ނިންމުން ބަދަލުކޮށް، މުރައިދޫގޭ ހުރިހާ މުވައްޒަފުންގެ ތަފުސީލް ހާމަކުރަން ކޮމިޓީން ފާސްކޮށްފި

ރައްޔިތުންގެ މަޖިލީހުގެ ސަލާމަތީ ހިދުމަތްތަކާ ބެހޭ ކޮމިޓީން މިއަދު ނިންމި ނިންމުން ބަދަލުކޮށް، ރައްޔިތުންގެ މަޖިލީހުގެ ރައީސްގެ ރަސްމީ ގެކޮޅު މ. މުރައިދޫގޭ މުވައްޒަފުންނާ ގުޅުން ހުރި ރަސްމީ މައުލޫމާތުތައް ހާމަކުރަން އެ ކޮމިޓީން އެންމެ ފަހުން ފާސްކޮށްފި އެވެ.

މުރައިދޫގޭ މުވައްޒަފުންގެ އަދަދާއި އެ މީހުންގެ މުސާރައިގެ ތަފުސީލް ހޯދަން މިދިޔަ ޖުލައި މަހު އެދުނީ "މިހާރު" ގެ ނޫސްވެރިޔާ އާސިމާ ނިޒާރެވެ.

އެނގިފައިވާ ގޮތުގައި އެ މައްސަލާގައި ކޮމިޓީގެ މިއަދުގެ ހެނދުނުގެ ނިންމުން ބަދަލު ކުރަން ނިންމީ ސަރުކާރު ހިންގާ ޕާޓީ ޕީއެންސީގެ މެމްބަރުންގެ ކިބައިން ރައީސް ޑރ. މުހައްމަދު މުއިއްޒު އެގޮތަށް އެދިވަޑައިގަތުމުންނެވެ.

ނަމަވެސް މިއަދު ހަވީރު 4:00 ގައި ބޭއްވި ބައްދަލުވުމުގައި މުގައްރިރު އަހުމަދު ސަލީމް (ރެޑްވޭވް ސަލީމް) ވިދާޅުވީ ހެނދުނު ނިންމި ނިންމުން މުރާޖައާ ކުރަން ނިންމީ، އެކަން ކުރަން މުގައްރިރަށް ފެނިވަޑައިގަތުމުން ކަމަށެވެ. އެކަމަކު، އޭނާ އެހެން ވިދާޅުވިޔަސް ބެލެވޭ ގޮތުގައި ކުއްލި ގޮތަކަށް ކޮމިޓީ ބާއްވައި ނިންމުން ބަދަލުކުރީ ސީދާ ރައީސް މުއިއްޒުގެ އެދިވަޑައިގަތުމަކަށެވެ.

ހެނދުނުގެ ދަންފަޅިއާ ހިލާފަށް އެއްވެސް ކަމެއް ސިއްރު ކުރުމެއް ނެތި ހުޅުވާލައިގެން ހަވީރު ބޭއްވި ބައްދަލުވުމުގައި، މަޖިލިހުން އެ ކޮމިޓީ އަށް ފޮނުވާފައިވާ ސިޓީ ވެސް އާންމުކުރި އެވެ. އެ ސިޓީގައި މަޖިލީހުގެ އިދާރާއިން ބުނެފައިވާ ގޮތުގައި މުރައިދޫގޭ މުވައްޒަފުންގެ މަގާމާއި ނަމާއި މުސާރައިގެ ތަފުސީލާއި މަގާމުތަކަށް ގެނައި ބަދަލާއި މަގާމުތަކަށް މީހުން އައްޔަން ކޮށްފައިވާ ގޮތާއި ވަނަވަރު ހޯދުމަށް އެކި ފަރާތްތަކުން އަންނަނީ ހުށަހަޅަމުންނެވެ.

ނަމަވެސް މަޖިލީހުގެ ރައީސް ދިރިއުޅުއްވާ ގެކޮޅުގެ މުވައްޒަފުންގެ އަދަދާއި ނަމާއި ވަނަވަރު ހާމަކޮށްފި ނަމަ އެ މަނިކުފާނަށް ނުރައްކާވެދާނެ ފަދަ ކަމެއް އޮތް ކަމަށް މަޖިލީހުގެ އިދާރާ އިން ދެކޭތީ ކޮމިޓީގެ ރައުޔެއް ހޯދުމަށް އެދުނީ ކަމަށް ސިޓީގައި ވެ އެވެ.

މަޖިލީހުގެ ރައީސްގެ ގެކޮޅުގައި މަސައްކަތް ކުރާ މުވައްޒަފުންނާ ގުޅޭ މައުލޫމާތު ހޯދަން މީގެ ކުރިން އެދުމުން ދީފައިވާނީ މަގާމުގެ ކްލެސިފިކޭޝަނާއި މުސާރަ އެކަނި ކަމަށް ވެސް ސިޓީގައި ވެ އެވެ.

މަޖިލީހުގެ އިދާރާ އިން ބުނެފައިވަނީ ރައީސްގެ ގެކޮޅު މުލީއާގެ އާއި ނައިބު ރައީސްގެ ގެކޮޅު ހިލާލީގޭގެ މިފަދަ އެއްވެސް މައުލޫމާތެއް ވެސް އާންމުންނާ ހިއްސާ ނުކުރާކަމަށް އެ އޮފީހުން މައުލޫމާތު ދީފައިވާ ކަމަށެވެ.

