ދިރާގު ރޯޑް ރޭހުން ޖަމްއިއްޔާތަކަށް ހަ ލައްކައަށް ވުރެ ގިނަ ރުފިޔާ!

ދިރާގު މޯލްޑިވްސް ރޯޑް ރޭހުން، ކުޑަކުދިންގެ ރައްކާތެރި ކަމަށް މަސައްކަތްކުރާ 12 ޖަމްއިއްޔާއަކަށް ޖުމްލަ 680،850ރ. ހަދިޔާކޮށްފި އެވެ.

މިދިޔަ އޮކްޓޯބަރު މަހުގެ 25 ވަނަ ދުވަހު ބޭއްވި ދިރާގު މޯލްޑިވްސް ރޯޑް ރޭހަކީ އެހެން އަހަރުތަކެކޭ އެއްފަދައިން ކުޑަކުދިންގެ ހައްގުތައް ރައްކާތެރި ކުރުމަށް ހާއްސަކުރި ދުވުމެކެވެ. މިއަހަރުގެ ރޯޑު ރޭހަށް ވެސް ދިރާގުން ވަނީ އެއްބައިވަންތަ މާހައުލެއް ބިނާކުރުމަށާއި ކުޑަކުދިންގެ ރައްކާތެރި ކަމަށާއި އަނިޔާއިން ކުޑަކުދިން ހިމާޔަތް ކުރުމުގެ އިތުރުން ކުދިންގެ ދުޅަހެޔޮ ކަމަށް ހޭލުންތެރިކަން އިތުރުކުރަން މަސައްކަތް ކުރާ 12 އެންޖީއޯއަކާ ވަނީ ޕާޓްނާވެފަ އެވެ.

އެ ދުވުމުގައި، ކުޑަކުދިންގެ ރައްކާތެރި ކަމަށް މަސައްކަތްކުރާ އެންޖީއޯތަކަށް އާންމުން ހޭލުންތެރި ކުރުވުމަށާއި ފަންޑްރެއިޒް ކުރުމުގެ ފުރުސަތު ފޯރުކޮށްދިނެވެ.

މި ރޭހުގައި ބައިވެރިވި ކޮންމެ ދުވުންތެރިއަކު ވެސް ރޭހަށް ރަޖިސްޓްރީ ކުރިއިރު، ދުވުމަށް ޕާޓްނާވި އެންޖީއޯތަކުގެ ތެރެއިން އެއް އެންޖީއޯ ނޮމިނޭޓްކުރުމުގެ ފުރުސަތު ދިނެވެ. ބައިވެރިންގެ ފަރާތުން އެންމެ ގިނައިން ނޮމިނޭޝަން ލިބުނު ފަސް އެންޖީއޯއަށް ޖުމުލަ 200،000 ރުފިޔާގެ ހާއްސަ ޑޮނޭޝަންއެއް ވަނީ ދީފަ އެވެ. އަދި މި ރޭހުގެ ކޮންމެ ރަޖިސްޓްރޭޝަން ކިޓަކުން 100 ރުފިޔާއާއި ރީތި ބިބް ނަންބަރު ވިއްކައިގެން ލިބުނު ފައިސާއިން ޖުމްލަ 480.850 ރުފިޔާ ވަނީ ރޯޑް ރޭހުގެ ހުރިހާ ޕާޓްނާ އެންޖީއޯތަކަށް ހަދިޔާކޮށްފަ އެވެ.

ދިރާގުން ބުނީ ރޯޑް ރޭހުން ފޯރުކޮށްދިން އެހީގެ ސަބަބުން އެ ޖަމިއްޔާތަކުގެ ޕްރޮގްރާމްތައް ފެށުމަށް މަގުފަހިވެ، ރާއްޖޭގެ އެކި ކަންކޮޅުތަކުގައި ކުޑަކުދިން ހިމާޔަތް ކުރުމަށް ކުރާ މުހިންމު މަސައްކަތްތައް ފެށުމަށް ހިތްވަރު ލިބިގެންދާނެ ކަމަށެވެ.

ދިރާގު ރޯޑް ރޭހުގެ ނޮމިނޭޝަން ލިބުނު ފަސް އެންޖީއޯގެ ތެރެއިން ކޮންމެ އެންޖީއޯއަކަށް ވެސް 80،071 ރުފިޔާ ވަނީ ހަދިޔާކޮށްފަ އެވެ. އެއީ:

1. ކެންސާ ސޮސައިޓީ އޮފް މޯލްޑިވްސް

2. މޯލްޑިވްސް އޯޓިޒަމް އެސޯސިއޭޝަން

3. އާކް - އެޑްވޮކޭޓިންގް ދަ ރައިޓްސް އޮފް ޗިލްޑްރަން

4. މޯލްޑިވްސް ތެލެސީމިއާ ސޮސައިޓީ

5. ޗައިލްޑް އެބިއުސް ޕްރިވެންޝަން ސޮސައިޓީ

މި ރޭހުގައި އެންޑޯސްކޮށްފައިވާ އަނެއް ހަތް އެންޖީއޯތަކުގެ ތެރެއިން ކޮންމެ އެންޖީއޯއަކަށް ދިރާގުން ވަނީ 40،071 ރުފިޔާ ހަދިޔާކޮށްފަ އެވެ. އެއީ:

1. ޓައިނީ ހަރޓްސް އޮފް މޯލްޑިވްސް

2. ބްލައިންޑް އެންޑް ވިޝުއަލް އިމްޕެއާޑް ސޮސައިޓީ އޮފް މޯލްޑިވްސް

3. ކެއާ ސޮސައިޓީ

4. މޮމްސް އެއިޑް

5. ސޮސައިޓީ ފޯ ހެލްތް އެޑިއުކޭޝަން (ޝީ)

6. މޯލްޑިވްސް އެސޯސިއޭޝަން އޮފް ޕަރސަންސް ވިތް ޑިސްއެބިލިޓީސް

7. ޑައިބެޓީސް ސޮސައިޓީ އޮފް މޯލްޑިވްސް

ދިރާގު މޯލްޑިވްސް ރޯޑް ރޭހަކީ ރާއްޖޭގައި ބާއްވާ ފުރަތަމަ އަދި ހަމައެކަނި ބައިނަލްއަގުވާމީ ދުވުމެވެ. އަދި މިއީ ވޯލްޑް އެތުލެޓިކްސް ސެޓިފައިޑް ރޭސް ރޫޓަކާއެކު އެސޯސިއޭޝަން އޮފް އިންޓަނޭޝަނަލް މެރަތަންސް އެންޑް ޑިސްޓަންސް ރޭސަސް (އެއިމްސް) ވޯލްޑް ރަނިން ކަލަންޑަރުގައި ލިސްޓުކޮށްފައިވާ ދުވުމެކެވެ.

ދިރާގުގެ އަންނަ އަހަރުގެ ރޯޑް ރޭސް ބާއްވާނީ އޮކްޓޯބަރު 24 ވަނަ ދުވަހު އެވެ.