ޑެޕިއުޓީ މިނިސްޓަރު ވަޖުދީ ވެސް ސަސްޕެންޑްކޮށްފި

ލޭންގުއެޖް، ކަލްޗާ އަދި ހެރިޓޭޖް މިނިސްޓްރީގެ ޑެޕިއުޓީ މިނިސްޓަރުގެ މަގާމުގައި ހުންނެވި މުހައްމަދު ސައީދު މޫސާ ވަޖުދީ މަގާމުން ސަސްޕެންޑްކޮށްފި އެވެ.

"މިހާރު" އަށް އެނގިފައިވާ ގޮތުގައި، ކުރިން ނޫސްވެރިއެއްގެ ގޮތުގައި ވެސް މަސައްކަތް ކުރެއްވި ވަޖުދީ ސަސްޕެންޑްކޮށްފައި ވަނީ އޭނާއާ ގުޅިގެން ބަލަމުންދާ ސުލޫކީ މައްސަލައަކާ ގުޅިގެންނެވެ.

ބަލަމުންދާ މައްސަލައަކާ ގުޅިގެން ވަޖުދީ ސަސްޕެންޑްކުރިއިރު މިއަދު ވަނީ ސްޕޯޓްސް ސްޕޯޓްސް، ފިޓްނަސް އެންޑް ރެކްރިއޭޝަން މިނިސްޓްރީގެ ޑެޕިއުޓީ މިނިސްޓަރު ހުސެއިން ޝިފާޒު ވެސް ސަސްޕެންޑްކޮށްފަ އެވެ. ވަކި މުއްދަތެއް ނެތް ގޮތަށް ރައީސް އޮފީހުން އޭނާ ސަސްޕެންޑްކުރީ ސިޔާސީ މުވައްޒަފުން އަމަލުކުރަންޖެހޭ ސުލޫކީ މިންގަނޑާ ހިލާފުވުމުންނެވެ.

އެ ބޭފުޅުންނާ ގުޅޭ މައްސަލައެއް ބަލަމުންދާއިރު އިންޑިއާ ސަރުކާރަށް ފާޑުކީ މައްސަލައެއްގައި މިިދިޔަ ޖެނުއަރީ މަހުން ފެށިގެން ޔޫތު މިނިސްޓްރީގެ ތިން ޑެޕިއުޓީ މިނިސްޓަރަކު ވެސް ތިބީ ސަސްޕެންޝަނުގަ އެވެ.

ދައުލަތުގެ އެކި ވުޒާރާތަކުގައި ތިއްބެވި ގިނަ ބޭފުޅުންތަކާ މެދު ސަރުކާރުން ފިޔަވަޅު އަޅަމުންދާއިރު މިއަދު ވަނީ ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ)ގެ ޗެއާމަންގެ މަގާމުން އަހްމަދު ޒުހޫރާއި އެމްއެމްޕީއާރުސީގެ މެނެޖިން ޑިރެކްޓަރުގެ މަގާމުގައި ހުންނެވި ފާތިމަތު ތައުފީގު ވެސް ވަނީ އެ މަގާމުން ވަކިކޮށްފަ އެވެ.