ޝާހިދުގެ އިތުބާރުގެ މައްސަލަ އެޖެންޑާއިން ނަގައިފި

ޗާގޯސް މައްސަލާގައި ފޮރިން މިނިސްޓަރު އަބްދުﷲ ޝާހިދުގެ އިތުބާރުނެތް ކަމުގެ މައްސަލަ ރައްޔިތުންގެ މަޖިލީހުގެ މާދަމާގެ ޖަލްސާ އަށް އެޖެންޑާކޮށްފައިވާ ވަނިކޮށް، އެ މައްސަލަ އެޖެންޑާއިން ނަގައިފި އެވެ.

މަޖިލީހުގެ އިދާރާއިން ރަސްމީކޮށް އަދި އެއްޗެއް ބުނެފައިނުވި ނަމަވެސް، މަޖިލީހުގެ މެމްބަރަކު "މިހާރު" އަށް ވިދާޅުވީ، ޝާހިދުގެ އިތުބާރުނެތް ކަމުގެ މައްސަލަ މާދަމާގެ އެޖެންޑާއިން ނެގީ، މަޖިލީހުގެ އާންމު ކޮމިޓީއާ އެކު ދާއިމީ ކޮމިޓީތަކުގައި ތިއްބަވާ މެމްބަރުން އަލުން އެކުލަވާލުމުގެ މަސައްކަތް ނުނިމޭތީ ކަމަށެވެ.

މަޖިލީހުގެ ދާއިމީ ކޮމިޓީތަކަށް ބަދަލު ގެންނަންޖެހުނީ، މަޖިލީހުގެ ރައީސް މުހަންމަދު ނަޝީދަށް ތާއީދުކުރައްވާ އެމްޑީޕީ އަށް ނިސްބަތްވާ 13 މެމްބަރަކު އެ ޕާޓީން ވަކިވެވަޑައިގެންނެވުމާ ގުޅިގެންނެވެ. އެ މެމްބަރުން މި ވަގުތު ވަކި ޕާޓީއަކަށް ނިސްބަތްނުވާ މެމްބަރުންގެ ގޮތުގައި ތިއްބެވިއިރު، ކޮމިޓީތައް އަލުން އެކުލަވާލުމުގެ މަސައްކަތް މަޖިލިސް ތަމްސީލު ކުރައްވާ ޕާޓީތަކާ އެކު ނަޝީދު ގެންދަވަނީ މިދިޔަ ހަފްތާއިން ފެށިގެން ކުރައްވަމުންނެވެ.

"ކޮމިޓީ އެކުލަވާލެވެންދެން ޝާހިދުގެ މައްސަލަ މަޑުޖައްސާލެވިފައިވާކަން ވަނީ އަންގާފައި،" މެމްބަރު ވިދާޅުވި އެވެ.

ޗާގޯސް މައްސަލާގައި ޝާހިދުގެ އިތުރުން، ބަންޑާރަ ނައިބު އިބްރާހިމް ރިފްއަތުގެ އިތުބާރުނެތް ކަމުގެ މައްސަލައެއް ވެސް ވަނީ މަޖިލީހަށް ވައްދައިފަ އެވެ.

ރިފްއަތުގެ މައްސަލަ މިދިޔަ ހަފްތާގައި އެޖެންޑާކުރި ނަމަވެސް، މަޖިލީހަށް ހާޒިރުވެވަޑައިނުގަނެ، ލިޔުމުން އެކަނި ދިފާއު ފޮނުއްވާފައިވާތީ އުފެދުނު ގާނޫނީ ސުވާލުގެ ތެރޭގައި އެ މައްސަލަ ކުރިއަށް ގެންގޮސްފައެއް ނުވެ އެވެ.

އޭގެ ފަހުން މަޖިލީހަށް ހާޒިރުވެވަޑައިގެން ޖަވާބުދާރީވުމުގެ ފުރުސަތަކަށް އޭޖީ އެދިވަޑައިގެންނެވުމުން، މިއަދުގެ ޖަލްސާއަށް އެ މައްސަލަ އެޖެންޑާ ކުރި އެވެ.

އެކަމަކު އިދިކޮޅު މެމްބަރުން އަމިއްލައަށް އެ މައްސަލަ އަށް ހުރަސްއަޅައި، މަޖިލީހުގެ ނިޒާމު ގެއްލުވާލަން ތަކުރާރުކޮށް މިއަދު ވަނީ މަސައްކަތްކޮށްފަ އެވެ.

އެއާއެކު އެ މައްސަލައިގެ ބަހުސް ވަކި ހިސާބަތަކަށް ގެންދިއުމަށް ފަހު، މެންދުރުގެ ކެއުމަށްފަހު، ނިޒާމު ގެއްލުނުކަމަށް ބުނެ މިއަދުގެ ޖަލްސާ ވަނީ ނިންމާލައިފަ އެވެ.