ޕީއެންސީން ގާސިމާއި ސިޔާމާއި ނާޒިމަށް ޓިކެޓް ދޫކޮށްލައިފި

އަންނަ މާޗް މަހު ބާއްވަން ނިންމާފައިވާ ރައްޔިތުންގެ މަޖިލީހުގެ އިންތިހާބުގައި ތިން ޕާޓީއެއްގެ ލީޑަރުން ވާދަކުރައްވާ ދާއިރާތަކަށް ޕީޕީއެމް/ޕީއެންސީން ވާދަނުކުރަން ނިންމައި އެ ބޭފުޅުންނަށް ޓިކެޓް ދޫކޮށްލައިފި އެވެ.

ޕީއެންސީން ބޭއްވި ނޫސްވެރިންގެ ބައްދަލުވުމެއްގައި ޗެއާޕާސަން އަބްދުއްރަހީމް އަބްދުﷲ މިއަދު ވިދާޅުވީ ޖުމްހޫރީ ޕާޓީގެ ލީޑަރު ގާސިމް އިބްރާހިމް ވާދަކުރައްވާ މާމިގިލީ ދާއިރާ އާއި އެމްއެންޕީގެ ރައީސް މުހައްމަދު ނާޒިމް ވާދަކުރައްވާ މާފަންނު އުތުރު ދާއިރާގެ އިތުރުން އެމްޑީއޭގެ ރައީސް އަހުމަދު ސިޔާމް ވާދަކުރައްވާ މީދޫ ދާއިރާއަށް ޕީއެންސީން ވާދަނުކުރާނެ ކަމަށެވެ.

"ޕާޓީތަކުގެ ލީޑަރުންނަށް އިހްތިރާމް ކުރުމުގެ ގޮތުން އަޅުގަނޑުމެން އެ ދާއިރާގެ ގޮނޑިތަކަށް ވާދަ ނުކުރަނީ،" އަބްދުއްރަހީމް ވިދާޅުވި އެވެ.

އެންމެ ފުރަތަމަ ޕީޕީއެމް/ޕީއެންސީ އިން މަޖިލިސް އިންތިހާބުގެ ޕްރައިމަރީ ހުޅުވާލީ އެމްއެންޕީ އަދި އެމްޑީއޭ މެންބަރުންނަށް ވެސް ކުރިމަތިލެވޭ ގޮތަށެވެ. ނަމަވެސް، ޕީޕީއެމް/ޕީއެންސީން ބާއްވާ ޕްރައިމަރީގައި އެހެން ޕާޓީތަކުގެ ޕާޓީތަކުގެ މެންބަރުން ބައިވެރިވާން ދެ ޕާޓީގެ ކޯލިޝަނުން ބޭނުން ނުވީ އެވެ.

ޕީޕީއެމް/ޕީއެންސީ އިން ތިން ދާއިރާ ދޫކޮށްލި ނަމަވެސް، އެ ޕާޓީން ވާދަކުރާ ބައެއް ދާއިރާތަކަށް ޖުމްހޫރީ ޕާޓީ، އެމްޑީއޭ އަދި އެމްއެންޕީގެ ކެންޑިޑޭޓުން ވާދަކުރެ އެވެ. އޭގެ ތެރޭގައި ޖުމްހޫރީ ޕާޓީގެ ނައިބު ރައީސް އައިޝަތު ނަހުލާ ހުޅުމާލެ ދެކުނު ދާއިރާއަށް ވާދަކުރައްވާއިރު، އެމްއެންޕީގެ ނައިބު ރައީސް އަބްދުﷲ ރިޔާޒުގެ ބޭބެ ތިމަރަފުށި ދާއިރާއަށް ވާދަކުރައްވަ އެވެ. ނ. އަތޮޅުގެ ބައެއް ދާއިރާތަކަށް އެމްޑީއޭގެ ކެންޑިޑޭޓުން ވެސް ވާދަކުރައްވަ އެވެ.

އަބްދުއްރަހީމް ވިދާޅުވީ ދޫކޮށްލި ތިން ދާއިރާ ނޫން އެހެން ހުރިހާ ދާއިރާއަކަށް ޕީޕީއެމް/ޕީއެންސީ އިން ވާދަ ކުރާނެ ކަމަށާއި އެއީ އެންމެ ކުރިން ވެސް ޕާޓީން ނިންމާފައި އޮތް ގޮތް ކަމަށެވެ. ކެންޑިޑޭޓުން ކަނޑައެޅުމަށް އަންނަ ހޮނިހިރު ދުވަހު ޕީޕީއެމް/ޕީއެންސީގެ ޕްރައިމަރީ އޮންނާނެ އެވެ.

ޕީޕީއެމް/ޕީއެންސީގެ ޕްރައިމަރީގައި 283 ކެންޑިޑޭޓުން ވާދަކުރެ އެވެ. އެންމެ ބޭފުޅަކު ކުރިމަތިލާފައިވާތީ ޕްރައިމަރީއާ ނުލައި ޓިކެޓް ކަށަވަރުވީ 13 ބޭފުޅަކަށެވެ. އެންމެ ބޭފުޅަކު ކުރިމަތިލާފައިވުމުން 13 ޓިކެޓެއް ޕްރައިމަރީއާ ނުލައި ވަނީ ކަށަވަރުވެފަ އެވެ.

"ޕްރައިމަރީ ނިމޭއިރު ތިބެން ވާނީ ކާމިޔާބު ކުރި ކެންޑިޑޭޓާ އެކު ކުރިއަށް ދެވޭނެ ގޮތަށް ހުރިހާ ބޭފުޅުން ވެސް. ޕްރައިމަރީ ވެގެން ނުވާނެ އަޅުގަނޑުމެންގެ ޕާޓީއަށް ސުލަހް މަސަލަސް ކަމަށް ބުރޫއަރާ ކަމަކަށް. އޭގެ ބަދަލުގަ ވާންވާނީ ޕާޓީ އިތުރަށް ވަރުގަދަވެގެންދާނެ ކަމަކަށް،" އަބްދުއްރަހީމް ވިދާޅުވި އެވެ.

ޕީއެންސީގެ ޕްރައިމަރީއަށް ކުރިމަތިލެއްވި ބައެއް ކެންޑިޑޭޓުންގެ ފޯމް ބަލައިނުގަތުމަށް މީގެކުރިން ނިންމި އެވެ. އެއީ ޕާޓީއަށް ހިދުމަތްކުރި މިންވަރު މަދުވުމާއި ޕާޓީ ބައިބައިކޮށް ފިތުނަ އުފައްދަން މަސައްކަތް ކުރި ކަމަށް ބުނެ އެވެ. ނަމަވެސް، އެ ނިންމުމާ އެކު ބައެއް ކެންޑިޑޭޓުންނާއި އާންމު މެންބަރުންގެ ކަންބޮޑުވުންތަކާ އެކު އެ ނިންމުން ބަދަލުކޮށް ހުރިހާ ކެންޑިޑޭޓުންނަށް ވާދަކުރަން ފުރުސަތު ދިނެވެ.

އެކަމަކު ބައެއް ކެންޑިޑޭޓުން ވަނީ ދެން ވާދަނުކުރަން ނިންމައި ނަން އަނބުރާ ނަގައިފަ އެވެ. އޭގެ ސަބަބުން ޕާޓީއަށް އެއްވެސް ބަލިކަށި ކަމެއް ނުލިބޭ ކަމަށް އަބްދުއްރަހީމް ވިދާޅުވި އެވެ.