ޝައްކު އުފައްދާ އެއްވެސް ތަނެއްގައި ބޭރު ސިފައިން ތިބިތޯ ބައްލަވާ، މިތިބީ ދައްކަން ތައްޔާރަށް: ރައީސް

ރާއްޖޭގެ މިނިވަންކަމާ ގުޅުވައި ބޭރުގެ ސިފައިން މި ގައުމުގައި ތިބި ކަމަށް ވާދަވެރި ޕީޕީއެމާއި ޕީއެންސީން ކެނޑިނޭޅި ދައްކަނީ ބުހުތާނު ދޮގު ވާހަކަތަކެއް ކަމަށާއި އެކަން ރައްޔިތުންނަށް ސާބިތުކޮށްދޭން ސިފައިން ތިބި ކަމަށް ތުހުމަތުކުރާ ހުރިހާ ސަރަހައްދެއް ދައްކަން ވެސް ތައްޔާރަށް ހުންނެވި ކަމަށް ރައީސް އިބްރާހިމް މުހައްމަދު ސޯލިހް ރޭ ވިދާޅުވެއްޖެ އެވެ.

އެމްޑީޕީގެ ސޯސަން ޖަގަހާގައި ބޭއްވި ޖަލްސާއެއްގައި ވާހަކަފުޅު ދައްކަވަމުން ރައީސް ވިދާޅުވީ ރާއްޖޭގެ ބިމުން އެންމެ އިންޗިއެއް އަދި އެންމެ ފަސްކޮޅެއް ވެސް ބޭރުގެ ބަޔަކަށް ދިނުމަށް އެމަނިކުފާނު ފުރުސަތު ނުދެއްވާނެ ކަމަށެވެ. ރޭގަނޑުގެ ވަގުތެއްގައި ރައްޔިތުންގެ މަޖިލިސް އެއްކޮށް، މި ރާއްޖޭގެ ބިން ބޭރުގެ ފަރާތްތަކަށް މިލްކުކުރެވޭ ގޮތަށް ގާނޫނުއަސާސީއަށް އިސްލާހު ގެނައީ އެމަނިކުފާނަށް ތުހުމަތު އަމާޒުކުރާ ޕީޕީއެމުން ކަމަށް ވިދާޅުވި އެވެ.

ބޭރު މީހުންނަށް ބިން މިލްކު ކުރެވޭ ގޮތަށް ގާނޫނުއަސާސީއަށް އެރޭ ގެނައި އިސްލާހާ ދެކޮޅު ހެއްދެވި ކަމަށާއި ވެރިކަމަށް ވަޑައިގެން އެންމެ ފުރަތަމަ ކުރެއްވި އެއް ކަމަކީ ބިން މިލްކު ނުކުރެވޭ ގޮތަށް އެ އިސްލާހު އުވާލުން ކަމަށް ރައީސް ވިދާޅުވި އެވެ.

"ހަމަގައިމު ވެސް ރާއްޖޭގެ އެންމެ ފަސްކޮޅެއް ވެސް އެންމެ އިންޗިއެއް ވެސް މިއަދަކު ބޭރުގެ ގައުމަކަށް މީހަކަށް މިލްކުކުރެވޭނެ އެއްވެސް ގޮތެއް ނޯންނާނެ،" ރައީސް ވިދާޅުވި އެވެ.

ރާއްޖޭގައި އިންޑިއާ ސިފައިން ތިބޭ ވާހަކައަކީ ކަނޑައެޅިގެން ދޮގެއް ކަމަށާއި އެކަމާ ޝައްކު ކުރައްވާ ފަރާތްތަކުން އުތުރު ތިލަފަޅާއި ހދ. ހަނިމާދޫ އާއި ލ. ކައްދޫ އެއާޕޯޓަށް ވެސް ވަޑައިގެން ބަލަންވީ ކަމަށް ރައީސް ވިދާޅުވި އެވެ.

"މިކަން އަޅުގަނޑުމެންނާ އަލަށް ގުޅިވަޑައިގެންނެވި ބޭފުޅުންނަށް ޔަގީންވެ ކަށަވަރު ވާނީ އަޅުގަނޑުމެންނާއެކީ މި މަސައްކަތުގައި ކުރިޔަށް ވަޑައިގަންނަވާއިރު. އަޅުގަނޑުމެން މިތިބީ އެ ހުރިހާ ތަނެއް ދައްކަން." އެމަނިކުފާނު ވިދާޅުވި އެވެ.

ރައީސް ވިދާޅުވި ގޮތުގައި ރާއްޖޭގެ ޚާރިޖީ ސިޔާސަތަކީ ހުރިހާ ގައުމުތަކާ އެކު ގުޅުން ބަދަހިކޮށްގެން ހަމަހަމަކަމާ އެކު ކުރިއަށް ދިއުމެވެ.

"އަޅުގަނޑުމެންގެ ހާރިޖީ ސިޔާސަތަކީ އެންމެ އިސް ކަމަކީ ގައުމުގެ މަސްލަހަތު. އެ ސިޔާސަތުގެ މައްޗަށް ބަސް ކިޔޭނެ އެހެން ބަޔަކު ނުތިބޭނެ. ކަން ނިންމާނީ އަޅުގަނޑުމެން،" ރައީސް ވިދާޅުވި އެވެ.

މި ސަރުކާރުގެ ހާރިޖީ ސިޔާސަތުގެ ސަބަބުން މިހާރު ރާއްޖެ އަކީ ދުނިޔޭގައި ބަސް ކިޔޭ ގައުމަކަށް ވެފައިވާ ކަމަށް ރައީސް ވިދާޅުވި އެވެ. އޭގެ އެއް ހެއްކަކީ އދ. ގެ ރިޔާސަތަށް ފޮރިން މިނިސްޓަރު އަބްދުﷲ ޝާހިދު އައްޔަން ކުރެއްވުމަށް އދ. ގައި ނެގި ވޯޓު ކަމަށް ވެސް ރައީސް ވިދާޅުވި އެވެ.