ފެނަކައިގެ މުވައްޒަފުންގެ މައްސަލައަކީ ވަޒީރުންނަށް ރުހުން ނުދޭންވީވަރު ކަމެއް ނޫން: ރައީސް

ފެނަކައިގެ ބައެއް މުވައްޒަފުން ވަކިކުރާ މައްސަލައިގައި މިނިސްޓަރުންނަށް ރައްޔިތުންގެ މަޖިލީހުން ރުހުން ނުދޭނެ ކަމަށް އެމްޑީޕީގެ ބައެއް މެންބަރުން މިއަދު ވިދާޅުވި ނަމަވެސް، އެއީ މިނިސްޓަރުންނަށް ނުދޭންވީ ވަރުގެ ކަމެއް ކަމަށް ގަބޫލު ނުކުރައްވާ ކަމަށް ރައީސް ޑރ. މުހައްމަދު މުއިއްޒު ވިދާޅުވެއްޖެ އެވެ.

ކުރީގެ ރައީސް އިބްރާހިމް މުހައްމަދު ސޯލިހުގެ ދުވަސްވަރު އެންމެ ބޮޑަށް އަޑިއަޅާލައި އަދި އެންމެ ގިނަ ބަޔަކަށް ކެމްޕެއިނާ ދިމާކޮށް ވަޒީފާ ދިން އެއް ކުންފުނި، ފެނަކައިގެ މުވައްޒަފުންގެ މައްސަލާގައި މިއަދު ރައްޔިތުންގެ މަޖިލީހަށް ކުއްލި މައްސަލައެއް ވެސް ހުށަހެޅި އެވެ.

އެ މައްސަލައަށް ބަހުސް ކުރައްވަމުން އެމްޑީޕީގެ ބައެއް މެންބަރުން ވަނީ ފެނަކައިގެ މުވައްޒަފުން ވަކިކުރަމުންދާ ނިންމުން ބަދަލުނުކުރާ ނަމަ، ސަރުކާރުގެ މިނިސްޓަރުންނަށް ރުހުން ނުދޭނެ ކަމަށް ވިދާޅުވެފަ އެވެ. މިނިސްޓަރުންނަށް ރުހުން ދިނުމުގެ މައްސަލާގައި މިހާތަނަށް މަޖިލީހުން ގޮތެއް ނުނިންމަ އެވެ.

ރައީސް އޮފީހުގައި މިއަދު އޮތް ނޫސްވެރިންގެ ބައްދަލުވުމުގައި އެކަމާ ގުޅޭ ގޮތުން "މިހާރު" އިން ސުވާލު ކުރުމުން ރައީސް ވިދާޅުވީ އެއީ ސަރުކާރުގެ މިނިސްޓަރުންނަށް ރުހުން ނުދެވޭ ވަރުގެ ކަމެއްތޯ އެހެން ގައުމުތަކުގެ މިންގަނޑުތަކުން ވެސް ވިސްނާލަންޖެހޭ ކަމަށެވެ.

"ރުހުން ނުދޭނީ ރުހުން ނުދޭވަރު ކަންތައްތައްވީމަ. ދެން އަޅުގަނޑަށް ޔަގީން ވަރަަށް ޒިންމާދާރުވާނެ ރާއްޖޭގެ ޕޮލިޓިކަލް ޕާޓީސް. ހަމަ ވަރަށް ޒިންމާދާރު އިދިކޮޅެއް ރާއްޖޭގައި އޮންނާނީ. ވަރަށް ގައުމީ މަސްލަހަތު އިސްކޮށް ގައުމައިގެން ކުރިއަށް ދިޔުމުގެ ވިސްނުން މަޖިލީހުގައި ވެސް އޮންނާނީ،" ރައީސް ވިދާޅުވި އެވެ.

"އަޅުގަނޑު ގަބޫލުކުރަނީ ހުރިހާ އެންމެން އެކީގައި ކުރިއަށް ދިޔުމަށް ޑިމޮކްރަސީގެ ރީތި ހަމަ އިސްކުރާނެކަން."

ރައީސް ވިދާޅުވީ ފެނަކަގެ ވަރަށް ގިނަ މުވައްޒަފުންތަކެއް ކޮންޓްރެކްޓް މިދިޔަ މަހުގެ 30 އަށް ހަމަވި ކަމަށާއި އޭގެ ތެރޭގައި އެއްވެސް މަސައްކަތެއް ނެތް ރަށްރަށުގައި ނަގާފައިވާ މުވައްޒަފުން ވެސް ހިމެނޭ ކަމަށެވެ. ފެނަކައިން ނިންމާފައިވަނީ އޭގެ ތެރެއިން ބައެއް މުވައްޒަފުންގެ ކޮންޓްރެކްޓް އާ ނުކުރުމަށް ކަމަށާއި އެކަމަކު، ވީވަރަކުން ވަގުތީ ގޮތުން ނަމަވެސް ކޮންޓްރެކްޓް އާކުރުމަށް މިހާރު ފެނަކައިގެ މެނޭޖްމެންޓަށް ދަންނަވާފައިވާނެ ކަމަށް ރައީސް ވިދާޅުވި އެވެ.

"އެ މަސައްކަތް އެބަ ކުރިއަށް ގެންދޭ. އެ ބޭފުޅުން ދޫކޮށްލީ އެއްވެސް މަސައްކަތެއް ނެތް ރަށްރަށުގެ މުވައްޒަފުން، ޕްރޮޖެކްޓެއް ވެސް ނެތް ރަށްރަށް. އެއީ ކެމްޕެއިނަށް ނެގި މީހުން ކަމަށް ބެލެވެނީ،" ރައީސް ވިދާޅުވި އެވެ.

ކުންފުންޏަށް މާލީ ގޮތުން އެއްގޮތަކަށް ވެސް ކުޅަދާނަ ނުވަންޏާ އެ މުވައްޒަފުން ދޫކޮށްލަން މަޖުބޫރުވާނެ ކަމަށް ރައީސް ވިދާޅުވި އެވެ. ފެނަކައިގައި 7،300 މުވައްޒަފުން އުޅޭއިރު، ހަމައެކަނި ކޮންޓްރެކްޓް ސްޓާފުންގެ އަދަދު ވެސް 2،000 އަށް އަރަ އެވެ. ފެނަކަ އިން މިއަދު ބުނެފައިވަނީ އެ ކުންފުނީގެ ވަޒީފާގެ އޮނިގަނޑުން ބޭރުން ވެސް ބައެއް މުވައްޒަފުން ދާއިމީކޮށް ނަގާފައިވާ ކަމަށާއި ނަމަވެސް އެއިން އެއްވެސް މުވައްޒަފަކު ވަކި ނުކުރާނެ ކަމަށެވެ. ހަމައެކަނި ނިންމާފައިވަނީ އެއްވެސް މަސައްކަތެއް ނެތް ރަށްރަށުގެ ކޮންޓްރެކްޓް މުވައްޒަފުންގެ ކޮންޓްރެކްޓް އާ ނުކުރުމަށް ބުންޏެވެ.