ފުވައްމަލުކާއި އައްޑުއާ ދެމެދުގެ ކަނޑު ވަރަށް ގަދަ

ފުވައްމަލުކާއި އައްޑުއާ ދެމެދުގެ ކަނޑު ގަދަވުމުން މެޓް އޮފީހުން މިއަދު އެ ސަރަހައްދަށް ދެވަނަ ފަހަރަށް ޔެލޯ އެލާޓް ނެރެފި އެވެ.

ރާއްޖޭގެ މޫސުމާ ބެހޭ އިދާރާ، މެޓް އޮފީހުން އެ ސަރަހައްދަށް މިއަދު އެންމެ ފުރަތަމަ ޔެލޯ އެލާޓް ނެރުނީ މެންދުރުފަހު 3:00 އިން ރޭގަނޑު 7:00 އަށެވެ. އަދި މިހާރު ވަނީ މިރޭ 11:00 އާ ހަމައަށް އެ އެލާޓް ދަންމާލައިފަ އެވެ.

މެޓް އޮފީހުން ބުނީ އެ ސަރަހައްދަށް ގަޑިއަކު 25 މޭލާއި 30 މޭލާ ދެމެދުގެ ބާރުމިނުގައި ވައިޖެހި، ކަނޑު ވަރަށް ގަދަވާނެ ކަމަށް ލަފާކުރެވޭ ކަމަށެވެ. ވިލާގަނޑުގައި ގަޑިއަކު 50 މޭލަށް ވައިބާރުވުން އެކަށީގެންވާ ކަމަށް ވެސް އެ އޮފީހުން ބުންޏެވެ.

ރާއްޖޭގެ ބޮޑު ސަރަހައްދަކަށް މިރޭ މޫސުން ވަރަށް ގޯސްވާނެ ކަމަށް ވެސް މެޓް އޮފީހުން ވަނީ ލަފާކޮށްފަ އެވެ. ރާއްޖޭގެ ހުރިހާ ހިސާބެއްގެ ކަނޑުތައް ވެސް އާންމު ގޮތެއްގައި ގަދަވާނެ ކަމަށް އެ އޮފީހުން ލަފާކުރެ އެވެ. އަދި، ބޯކޮށް ވާރޭވެހި، ގުގުރާނެ ކަމަށް ލަފާކޮށް މިރޭ 12:00 އާ ހަމައަށް ވަނީ ބ. އަތޮޅުން ފެށިގެން ގދ. އަތޮޅާ ހަމައަށް ވައިޓް އެލާޓް ވެސް ނެރެފަ އެވެ.

ރާއްޖެއަށް މިހާރު މި ކުރާ ވިއްސާރައަކީ މޫސުން ބަދަލުވާ ދުވަސްވަރާ ދިމާކޮށް މި ސަރަހައްދުގައި އުފެދިފައިވާ ދެ ކޮޅިގަނޑު ސަބަބުން ކުރާ އަސަރެވެ. މެޓް އޮފީހުން ލަފާކުރާ ގޮތުގައި، އަންނަ ހޯމަ ދުވަހުގެ ނިޔަލަށް ރާއްޖެއަށް މޫސުން ގޯސްވާނެ އެވެ.

މިއީ ކަނޑު ގަދަ ދުވަސްވަރަކަށް ވާތީ ކަނޑުދަތުރުފަތުރު ކުރާ މީހުން މޫސުމަށް ހާއްސަ ސަމާލުކަމެއް ދިނުމަށް ކަމާ ބެހޭ އިދާރާތަކުން ވަނީ އިލްތިމާސްކޮށްފަ އެވެ.

އާންމު ގޮތެއްގައި މި ދުވަސްވަރަކީ ރާއްޖެއަށް ހުޅަނގު މޫސުން ނިމި، އިރުވައި މޫސުން ފެށުމުގެ އަސަރުތައް ފެންނަން ފަށާ ދުވަސްވަރެވެ. ނުވަތަ ދެ މޫސުން ބެދޭ ދުވަސްވަރެވެ. އިރުވައި މޫސުން ފަށަން ހަޅަޖަހަން ފަށާނީ މި މަހު ފަހުކޮޅު އެވެ.

ރާއްޖެއަށް އިރުވައި މޫސުން އާންމު ގޮތެއް ފެށެނީ ޖެނުއަރީގަ އެވެ.