މަޖިލިހުގެ އިދާރާގެ ސިޓީ އާ ގުޅިގެން، ސަރުކާރު ހިންގާ ޕީއެންސީގެ ޕީޖީ ލީޑަރު އަދި އިނގުރައިދޫ ދާއިރާގެ މެންބަރު އިބްރާހިމް ފަލާހު ވަނީ އެދިފައިވާ ގޮތަށް މުރައިދޫގޭ މުވައްޒަފުންގެ އަދަދާއި ވަނަވަރު އަދި މުސާރައާއި އިނާޔަތާ ގުޅޭ ހުރިހާ މައުލޫމާތެއް ދިނުމަށް ފެނިވަޑައިގަންނަވާ ކަމަށް ހުށަހަޅުއްވައިފަ އެވެ. އެ ހުށަހެޅުމަށް ކެލާ ދާއިރާގެ މެންބަރު އަބްދުﷲ ޝަރީފް ތާއީދު ކުރެއްވި އެވެ.

އެކަމަކު، ހެނދުނު ބޭއްވި ޖަލްސާގައި، މުރައިދޫގޭގެ ހުރިހާ މުވައްޒަފުންގެ މައުލޫމާތު ސިއްރު ކުރަން ފެންނަ ކަމަށް ހުށަހެޅުއްވީ ވެސް ފަލާހެވެ.

މުރައިދޫގޭ މުވައްޒަފުންގެ ހުރިހާ މައުލޫމާތެއް ހާމަކުރަން ހަވީރުގެ ބައްދަލުވުމުގައި ފާސްކުރީ ވޯޓުގައި ބައިވެރިވެވަޑައިގެންނެވި އެންމެ މެންބަރެއް ފިޔަވައި އެހެން ހުރިހާ މެންބަރުންގެ ތާއީދާ އެކު އެވެ. ދެކޮޅަށް ވޯޓު ދެއްވީ ހަނިމާދޫ ދާއިރާގެ އެމްޑީޕީ މެންބަރު އަބްދުލްޣަފޫރު މޫސާ (ގަޕޯ) އެކަންޏެވެ.

މި ގޮތަށް ފާސްކުރުމާއެކު، ހެނދުނު ނިންމި ނިންމުން ބާތިލް ވެފައިވާ ކަމަށް ކޮމިޓީގެ މުގައްރިރު ރެޑްވޭވް ސަލީމް ވިދާޅުވި އެވެ.

މެންބަރު ޣަފޫރު ވަނީ ހެނދުނު ވަކި ގޮތަކަށް ފާސްކޮށްފައި ވަނިކޮށް ވަކި ސަބަބެއް ނެތި އަލުން އެ މައްސަލަ މުރާޖައާ ނުކުރެވޭނެ ކަމަށް ވިދާޅުވެ، ނުރުހުން ފާޅުކުރައްވައިފަ އެވެ. އޭނާ ވިދާޅުވީ ކޮމިޓީ ގެންދަނީ ގަވައިދާ ހިލާފަށް ކަމަށެވެ. ނަމަވެސް، ޕީއެންސީގެ މެންބަރުން ވަނީ އެކަމާ ދެކޮޅު ހައްދަވައިފަ އެވެ. އަދި ކޮމިޓީގެ މުގައްރިރު ވެސް ނިންމެވީ ކޮމިޓީ ކުރިއަށް ގެންދަނީ ގަވައިދާ އެއްގޮތަށް ކަމަށެވެ.

ގައުމީ ސަލާމަތަށް ނުރައްކާވާ ބައިތަކާއި މުވައްޒަފުންގެ ނަމާއި ވަނަވަރު ފިޔަވައި އެހެނިހެން މައުލޫމާތު އާންމު ކުރުމަށް ފެންނަ ކަމަށް މާފަންނު އުތުރު ދާއިރާގެ އެމްއެންޕީގެ މެމްބަރު މުހައްމަދު ނާޒިމް މިއަދުގެ ހެނދުނުގެ ބައްދަލުވުމަށް ހުށަހެޅުއްވި އެވެ. ނަމަވެސް އެ ހުށަހެޅުމަށް އެއްވެސް މެންބަރެއްގެ ތާއީދު އޭރަކު ނުލިބުނެވެ.

މުރައިދޫގޭގެ އެންމެ އިސް ވެރިޔަކީ ތަޖުރިބާކާރު ނޫސްވެރިޔާ މުންޑޫ އާދަމް ހަލީމެވެ. އޭނާ އަށް ދީފައިވަނީ ޗީފް އޮފް ސްޓާފްގެ މަގާމެވެ. އެއީ އެ ގެކޮޅުގެ އެންމެ އިސް މަގާމެވެ. ރާއްޖޭގައި އުފެދުނު އެންމެ މޮޅު ފުޓްބޯޅަ ކުޅުންތެރިޔާ އަލީ އަޝްފާގް (ދަގަނޑޭ) ވެސް ވަނީ އެ ގެކޮޅުގެ ޑިރެކްޓަ ޖެނެރަލަކަށް އައްޔަން ކުރައްވައިފަ އެވެ.