އެމްޑީޕީގެ ސްލޮޓުގައި ސިޔާސީ މަގާމްތަކުގައި ތިބެ ޑިމޮކްރެޓްސް އަށް ސޮއިކުރުމުން މަގާމުން ވަކިކޮށްފި

އެމްޑީޕީގެ ސްލޮޓްތަކުގައި ސަރުކާރުގެ ސިޔާސީ މަގާމްތަކުގައި ތިބެ، އަލަށް އުފައްދާ ދަ ޑިމޮކްރެޓްސްއަށް ސޮއިކުރި ބަޔަކު އެމްޑީޕީން އެދިގެން މަގާމްތަކުން ވަކިކޮށްފި އެވެ.

ރަޖިސްޓްރީކުރަން، ގާނޫނުގައި ބުނާ އަދަދަށް 3،000 މެމްބަރުން ހަމަކުރަން އިލެކްޝަންސް ކޮމިޝަނުން މިދިޔަ ހަފުތާގައި ހުއްދަ ދީފައިވާ ޑިމޮކްރެޓްސްއަކީ އެމްޑީޕީގެ ރައީސް މުހައްމަދު ނަޝީދުގެ އަރިސް ބޭފުޅުންތަކެއް ޕާޓީން ވަކިވެ އުފައްދަން މަސައްކަތް ކުރާ ޕާޓީއެކެވެ. އެމްޑީޕީން ވަކިވެ ބައެއް މެމްބަރުން އަންނަނީ މި ޕާޓީއާ ގުޅެމުންނެވެ.

އޭގެތެރޭގައި އެމްޑީޕީގެ ސްލޮޓްތަކުގައި ސަރުކާރުގެ ކުންފުނިތަކާއި މިނިސްޓްރީތަކުގެ އިސް މަގާމްތަކަށް އައްޔަންކުރި މީހުން ވެސް ހިމެނެ އެވެ.

ޑިމޮކްރެޓްސްއަށް ސޮއިކުރާ މެމްބަރުން ސިޔާސީ މަގާމްތަކުން ވަކިކުރާ މައްސަލާގައި ދަނީ ފާޑުކިޔަމުންނެވެ.

ރައީސް އޮފީހުގެ ތަރުޖަމާން މުހައްމަދު މިއުވާން ވިދާޅުވީ ސަރުކާރުގެ މަގާމުތަކުން ވަކި ކުރަމުންދާ މީހުންނަކީ އެމްޑީޕީގެ ސްލޮޓްތަކުގައި މަގާމުތަކަށް ވަޑައިގަތް ބޭފުޅުން ކަމަށެވެ. އެ ޕާޓީ ދޫކޮށްލުމުން އެ މަގާމުތަކުން އެބޭފުޅުން ވަކިކޮށް ދިނުމަށް އެމްޑީޕީން އެދިފައިވާ ކަމަށް އޭނާ ވިދާޅުވި އެވެ.

"ވަކި ކުރަމުން ދަނީ އެމްޑީޕީ ސްލޮޓްތަކުގައި މަގާމުތަކަށް ވަޑައިގެންނެވި ބޭފުޅުން. އެމްޑީޕީން އެބައޮތް ސަރުކާރަށް އަންގާފައި އެ ބޭފުޅުންނަކީ މިހާރު އެމްޑީޕީގެ މެންބަރުން ނޫން ކަމަށް. އެހެންވެ އެ މަގާމުތަކުން އެ ބޭފުޅުން ވަކި ކުރަން ހުށަހަޅާފައި ވާތީ ވަކި ކުރަމުން ދަނީ،" މިއުވާން ވިދާޅުވި އެވެ.

އެމްޑީޕީން ވަކިވުމުން ސަރުކާރުން ވަކިކުރީ ކިތައް މީހުން ކަމެއް މިއުވާން ވިދާޅެއް ނުވެ އެވެ. ސަރުކާރު ކޯލިޝަންގައި އޮތް ޖުމްހޫރީ ޕާޓީން ރިޔާސީ އިންތިހާބުގައި ވަކިން ވާދަކުރަން ނިންމައި އެ ޕާޓީގެ ސްލޮޓްތަކުގައި ސިޔާސީ މަގާމްތަކުގައި ތިއްބެވި ބޭފުޅުން ގެންދަވަނީ ސަރުކާރަށް ފާޑުވިދާޅުވަމުންނެވެ.

އެކަމަކު އެ ބޭފުޅުން ވަތްކެއް ނުކުރެ އެވެ.