މޫސުން ގޯސްވުމުން އިދިކޮޅުގެ ހިނގާލުން ފަސްކޮށްފި

އިދިކޮޅު ޕީޕީއެމް/ޕީއެންސީ އިން މިއަދު ހަވީރު މާލޭގައި ބާއްވަން ހަމަޖެއްސި ހިނގާލުން މޫސުން ތަން ނުދޭތީ އެހެން ދުވަހަށް ފަސްކޮށްފި އެވެ.

ޕީޕީއެމުން ބުނީ "ދިވެހީންގެ ސުލްހަވެރި ހިނގާލުން" ގެ ނަމުގައި .އާޓިފިޝަލް ބީޗު ކުރިމަތިން ފަށަން އޮތް ހިނގާލުން ފަސްކުރީ މިއަދު ހެނދުނުން ފެށިގެން މެދުނުކެނޑި މާލެ އަށް ވާރޭ ވެހެމުން ދާތީ ކަމަށެވެ. ނަމަވެސް އެ ހަރަކާތް ދެން ބާއްވާނެ ދުވަހެއް އެ ޕާޓީއަކުން ނުބުނެ އެވެ.

ވ. އާރަށް ކުއްޔަށް ދިނުމުގައި ރިޝްވަތު ގަބޫލުކޮށް، އެ ފައިސާ ލޯންޑާ ކުރިކަން ސާބިތުވެ ޔާމީނުގެ މައްޗަށް އިއްވާފައިވާ 11 އަހަރުގެ ޖަލު ހުކުމްގެ އިސްތިއުނާފު މައްސަލަ މި އަހަރުގެ ސެޕްޓެމްބަރު 9 ގައި ބާއްވާ ރިޔާސީ އިންތިހާބުގައި ވާދަކުރެއްވޭނެ މުއްދަތު އޮއްވައި ނިންމައި ދިނުމަށް އެދި އިދިކޮޅުން އަންނަނީ ތަކުރާރުކޮށް މަސައްކަތް ކުރަމުންނެވެ. އޭގެ ތެރޭގައި ކަމާ ގުޅޭ ތަންތަނަށް ކޮންމެ ދުވަހަކު ދިއުމާއި ޖަގަހަ ޖަލްސާތަކާއި އެއްވުންތައް ބޭއްވުން ހިމެނެ އެވެ.

އެކަމަކު އަންނަ މަހުގެ 7 ވަނަ ދުވަހަށް އިންތިހާބަށް ކުރިމަތިލުމުގެ ފުރުސަތު ހަމަވާއިރު، ހައި ކޯޓުގައި ހިނގަމުންދާ އިސްތިއުނާފުގެ މައްސަލަ ނިމޭނެ ކަމާ މެދު ވަނީ ވަރަށް ބޮޑަށް ސުވާލު އުފެދިފަ އެވެ.

އިދިކޮޅު ލީޑަޝިޕުން އަންނަނީ ޔާމީން މިނިވަން ކުރުމުގެ ނަމުގައި ގިނަ ހަރަކާތްތަކެއް ރާވައި ހިންގަމުންނެވެ. ގްރީން ޒޯނުގެ ގޮތުގައި ކަނޑައަޅާފައި ޖުމްހޫރީ މައިދާނަށް ޕީޕީއެމްގެ ލީޑަޝިޕްގެ ބައެއް ބޭފުޅުން އިއްޔެ ހަވީރު އެއްވުމުން ހައްޔަރުކުރި އެވެ.

އެ ބޭފުޅުން ދޫކޮށްލީ ގްރީން ޒޯނަށް އެއްވި މައްސަލައިގެ ބަޔާން ނެގުމަށް އަންނަ ހަފުތާގައި ފުލުހުންގެ އިދާރާ އަށް ހާޒިރުވާން ޗިޓު ހަވާލުކުރުމަށް ފަހުގަ އެވެ.