ޕުޝްޕާ ރާއްޖެ އައި، ހަމީދާ ބައްދަލުކުރީ ސަން ސިޔާމް އޮޅުވެލީގައި

"ޕުޝްޕާ 2"ގެ މަންޒަރެއްގައި ދައްކަނީ މާލެ އަތޮޅުގައި އޮންނަ ސަން ސިޔާމް އޮޅުވެލި ރިސޯޓުކަން އެނގިއްޖެ އެވެ.

ޕުޝްޕާ ރާއްޖެ އައީ އެ ފިލްމުގައި ހަމީދު ކިޔާ މީހަކާ ބައްދަލުކުރާށެވެ. ހަމީދުގެ ރޯލު އެ ފިލްމުގައި ކުޅެނީ ސޯރަބް ސަޗްދޭވާ އެވެ. ޕުޝްޕާގެ ރޯލު ކުޅެނީ ސައުތު އިންޑިއާގެ މަޝްހޫރު އެކްޓަރު އައްލޫ އަރްޖުން އެވެ.

އޮޅުވެލި ރިސޯޓުގެ އެކައުންޓް ޑިރެކްޓާ އޮފް ސޭލްސް އެންޑް މާކެޓިން ރާކޭޝް ގުޕްތާ މީގެ ދެ ހަފުތާ ކުރިން ލިންކްޑިންގައި ކޮށްފައިވާ ޕޯސްޓެއްގައި ވިދާޅުވީ "ޕުޝްޕާ 2"ގެ މުހިންމު މަންޒަރެއް ނަަގަން ލޮކޭޝަނެއްގެ ގޮތުގައި އެ ރިސޯޓު ހަމަޖައްސާފައި ވާތީ އުފާކުރާ ކަމަށެވެ.

"ޕުޝްޕާ"އަކީ އިންޑިއާގެ ވަކި ހިސާބަކުން ނޫނީ ނުލިބޭ ލަކުޑީގެ ބާވަތެއް ވަގަށް ވިއްކުމުގެ ވިޔަފާރިކުރާ ގޮތް ދައްކައިދޭ ދެކުނު އިންޑިއާގެ މަސާލާ ސްޓައިލުގެ އެކްޝަން ފިލްމެކެވެ.

މިހާރު ސިނަމާތަކުގައި ދައްކަމުން އަންނަ "ޕުޝްޕާ 2"ގައި ހިމެނޭ މަންޒަރެއްގައި ދައްކަނީ އެ ލަކުޑި ގަންނަން ބޭނުންވާ އެ ގައުމުން ބޭރުގެ މުއްސަނދި މީހަކަށް މި ވިއްކުމަށް ސިއްރު ޑީލެއް ހެދުމަށް ޕުޝްޕާ ރާއްޖެ އައިސް އުޅޭ ތަނެވެ. ހަމީދު ކިޔާ އެ މީހާ ހެލިކޮޕްޓަރެއްގައި އައިސް އެ ރިސޯޓުގެ ގޮނޑުދޮށަށް ފައިބާތަން އެ މަންޒަރުގައި ދައްކަ އެވެ. މި ބާވަތުގެ ލަކުޑި ވިއްކަން 5،000 ކްރޯޑް ރުޕީސްގެ ޑީލެއް އެމީހުން ހަދަ އެވެ.

އެ ހެލިކޮޕްޓަރު ދަތުރުކުރާ އިރު، އެ ރިސޯޓުގެ މަތިން ނަގާފައިވާ ޑްރޯން މަންޒަރުތައް ވެސް ދައްކަ އެވެ.

ބައެއް ނޫސްތަކުން ކުރިން ރިޕޯޓްކޮށްފައިވާ ގޮތުގައި، މި ފިލްމުގެ މަންޒަރުތައް މެލޭޝިއާ އާއި ޖަޕާނާއި ތައިލެންޑާ އަދިވެސް އެހެން ބައެއް ގައުމުތަކުގައި ނަގަން ޕްލޭންކުރި އެވެ. އެކަމަކު ބަޖެޓު ތަން ނުދިނުމުގެ ސަބަބުން އެ މަންޒަރުތައް ނެގީ ހެއިދަރުއާބާދުގައި ހުންނަ ރަމޯޖީ ފިލްމު ސިޓީގެ ސްޓޫޑިއޯތަކުގައި ބޮޑެތި ސެޓުތައް ހަދައިގެންނެވެ. ފިލްމުގެ ހުރިހާ މަންޒަރެއް ވެސް ނެގީ އިންޑިއާގެ އެކި ހިސާބުތަކުގައި ކަމަށް ރިޕޯޓްކޮށްފައިވެ އެވެ. އެހެންވެ، ރާއްޖޭގެ މި މަންޒަރު ވެސް ނެގީ އަސްލު ލޮކޭޝަނެއް ބޭނުންކޮށްގެން ސެޓެއްގައި ކަމަށް ވުމުގެ ފުރުސަތު އެބައޮތެވެ.

"ޕުޝްޕާ 2"ގެ އުފެއްދުންތެރިން ކުރިން ބުނެފައިވާ ގޮތުގައި، އެ ފިލްމުގެ ނިމުން އެކި ގޮތްގޮތަށް އެކި ތަންތަނުގައި ޝޫޓްކޮށްފައިވެ އެވެ. އެކަމަކު، ފިލްމުގައި ހިމެނީ އުފެއްދުންތެރިން ބޭނުންވި ނިމުމެވެ. އެއީ ފިލްމުގެ ނިމުން ސްޕޮއިލްވުމާއި ލީކުވުމުގެ ފުރުސަތު ކުޑަކުރުމުގެ ގޮތުން ކުރި ކަމެކެވެ.

ގާތްގަނޑަކަށް 500 ކްރޯޑް ރުޕީސް (58.5 މިލިއަން ޑޮލަރު)ގެ ބަޖެޓަކުން ހެދި މި ފިލްމަށް ދުނިޔޭގެ ބޮކްސް އޮފީހުގައި މިހާތަނަށް ވަނީ 1720 ކްރޯޑް ރުޕީސް (201 މިލިއަން ޑޮލަރު)ގެ ބޮޑު އާމްދަނީއެއް ލިބިފަ އެވެ.