ވޯޓާ ބަންކަރިންގެ ހިދުމަތް ހޯދަން ޕެނަމާގެ ބޯޓެއް އިހަވަންދިއްޕޮޅަށް

ރާއްޖެ އިން ވޯޓާ ބަންކަރިންގެ ހިދުމަތް ހޯދުމަށް ޕެނަމާގެ ބޯޓެއް އަންނަ ބުރާސްފަތި ދުވަހު އިހަވަންދިއްޕޮޅު ނުވަތަ މޯލްޑިވްސް އިކޮނޮމިކް ގޭޓްވޭގައި ބަނދަރުކުރާ ގޮތަށް ހަމަޖައްސައިފި އެވެ.

ރާއްޖޭގައި އޮފްޝޯ ބަންކަރިންގެ ހިދުމަތް ދޭ އެމްޕީއެލްގެ މެނޭޖިން ޑިރެކްޓަރު މުހައްމަދު ވަޖީހު އިބްރާހިމް މިއަދު ފޭސްބުކްގައި ކުރެއްވި ޕޯސްޓެއްގައި ވިދާޅުވީ ޕެނަމާގައި ރަޖިސްޓަރީ ކޮށްފައިވާ އޮއިލް ޕޮރޮޑަކްޓްސް ޓޭންކަރަކުން ބަންކަރިންގެ ހިދުމަތް ހޯދުމަށް ބުރާސްފަތި ދުވަހު އިހަވަންދިއްޕޮޅަށް ބަނދަރުކުރާ ގޮތަށް ހަމަޖެހިފައިވާ ކަމަށެވެ. ވޯޓާ ބަންކަރިންއާ އެކު، އިތުރު ހިދުމަތްތަކެއް ހޯދުމަށް އެ ބޯޓުން އެދިފައިވާ ކަމަށް ވެސް އޭނާ ވިދާޅުވި އެވެ.

މިއީ އުތުރުގައި ބަންކަރިންގެ ހިދުމަތް ފެށި ފަހުން މި ހިދުމަތް ހޯދަން އަންނަ ދެވަނަ ބޯޓެވެ. މި ހިދުމަތް ފެށީ މިދިޔަ މަހުގެ 18 އިގަ އެވެ.

ޕެނަމާގެ ބޯޓުން ހޯދުމަށް އެދިފައިވާ ހިދުމަތްތަކަކީ؛

• ސާފު ބޯފެން ފޯރުކޮށްދިނުން.

• ޕައިލެޓޭޖްގެ ހިދުމަތް.

• ފަޅުވެރިން ބަދަލުކުރުން. (ރާއްޖެއިން ބޭރުން އަންނަ ހަ ފަޅުވެރިއެއް ވެލާނާ އިންޓަނޭޝަނަލް އެއާޕޯޓުން ހއ. އަތޮޅަށް ގެންގޮސް ބޯޓަށް އަރުވައި ދިނުމާއި ބޯޓުގައި ތިބި ނުވަ ފަޅުވެރިއެއް ބޯޓުން ބާލައިގެން ގެންގޮސް ވެލާނާ އެއާޕޯޓުން ރާއްޖެ އިން ބޭރަށް ފުރުވާލުން. މި ވަގުތައް ޖުމްލަ 15 ފަޅުވެރިން ވިޔަސް މި އަދަދު އަދި އިތުރުވެދާނެ ކަމަށް ބެލެވޭ).

• ކާބޯތަކެތި ސަޕްލައި ކޮށްދިނުން.

• ސްޕެއާ ޕާޓްސް ސަޕްލައި ކޮށްދިނުން.

އެ ބޯޓަށް ހިދުމަތް ދިނުމުގައި އެމްޕީއެލްގެ އިތުރުން، އަމިއްލަ ކުންފުނިތަކުން ވެސް ބައިވެރިވާނެ ކަމަށް ވަޖީހު ވިދާޅުވި އެވެ.

"މި ބޯޓުގެ ޝެޑިއުލް ހަމަޖެހިފައިވާ ގޮތުން ބޯޓުގެ ބައެއް ކަހަލަ މެއިންޓެނަންސް މަސައްކަތްތައް ކުރަން ޖެހޭތީ، ލަފާކުރެވޭ ގޮތުން ފަސް ވަރަކަށް ދުވަހު މި ބޯޓު އިހަވަންދިއްޕޮޅުގައި މަޑުކުރަން ޖެހިދާނެ އެވެ. މިހެން ދިމާ ވެއްޖެ ނަމަ، އެ ސަރަހައްދުގެ ރައްޔިތުންނަށް ވިޔަފާރީގެ އިތުރު ފުރުސަތުތައް ހުޅުވިގެން ދާނެ އެވެ،" އޭނާ ވިދާޅުވި އެވެ.

ބައިނަލްއަގުވާމީ މިންގަނޑުތަކާ އެއްގޮތަށް މެރިޓައިމް ދާއިރާއިން ހިދުމަތް ދިނުމަށް މޯލްޑިވްސް ޕޯޓްސް ލިމިޓެޑުން ގާއިމްކުރި "އިންޓަނޭޝަނަލް ޝިޕް އެންޑް ޕޯޓް ސެކިއުރިޓީ" ނުވަތަ އައިޕީއެސް ގޭޓް ފެސިލިޓީއެއް ހއ. އުލިގަމުގައި ހަދާފައިވެ އެވެ.

މި ހިދުމަތްތަކާ ބެހޭ މައުލޫމާތު ކަސްޓަމަރުންނަށް ފޯރުކޮށްދިނުމަށް ums.mv ގެ ނަމުގައި ހާއްސަ ވެބްސައިޓަކާއި 24 ގަޑިއިރު ހިދުމަތް ދޭ ކޯލް ސެންޓަރެއް ވެސް ގާއިމްކޮށްފައިވާ ކަމަށް ވަޖީހު ވިދާޅުވި އެވެ.

އިހަވަންދިއްޕޮޅު ޒޯންގައި އޮފްޝޯ އޮއިލް ބަންކަރިންގެ ހިދުމަތް ދެނީ ދުނިޔޭގެ ހަކަތައިގެ ވިޔަފާރިކުރާ އެންމެ ބޮޑު އެއް ކުންފުނި، ނެދަލޭންޑްސްގެ ވިޓޯލްއާ ގުޅިގެން އެސްޓީއޯއިންނެވެ.

ބަންކަރިންގެ ހިދުމަތް ފެށުމުގެ ގޮތުން މިދިޔަ މަހުގެ 18 ވަނަ ދުވަހު ވަނީ ސްރީ ލަންކާގެ ކޮލަންބޯ އާއި ރާއްޖެއާ ދެމެދު ދަތުރުކުރާ ވައިސީ ބެރިއާ ކިޔާ ބޯޓަކަށް ހިދުމަތް ދީފަ އެވެ. އެއީ ރާއްޖެއިން ބަންކަރިންގެ ހިދުމަތް ހޯދި ފުރަތަމަ ބޯޓެވެ. އެ ބޯޓަށް ފޯރުކޮށްދިނީ ތެލެވެ.