އެސްއޯއީތަކަށް ނުލިބި ހުރި ފައިސާގެ ތަފްސީލު މަޖިލީހުން ހޯދަނީ

ސަރުކާރު ހިއްސާވާ ހުރިހާ ކުންފުނިތަކަށް ނުލިބި ހުރި ފައިސާތަކުގެ ތަފްސީލު ހޯދަން ރައްޔިތުންގެ މަޖިލީހުގެ މާލިއްޔަތު ކޮމިޓީން ނިންމައިފި އެވެ.

އިއްޔެ ބޭއްވި މާލިއްޔަތު ކޮމިޓީގެ ބައްދަލުވުމުގައި އެގޮތަށް ކޮމިޓީން ނިންމީ ފުނަދޫ ދާއިރާގެ މެންބަރު މުހައްމަދު މަމްދޫހު އެގޮތަށް ހުށަހެޅުއްވުމުންނެވެ. އެކަމަށް ތާއީދު ކުރެއްވީ ހިތަދޫ މެދު ދާއިރާގެ މެންބަރު އަހުމަދު އަޒާނެވެ.

ސަރުކާރު ހިއްސާވާ ހުރިހާ ކުންފުންޏަކަށް އެކި ފަރާތްތައް މެދުވެރިކޮށް ނުލިބި ހުރި ފައިސާގެ ތަފްސީލުތައް ހޯދަން މާލިއްޔަތު ކޮމިޓީން މަސައްކަތް ފެށިއިރު، އެޗްޑީސީއަށް ނުލިބި 1.2 ބިލިއަން ރުފިޔާ އޮތް މައްސަލައާ ގުޅިގެން އިއްޔެ މާލިއްޔަތު ކޮމިޓީން ވަނީ މަޝްވަރާކޮށްފަ އެވެ. އޭގެ ތެރެއިން އަމިއްލަ ކުންފުނިތަކުން އެޗްޑީސީއަށް ދޭންޖެހޭ 900 މިލިއަން ރުފިޔާ އެބަހުއްޓެވެ.

ސަރުކާރު ހިއްސާވާ ކުންފުނިތަކަށް މިދިޔަ އަހަރު 6.4 ބިލިއަން ރުފިޔާގެ ފައިދާއެއް ލިބުނުއިރު، އެ ފައިދާގެ ބޮޑު ބައެއް ނިސްބަތްވަނީ އެންމެ ފަސް ކުންފުންޏަށެވެ.

ސަރުކާރު ހިއްސާވާ 30 ކުންފުނި ހިންގާއިރު އޭގެ ތެރެއިން މިދިޔަ އަހަރު ފައިދާ ނެރެވުނީ 15 ކުންފުންޏަކުންނެވެ. ބާކީ 15 ކުންފުންޏަކުން ވީ ގެއްލުމެވެ. ކުންފުނިތަކަށް ލިބުނު ގެއްލުމުގެ އަދަދު ވަނީ 660 މިލިއަން ރުފިޔާ އަށް އަރައިފަ އެެވެ.

މިދިޔަ އަހަރު އެންމެ ބޮޑު ގެއްލުމެއް ކުރިމަތިވީ އާރުޑީސީ އާއި ރީޖަނަލް އެއާޕޯޓްސް އާއި އައްޑޫ އެއާޕޯޓު ކުންފުންޏާއި އައިލެންޑް އޭވިއޭޝަނާޢި ޕީއެސްއެމާއި ހައްޖު ކޯޕަރޭޝަން އަދި ފަހި ދިރިއުޅުން ކޯޕަރޭޝަނަށެވެ.