ޕީއެސްއެމް އިން ބޭއަދަބީ މަންޒަރުތަކެއް؛ މާފަށް އެދި ދެ މުވައްޒަފަކު ސަސްޕެންޑްކޮށްފި

ޕީއެސްއެމް ނިއުސް އިން ގެނެސްދިން ހަބަރެއްގައި ބޭއަދަބީ މަންޒަރުތަކެއް ހިމެނިފައިވާތީ، އެކަމަށް މާފަށް އެދި އެ މައްސަލައިގައޮ ދެ މުވައްޒަފަކު ސަސްޕެންޑްކޮށްފި އެވެ.

ބޭއަދަބީ މަންޒަރުތަކެއް ދެއްކީ ޕީއެސްއެމް ނިއުސްއިން މިދިޔަ އަންގާރަ ދުވަހުގެ ރޭ ގެނެސްދިން އިނގިރޭސި ހަބަރުގަ އެވެ.

ޕީއެސްއެމް އިން މިރޭ ނެރުނު ބަޔާނެއްގައި ބުނީ ބޭއަދަބީ މަންޒަރުތަކެއް ދެއްކިފައިވާތީ ރައްޔިތުންގެ ކިބައިން މާފަށް އެދޭ ކަމަށާއި އެކަމަކީ އެ ކުންފުނީގެ ކޮންޓެންޓް އަދި އެޑިޓޯރިއަލް ޕޮލިސީއާ ހިލާފު ސީރިއަސް މައްސަލައެއް ކަމަށެވެ.

"މިކަމުގައި ޝާމިލުވާ ފަރާތްތަކާ މެދު ކުންފުނީގެ ފަރާތުން އަޅަން ޖެހޭ އެންމެ ހަރުކަށި ފިޔަވަޅު އަޅާނެ ވާހަކަ ދަންނަވަން،" ޕީއެސްއެމްއިން ބުންޏެވެ.

އެ ކުންފުނިން ބުނި ގޮތުގައި އިހުމާލުވި ދެ މުވައްޒަފަކު މިހާރު ވަނީ ސަސްޕެންޑްކޮށްފަ އެވެ. އަދި އެ ދެ މުވައްޒަފުންގެ މައްސަލަ ބަލާ ކޮމިޓީއަށް ފޮނުވައި، އެކިއެކި ޑިޕާޓްމެންޓްތަކުގެ އެސްއޯޕީތައް އިސްލާހުކޮށް އެކަން ތަކުރާރު ނުވާނެ ގޮތަށް ކަންކަން ތަރުތީބު ކުރަމުންދާ ކަމަށް ޕީއެސްއެމް އިން ބުންޏެވެ.

މިދިޔަ ބުރާސްފަތި ދުވަހު ވެސް ޕީއެސްއެމްގެ މެނޭޖްމެންޓުން ވަނީ މާފަށް އެދިފަ އެވެ. އެއީ ޖަލްސާއެއް ލައިވްކޮށް ދެއްކި އިރު ގުރުއާނުގެ އާޔަތަކުން ތަންކޮޅެއް އުނިވާ ގޮތަށް ދެއްކިފައިވާތީ އެވެ.

އެކަން ހިނގީ އެ ވަގުތު ކޮންޓްރޯލް ރޫމްގައި ތިބި މުވައްޒަފުންގެ އިހުމާލުން ކަމަށާއި އެހެންވެ އެ މުވައްޒަފުން މަސައްކަތުން އެކަހެރި ކޮށްފައިވާ ކަމަށް ޕީއެސްއެމް އިން ވަނީ ބުނެފަ އެވެ.