އެއް ދުވަސް ތެރޭ އިމިގްރޭޝަނުން 1،069 ވޯކް ވިސާ ދޫކޮށްފި

އިއްޔެއަކީ އެއް ދުވަސްތެރޭ އެންމެ ގިނައިން ބިދޭސީންނަށް ދޫކުރާ ވޯކް ވިސާ ދިން ދުވަސް ކަމަށް އިމިގްރޭޝަނުން ބުނެފި އެވެ.

އިމިގްރޭޝަނުން ބުނީ ގަވާއިދާ ހިލާފަށް ރާއްޖޭގައި އުޅޭ ބިދޭސީންގެ މައްސަލަ ހައްލުކުރަން ކަމާ ގުޅުން ހުރި އިދާރާތަކުން ކުރަމުން އަންނަ މަސައްކަތުގައި ގަވާއިދާ އެއްގޮތަށް ބިދޭސީންގެ ވިސާގެ ކަންކަން ފުރިހަމަ ކުރާ މިންވަރު ވަރަށް ބޮޑަށް އިތުރުވެފައިވާ ކަމަށެވެ.

އިމިގްރޭޝަނުން ބުނީ އެއްދުވަހުން އެންމެ ގިނައިން ވޯކްވިސާ ދޫކުރީ އިއްޔެ ކަމަށެވެ. އެއީ ޖުމްލަ 1069 ވޯކް ވިސާ އެވެ.

ވިސާ ހޯދަން އަންނަ މީހުންގެ ޝަކުވާތަކަށް ހައްލު ހޯދުމުގެ ގޮތުން އިމިގްރޭޝަނުން ވަނީ އޮންލައިންކޮށް "އޭންޓް ކިޔޫ" އެޕްލިކޭޝަން މެދުވެރިކޮށް ކިއު ނަންބަރު ދޫކުރަން މިދިޔަ މޭ މަހު ފަށައިފަ އެވެ.

ވޯކް ވިސާ ޖެހި ޕާސްޕޯޓު ދޫކުރާ ގަޑިތައް

- ފަހެއް ނުވަތަ އެއަށް ވުރެ މަދު ޕާސްޕޯޓާ ހަވާލުވާ ފަރާތްތަކުން ނަންބަރު ނަންގަވާނީ، ހެނދުނު 9:00 އިން 10:30 އާ ދެމެދުގައި. އެ ނަންބަރުތަކަށް ހިދުމަތް ދޭނީ ހެނދުނު 10:00 އިން މެންދުރު ފަހު 3:00 އަށް

- ހައެއް ނުވަތަ އެއަށް ވުރެ ގިނަ ޕާސްޕޯޓާއި ހަވާލުވާ ފަރާތްތަކުން ނަންބަރު ނަންގަވާނީ މެންދުރު 11:30 އިން 12:30 އާ ދެމެދުގައި. އެ ނަންބަރުތަކަށް ހިދުމަތް ދިނުމަށް ހަމަޖެހިފައި ވަނީ މެންދުރު ފަހު 1:15 އިން 3:00 އަށް

މި ސަރުކާރު ވެރިކަމަށް އައިސް އެންމެ އިސްކަންދީފައިވާ އެއް ކަމަކީ ރާއްޖޭގައި ގަވާއިދާ ހިލާފަށް އުޅޭ ބިދޭސީންގެ މައްސަލަ ހައްލު ކުރުމެވެ. ރާއްޖޭގައި ގަވައިދާ ޚިލާފަށް އުޅެމުން ދިޔަ 4،000 އަށް ވުރެ ގިނަ ބިދޭސީން ވޭތުވެދިޔަ 10 މަސް ތެރޭ ޑީޕޯޓް ކޮށްފައިވާއިރު، ގަވާއިދާ ހިލާފަށް ވިޔަފާރި ހިންގާ ބިދޭސީން ހޯދުމުގެ ރެއިޑް އޮޕަރޭޝަންތައް ވެސް އަންނަނީ ހިންގަމުންނެވެ.