ހައްޔަރުކުރި އާރްޑީސީގެ މެނޭޖަރު މަސްތުވާތަކެތި ބޭނުންކުރާ ކަމަށް އެއްބަސްވެ ފެނުނު ތަކެއްޗާ ހަވާލުވެއްޖެ

ފުލުހުން ރޭ ހިންގި އޮޕަރޭޝަނެއްގައި އާރްޑީސީގެ ޕޭއަބަލްސް މެނޭޖަރު ހުސައިން އަނީފްގެ އެޕާޓްމަންޓް ފާސްކުރި އިރު ފެނުނު މަސްތުވާތަކެއްޗަކީ އޭނާ ބޭނުންކުރަން ގެންގުޅޭ އެއްޗެހި ކަމަށް މިއަދު ކޯޓުގައި އިއުތިރާފްވެ ފަރުވާގެ ފުރުސަތު ބޭނުންވާ ކަމަށް ބުނެފި އެވެ.

ފުލުހުން ބުނި ގޮތުގައި އުމުރުން 32 އަހަރު އަނީފް އުޅޭ ތަން ފާސްކުރި އިރު މަސްތުވާއެއްޗެއް އެއްކޮށް ހަދާފައި އޮތް ކަމަށް ބެލެވޭ ތިން ބިޑި އާއި މަސްތުވާތަކެތި އަޅާފައިހުރި ކަމަށް ބެލެވޭ ސެލޯފިން ކޮޅެއް ވެސް ފެނުނެވެ.

"މިހާރު" އަށް އެނގިފައިވާ ގޮތުގައި އެ ގޭތެރެއިން ވަނީ ބަނގުރާ ހުސްކޮށްފައި ހުރި ފުޅިތަކެއް ވެސް ފެނިފަ އެވެ.

އަނީފްގެ ބަންދާ މެދު ގޮތެއް ނިންމަން މިއަދު ކްރިމިނަލް ކޯޓަށް ހާޒިރުކުރުމުން އޭނާ ކުށަށް އިއުތިރާފްވެ، ފެނުނީ އޭނާ ބޭނުންކުރަން ގެންގުޅޭ މަސްތުވާތަކެތި ކަމަށް ބުނި ނަމަވެސް ކޯޓުން އޭނާ ދޫކޮށްލީ އެވެ. އެއީ އޭނާ މީގެ ކުރިން އެއްވެސް މައްސަލައެއްގައި ބަންދުކޮށްފައި ނެތުމާއި ކުށުގެ ވެށީގައި އުޅޭ މީހަކަށް ނުވާތީ އާއި ކޮށްފައިވާ ތުހުމަތަކީ ޖިނާއީ އިޖުރާއަތުގެ ގާނޫނުގައި ބަޔާންކުރާ ފަދަ ބޮޑު ކުށަކަށް ނުވާތީ އެވެ. މީގެ އިތުރުން، އަނީފްގެ ސަބަބުން މުޖުތަމައުއަށް ނުރައްކާ ވެދާނެ ފަދަ ސަބަބެއް ފުލުހުންނަށް ދެއްކިފައި ނުވާ ކަމަށް ވެސް ގާޒީ އާމިނަތު އަޒްލިފާ ނެރުއްވި އަމުރުގައިވެ އެވެ.

ކޯޓުގައި އާނިފް ބުނި ގޮތުގައި މަސްތުވާތަކެތިން ސަލާމަތްވުމަށް ފަރުވާގެ ފުރުސަތު ލިބެން އޮތް ނަމަ އެ ފުރުސަތު އޭނާ ބޭނުންވެ އެވެ. އަދި ކުރެވުނު ކުށަށް މާފަށް އެދޭ ކަމަށް ވެސް ބުންޏެވެ.

އާނިފް އުޅޭ ތަނުން ފެނުނު މަސްތުވާތަކެތީގެ އަދަދު ޑްރަގް ޓްރެފިކިންގެ މިންގަނޑަށް ނުފެތޭ ކަމަށް ފުލުހުން ބުނެފައިވާކަން ފާހަގަކޮށް ގާޒީ ނިންމެވީ އާނިފް ބަންދުގައި ބަހައްޓަން ނުފެންނަ ކަމަށެވެ.

އާނިފް އުޅޭ ތަން ފާސްކުރީ އިއްޔެ ހެނދުނުން ފެށިގެން ފުލުހުން އާރްޑީސީގެ އޮފީހަށް ވަދެ ފާސްކޮށްފައި ވަނިކޮށެވެ. ފުލުހުން ބަލަމުން ދަނީ އާރްޑީސީގެ 13 މިލިއަނަށް ވުރެ ގިނަ ރުފިޔާ ނަހަމަ ގޮތުގައި ބޭނުންކޮށްފައިވާ ކަމަށް ބެލެވޭ މައްސަލައެކެވެ.