މާލީ ދަތިކަމުން އަރައިގަތުމަށް ވެސް އިންޑިއާގެ އެހީތެރިކަން ލިބޭނެ: ރައީސް

ރާއްޖެއަށް ދަތިކަމެއް ކުރިމަތިވާ ކޮންމެ ފަހަރަކު އެހީވާން އިންޑިއާ އޮންނަނީ ތައްޔާރަށް ކަމަށާއި މާލީ ދަތިކަމުން އަރައިގަތުމަށް ވެސް އިންޑިއާގެ ފުރިހަމަ އެއްބާރުލުން ލިބޭނެ ކަމުގެ ޔަގީންކަން އޮތް ކަމަށް ރައީސް ޑރ. މުހައްމަދު މުއިއްޒު މިއަދު ވިދާޅުވެއްޖެ އެވެ.

ރައީސް މުއިއްޒުގެ ދެކަނބަލުން އިންޑިއާއަށް ކުރައްވާ ތާރީހީ ދަތުރުފުޅު ފެއްޓެވުމުގެ ކުރިން އިނގިރޭސިވިލާތުގެ ދައުލަތުގެ މީޑިއާ، ބީބީސީއަށް ދެއްވި އިންޓަވިއުއެއްގައި ވިދާޅުވީ އިންޑިއާއަކީ ރާއްޖޭގެ ތަރައްގީގައި ވަރަށް މުހިންމު ބައިވެރިއެއް ކަމަށެވެ. އަދި ރާއްޖެއަށް މިހާރު ކުރިމަތިވެފައިވާ މާލީ ހާލަތުން އަރައިގަތުމަށް ވެސް އިންޑިއާ އިން އެހީވާނެ ކަމަށް ރައީސް ވިދާޅުވި އެވެ.

"އިންޑިއާއަށް އަޅުގަނޑުމެންގެ މާލީ ހާލަތު ވަރަށް ރަނގަޅަށް އެނގޭ، އަދި ތަރައްގީގެ އެންމެ ބޮޑު އެއް ބައިވެރިއެއްގެ ގޮތުގައި، އަޅުގަނޑުމެންނަށް ކުރިމަތިވާ ދަތިކަމުގައި އެހީވާން އޮންނަނީ އަބަދުވެސް ތައްޔާރަށް، ކުރިމަތިވާ ގޮންޖެހުންތަކަށް ރަނގަޅު ބަދަލުތަކާއި ހައްލުތައް ހޯދިނުމަށް،" އީމެއިލް މެދުވެރިކޮށް ބީބީސީއަށް ދެއްވި އިންޓަވިއުގައި ރައީސް ވިދާޅުވި އެވެ.

ރައީސް ވިދާޅުވީ ދެ ގައުމުގެ މެދުގައި ހުރި ކަންބޮޑުވުންތަކާއި އިސްކަންދޭންވީ ކަންކަން ވެސް ވަރަށް ރަނގަޅަށް މިހާރު ދެނެގަނެވިފައިވާ ކަމަށް އެމަނިކުފާނު ގަބޫލުކުރައްވާ ކަމަށެވެ.

"އަޅުގަނޑުމެންނަށް ޔަގީން އެއްވެސް ކަހަލަ ހިޔާލު ތަފާތުވުންތަކެއް ހުރި ނަމަ އެކަން ހައްލުކުރެވޭނީ ފާޅުކަން ބޮޑު ގޮތެއްގައި މަޝްވަރާކޮށް، ދެ ފަރާތުގެ ވިސްނުމުގެ ތެރެއިން ކަމަށް،" ރައީސް ވިދާޅުވި އެވެ.

އިންޑިއާގެ ރައީސް ދުރޫޕަދީ މުރުމޫގެ ދައުވަތަކަށް ރައީސް އިންޑިއާއަށް ވަޑައިގަތީ ފަސް ދުވަހަށެވެ. މިއީ އެމަނިކުފާނު އިންޑިއާއަށް ކުރައްވާ ފުރަތަމަ ރަސްމީ ދަތުރުފުޅެވެ.

