ރެކްރިއޭޝަން ކްލަބްގެ ފައިސާއަށް ހިޔާނަތްތެރިވި މައްސަލައެއްގައި އޭސީސީގެ އިސް އޮފިޝަލަކު ސަސްޕެންޑު

މިލިއަނެއްހާ ރުފިޔާގެ ހިޔާނާތުގެ ތުހުމަތުގައި އެންޓި ކޮރަޕްޝަން ކޮމިޝަން (އޭސީސީ) ގެ ޑެޕިއުޓީ ޑިރެކްޓަ ހަސަން މަނިކު ސަސްޕެންޑުކޮށްފި އެވެ.

އެނގިފައިވާ ގޮތުގައި، ހިޔާނާތުގެ މައްސަލަތައް ބަލާ ކޮމިޝަންގެ ރެކްރިއޭޝަން ކްލަބްގެ ފައިސާ އަށް ހިޔާނަތްތެރިވި މައްސަލައިގައި އެ ތަނުގެ މެމްބަރުންގެ ބިއުރޯގެ ހެޑް ހަސަން މިިދިޔަ ހަފުތާގައި ސްޕެންޑުކޮށް، އެ ކޮމިޝަނުން އަންނަނީ މައްސަލަ ތަހުގީގު ކުރަމުންނެވެ.

އޭނާއަކީ ރެކްރިއޭޝަން ކްލަބްގެ މިހާރުގެ ރައީސް ވެސް މެ އެވެ. މިއީ، އޭނާ އެ މަގާމު އަދާކުރާ ދެ ވަނަ އަހަރެވެ.

އޭސީސީން ނެރުނު ބަޔާނެއްގައިވަނީ އޭނާ ސަސްޕެންޑްކުރީ ރެކްރިއޭޝަން ކްލަބްގެ މާލީ ހިސާބުތައް އޮޑިޓް ކުރުމުގައި ފާހަގަވި މައްސަލަތަކަކާ ގުޅިގެން އެ ކްލަބްގެ ހިންގާ ކޮމެޓީން އެ ކޮމިޝަންގެ ސަމާލު ކަމަށް އެ މައްސަލަ ގެނައުމުން ކަމަށެވެ. އަދި އެ ކްލަބަކީ އޭސީސީއާ މާލީ ގޮތުން ވަކިން އަދި މެމްބަރުންގެ އަތުން ފައިސާ ނަގައިގެން ހިންގަމުންދާ ވަކި ޝަހްސެއް ކަމަށާއި އަދި އެ މައްސަލަ ފެންމަތިވުމުން އެކަން ފުލުހުންގެ ސަމާލު ކަމަށް ވެސް ގެނެސްފައިވާނެ ކަމަށް އެ ބަޔާނުގައިވެ އެވެ.

ކްލަބު ހިންގަން ކޮންމެ މަހަކު ވެސް މުވައްޒަފުން 175ރ. ދެ އެވެ. އޭގެ އިތުރުން އޮފީސް ތެރޭގައި ހިންގާ ކެންޓީނުން ލިބޭ ފައިސާ ވެސް ވަންނަނީ ރެކްރިއޭޝަން ކްލަބުގެ އެކައުންޓަށެވެ.

މިކަމުގެ މައުލޫމާތު އެނގޭ މީހަކު ބުނީ އޭސީސީގެ މުވައްޒަފެއްގެ ބޯންމެރޯ ހަދަން މީގެ 3-4 މަސް ކުރިން އެހެން މުވައްޒަފުން އެއްކުރި ފައިސާ ވެސް ވީނުވީއެއް ނޭނގޭ ކަމަށެވެ.

"ގާޒާ ފަންޑަށް ދޭން އެއްކުރި ފައިސާގެ ބައެއް ވެސް ބޭނުންކޮށްފައި ހުރީ. މިހާތަނަށް ކުރި އޮޑިޓުން ނުވަ ލައްކަ އަށް ވުރެ ގިނަ ރުފިޔާ މަދުކަން ވަނީ ފާހަގަ ކުރެވިފައި،" އޭނާ ބުންޏެވެ.

އޭސީސީގައި 2007 ވަނަ އަހަރުން ފެށިގެން މަސައްކަތް ކުރައްވަމުން ގެންދަވާ ހަސަނަކީ އެ ކޮމިޝަންގެ ފަރާތުން މީޑިއާ އަށް ވެސް މައުލޫމާތު ދެއްވާ އޮފިޝަލެވެ.