ދިރާގު ޕްރޮމޯޝަނުގައި ދޭ ލޯންޗު ބަންނަނީ

ދިރާގުން މިހާރު ކުރިއަށް ގެންދާ "ވިން އަ ސްޕީޑްބޯޓު" ޕްރޮމޯޝަނުގައި ދޭން ހަމަޖެހިފައިވާ، އަލް ޝާލީ މެރިންގެ "މަޖެލަން 32" ބޯޓު ބަނުމުގެ މަސައްކަތް ފަށައިފި އެވެ.

ދިރާގުގެ އަހަރީ ދުވަހުގެ މުނާސަބަތުގައި ފެށި މި ޕްރޮމޯޝަނުގައި ދެނީ 12 މީހުންގެ ޖާގައިގެ، 32 ފޫޓުގެ ލޯންޗެކެވެ. މި ލޯންޗުގައި ޔަމަހާގެ 175 ހޯސްޕަވަރުގެ ދެ އިންޖީނު އަޅާނެ އެވެ.

ބޯޓު ބަނުމުގެ މަސައްކަތްތައް ކުރާ އަލްޝާލީ މެރިން މޯލްޑިވްސްގެ ޖެނެރަލް މެނޭޖަރު އިސްމާއިލް ޝަރީފު ވިދާޅުވީ ބޯޓުގެ މަސައްކަތްތަކުގެ ބޮޑު ބައެއް ނިމިފައިވާ ކަމަށެވެ.

"މި ހައި ސްޕީޑް ލޯންޗު ވެގެން ދާނީ އަލް ޝާލީ މެރިން އިން އަބަދު ވެސް ދިވެހިންނަށް ގެނެސްދެމުން އަންނަ އުފެއްދުންތެރިކަމުގެ ލާމަސީލު މިސާލަކަށް،" އޭނާ ވިދާޅުވި އެވެ.

އަލްޝާލީ މެރިންއިން ބަންނަ މަޖެލަން 32 ބޯޓަކީ އަރާމު ޑެކަކާއި، ހިތްފަސޭހަ ކެބިންއަކާއި ބަދިގެއެއް ވެސް ހިމެނޭ ގޮތަށް ބަންނަ ލޯންޗެކެވެ. މިއީ ދުއްވާލާއި ޕިކްނިކް ދަތުރު ދިޔުމަށް ނުވަތަ މަސް ދަތުރު ދިއުމަށް ދިއުމަށް ކަމުދާނެ ބޯޓެއް ކަމަށް ދިރާގުން ބުނެ އެވެ.

ދިރާގުގެ "ވިން އަ ސްޕީޑް ބޯޓު" ޕްރޮމޯޝަނުގައި ބައިވެރިވެވޭނީ ދިރާގުގެ 400ރ. އިން މަތީގެ ޕޯސްޓްޕެއިޑް ޕެކޭޖު ގެންގުޅޭ ކަސްޓަމަރުންނާއި ފައިބާ 40އެމް ޕެކޭޖުން މަތީގެ ޕެކޭޖުތައް ގެންގުޅޭ ކަސްޓަމަރުންނަށާއި 400ރ. އިން މަތިން ރީޗާޖުކުރާ ޕްރީޕެއިޑް ކަސްޓަމަރުންނަށެވެ. އަލަށް އެ ނެޓްވޯކާ ގުޅި މި އަގުތަކުން މަތީގެ ޕެކޭޖުތައް ނަގާ ކަސްޓަމަރުންނަށް ވެސް ޕްރޮމޯޝަނުގައި ބައިވެރިވެވޭނެ އެވެ. ޕްރޮމޯޝަނުގައި ބައިވެރިވާން ޝަރުތު ހަމަވާ ކަސްޓަމަރުންނަށް ޕްރޮމޯޝަނުގައި ބައިވެރިވެވޭނީ "ވިން އަ ސްޕީޑް ބޯޓް" ޕޯޓަލްއިން ޕްރޮމޯޝަނަށް އެންރޯލް ކޮށްގެންނެވެ.

"ވިން އަ ސްޕީޑް ބޯޓް" ޕްރޮމޯޝަން ކުރިއަށް ދާނީ ޑިސެމްބަރު މަހުގެ 16 ވަނަ ދުވަހުގެ ނިޔަލަށެވެ.