ބީބީސީގެ އިންޓަވިއުގައި ރައީސް ވިދާޅުވި ގޮތުގައި، ރާއްޖެ ބަނގުރޫޓުވާނެ ހާލަތެއް ނެތެވެ. އަދި އިންޓަނޭޝަނަލް މަނިޓަރީ ފަންޑް (އައިއެމްއެފް)ގެ ޕްރޮގްރާމަކަށް ވެސް ރާއްޖެ ނުދާނެ އެވެ.

"[އިގުތިސާދީ ހާލަތު ރަނގަޅުކުރަން] އަޅުގަނޑުމެންގެ އަމިއްލަ އެޖެންޑާއެއް އެބައޮތް،" ރައީސް ވިދާޅުވި އެވެ.

ރައީސް ވިދާޅުވީ މި ސަރުކާރުގެ ހާރިޖީ ސިޔާސަތަކީ ކޮބައިކަން އެމަނިކުފާނު ވެރިކަމާ ހަވާލުވެވަޑައިގެންނެވި ދުވަހު ވެސް ވަރަށް ރަނގަޅަށް ސާފުކޮށްދެއްވި ކަމަށާއި އެއީ "މޯލްޑިވްސް ފަސްޓް" ސިޔާސަތު ކަމަށެވެ. ރާއްޖެއިން ބޭރުގެ ގައުމުތަކާ އެކު ގުޅުން ބަދަހިކުރާނީ އެކަކު އަނެކަކަށް އިހުތިރާމާއި އިތުބާރު ލިބޭނެ އަދި ތަދައްޚުލުނުވުމާއި ސުލްހަވެރިކަމާއި އަމާންކަން ހޯދުމުގެ އުސޫލުތަކުގެ ތެރެއިން ކަމަށް ރައީސް ވިދާޅުވި އެވެ.

އަންނަ ބުރާސްފަތި ދުވަހުގެ ނިޔަލަށް ކުރައްވާ ދަތުރުފުޅުގައި އިންޑިއާގެ ވެރިރަށް ނިއު ދިއްލީގެ އިތުރުން މުމްބާއީ އަދި ބެންގަލޫރަށް ރައީސް ވަޑައިގެން ވިޔަފާރީގެ މަޝްވަރާތައް ކުރައްވާ ގޮތަށް ވަނީ ހަމަޖައްސަވައިފަ އެވެ. ރައީސް މުއިއްޒުގެ އަރިހުގައި ވަރަށް ގިނަ މިނިސްޓަރުން ވެސް އިންޑިއާއަށް ވަޑައިގަތެވެ.

މި ދަތުރުފުޅުގައި އިންޑިއާގެ ރައީސާއި ބޮޑުވަޒީރު މޯދީއާ ވެސް ރައީސް މުއިއްޒު ބައްދަލުކުރައްވާނެ އެވެ.

އަބަދުވެސް އެކުވެރި، ދެ ގައުމުގެ ގުޅުން އިތުރަށް ބަދަހިކުރުމުގެ ދަތުރުފުޅުގައި ރައީސް މުއިއްޒުގެ އެންމެ ފުރަތަމަ ބައްދަލުވުން މިއަދު ހަވީރު އޮތީ އިންޑިއާގެ އެކްސްޓާނަލް އެފެއާޒް މިނިސްޓަރު ސުބްރަމަނިއަމް ޖައިޝަންކަރާ އެކުގަ އެވެ. ރައީސް އާއި ބޮޑުވަޒީރު ނަރެންދުރަ މޯދީއާ އެކު ރަސްމީ ވާހަކަތަކާއި އެއްބަސްވުންތަކުގައި ސޮއިކުރުން އޮތީ މާދަމާ އެވެ.