންދީން މަގުގެ ބައެއް ގެތަކަށް ވަނީ ވަރަށް ބޮޑަށް ފެންވަދެފަ އެވެ.

ފުލުހުންނާއި ސިފައިން އަންނަނީ މާލޭގައި ފެންހިންދައި، އާއްމުންނަށް އެހީތެރިކަން ފޯރުކޮށްދެމުންނެވެ.

ސޯޝަލް މީޑިއާގައި ފުލުހުން ކުރި ޕޯސްޓެއްގައި ބުނީ ގޭގެ އާއި ފިހާރަތަކަށް ފެން ވަނުން ހުއްޓުވަން އެ ތަންތަނުގައި ވެލި ބަސްތާ ޖަހަމުން އަންނަ ކަމަށެވެ. އަދި ފެން ބޮޑުވެފައިވާ ތަންތަނުން ފެން ހިއްކުމުގެ މަސައްކަތް ވެސް ކުރަމުން އަންނަ ކަމަށް ބުންޏެވެ.

ގޭގެއަށް ފެން ވަދެގެން އެހީތެރިކަން ބޭނުންވާ ނަމަ އިމަޖެންސީ ހޮޓްލައިން، 911 އަށް ގުޅަން ފުލުހުން އެދެ އެވެ.

ގުގުރުމާ އެކު ބޯކޮށް ވާރޭވެހި، ފެންބޮޑުވާނެ ކަމަށް ލަފާކޮށް ރާއްޖޭގެ ބޮޑު ސަރަހައްދަކަށް މޫސުމާ ބެހޭ އިދާރާ އިން ހަތަރު ގަޑިއިރަށް އޮތީ އޮރެންޖް އެލާޓް ވެސް ނެރެފަ އެވެ.

މި ވަގުތުތަކުގައި އެ އަތޮޅުގެ ރަށްތަކަށް ގުގުރުމާ އެކު ބޯކޮށް ވާރޭވެހި، ފެންބޮޑުވާނެ ކަމަށް ލަފާކުރެވޭ ކަމަށް މެޓް އޮފީހުން ބުންޏެވެ.

ރާއްޖޭގެ އެކި ހިސާބުތަކަށް ކުރަމުންދާ ވިއްސާރައިގައި، ހަ ރަށަކަށް ގެއްލުން ވެގެން އެންޑީއެމްއޭއަށް މިހާތަނަށް ވަނީ ރިޕޯޓުކޮށްފަ އެވެ. އެ ރަށްރަށުގައި ވެސް ފުލުހުންނާއި ސިފައިން އަދި ކަމާގުޅޭ އިދާރާތަކުން އަންނަނީ މަސައްކަތްކުރަމުންނެވެ.

މި ދުވަސްވަރު ރާއްޖޭގެ ބޮޑު ސަރަހައްދަށް ވަރަށް ބޮޑަށް މޫސުން ގޯހެވެ. މޫސުން ގޯސްވުމުގެ ސަބަބުން ބައެއް ރަށްރަށުގައި ފެންބޮޑުވުމާއި އުދައެރުމުގެ ހާދިސާތައް ވަނީ ހިނގައިފަ އެވެ. އަދި ދަތުރުފަތުރަށް ވެސް ވަނީ ބުރޫއަރައިފަ އެވެ.