ޑްރަގު އޮޕަރޭޝަނެއް ހުއްޓުވަން ފުލުހުންނާ ކުރިމަތިލައިފި، ހަތަރު މީހަކު ހައްޔަރު

ފުވައްމުލަކުގައި ފުލުހުން ހިންގި ޑްރަގު އޮޕަރޭޝަނެއް ރޭ ހުއްޓުވަން ބަޔަކު ފުލުހުންނާ ކުރިމަތިލުމުން ބޮޑު ހަމަނުޖެހުމެއް ހިންގައި ފުލުހަކަށް އަނިޔާވެއްޖެ އެވެ.

ފުލުހުން ބުނީ ބަޔަކު ހުރަސްއަޅައި ހަމަނުޖެހުން ހިންގީ ދޫނޑިގަން އަވަށުގައި މަސްތުވާތަކެތި ގެންގުޅުނު ކަމަށް ތުހުމަތުވާ މީހަކު ހައްޔަރު ކުރަން ފުލުހުން މަސައްކަތް ކުރުމުން ކަމަށެވެ.

އެ މީހާ ހައްޔަރު ކުރަން ފުލުހުން އުޅުމުން އެތަނަށް އިތުރު ބަޔަކު ގޮސް ފުލުހުންނާ ކުރިމަތިލައި، ފުލުހުންގެ ވާޖިބަށް ހުރަސް އެޅި ކަމަށް ފުލުހުން ބުންޏެވެ. އެ ހަމަނުޖެހުމުގެ ތެރޭގައި ފުލުހަކަށް އަނިޔާވި އެވެ.

މިކަމާ ގުޅިގެން އެ ތަނުން ތިން މީހަކު ހައްޔަރުކުރި އެވެ.

އެ މީހުން ހައްޔަރު ކުރުމާ ގުޅިގެން އޭގެ ފަހުން ފުވައްމުލަކު ޕޮލިސް ސްޓޭޝަން ކައިރިއަށް ވެސް ބަޔަކު ދަންވަރު އެއްވެ، ސްޓޭޝަން ތެރެއަށް މީހަކު ވަދެ ހަމަނުޖެހުން ހިންގި ކަމަށް ފުލުހުން ބުންޏެވެ. އެ މީހާ ވެސް ވަނީ ހައްޔަރުކޮށްފަ އެވެ.