ޑިމޮކްރެޓްސް އިން އެމްޓީޑީގެ ނަމާއި ކުލަ ކޮޕީކުރި ކަމަށް ތުހުމަތުކޮށްފި

ރައްޔިތުންގެ މަޖިލީހުގެ ރައީސް މުހައްމަދު ނަޝީދުގެ "ފިކުރެއްގެ ދިރުން" ގެ އިސްބޭފުޅުންތަކެއް އުފައްދަން މަސައްކަތް ކުރައްވާ "ދަ ޑިމޮކްރެޓްސް" އިން ކުރީގެ ނައިބު ރައީސް އަހުމަދު އަދީބުގެ ޕާޓީ، މޯލްޑިވްސް ތާޑުވޭ ޑިމޮކްރެޓްސް (އެމްޓީޑީ) ގެ ނަމާއި ކުލަ ކޮޕީކުރި ކަމަށް މިއަދު ތުހުމަތުކޮށްފި އެވެ.

އެ ތުހުމަތާ ގުޅޭ ގޮތުން އެމްޓީޑީން ކުރި ޓުވީޓެއްގައި ބުނީ، އެ ޕާޓީގެ ފަލްސަފާ އާއި ނަމާއި ފިކުރާއި ކުލައަކީ އަދީބު ދޫނިދޫ ޖަލުގައި ބަންދު ކޮށްފައި ހުއްޓާ އަދީބު ހިޔާރު ކުރެއްވި އެއްޗެހި ކަމަށެވެ. ތާޑުވޭ ޑިމޮކްރެޓްސްގެ ނަން އަދީބު ހިޔާރު ކުރެއްވީ، ސެންޓްރިސްޓް ޑިމޮކްރެޓިކް ސިޔާސީ ފިކުރުތައް ފުރިހަމައަށް ގަބޫލުފުޅު ކުރައްވާތީ ކަމަށް ވެސް އެ ޕާޓީން ބުންޏެވެ.

އެމްޑީޕީ ތެރެއިން އިއުލާންކުރި "ފިކުރެއްގެ ދިރުން" ހަރަކާތުގައި އިސްކޮށް އުޅުއްވި ރައްޔިތުންގެ މަޖިލީހުގެ 12 މެމްބަރަކު އެ ޕާޓީން ވަކިވެވަޑައިގަތުމަށް ފަހު އުފައްދަން މަސައްކަތް ކުރައްވާ "ދަ ޑިމޮކްރެޓްސް" އިން ބޭނުންކުރަނީ އެމްޓީޑީން ވެސް ބޭނުންކުރާ ކަހަލަ މަޑު ނޫކުލައެކެވެ. ނަމަވެސް، ދަ ޑިމޮކްރެޓްސްގެ ކުލަ ރަސްމީކޮށް އަދި އިއުލާން ނުކުރެ އެވެ.

"އަދީބު ސްކައި ބްލޫ [މަޑު ނޫކުލަ] ހިޔާރުކުރީ، ތިން އަހަރު ވަންދެން، އޭނާގެ ގޮޅިން ފެންނަ ހަމައެކަނި އުއްމީދަށް ވާތީ އެވެ،" އެމްޓީޑީން ބުންޏެވެ.

"އަޅުގަނޑުމެންނަށް އުފާވެރިކަން ލިބެނީ، އާ ސިޔާސީ އެހެން ޕާޓީތަކުގެ ނަންތަކާއި ކުލަތައް އަޅުގަނޑުމެންގެ ޕާޓީން އިންސްޕަޔާ ވެފައިވާތީ އެވެ. ނަމަވެސް، އާ ސިޔާސީ ޕާޓީތައް އުފެއްދުމުގެ ތެރޭގައި އަޅުގަނޑުމެން އަދަބުވެރިކަމާއެކު އެދެނީ އެ ޕާޓީތަކުން އަމިއްލަ ނަންތަކާއި ކުލަތައް ކޮޕީ ނުކޮށް ހިޔާރުކުރުމަށެވެ،" އެ އެމްޓީޑީން ބުންޏެވެ.

"ދަ ޑިމޮކްރެޓްސް" ސިޔާސީ ޕާޓީއެއްގެ ގޮތުގައި އުފެއްދުމުގެ ހުއްދަ ދޭން އިލެކްޝަންސް ކޮމިޝަނުން މިއަދު ވަނީ ނިންމައިފަ އެވެ. އެއާ އެކު މި އަހަރުގެ ރިޔާސީ އިންތިހާބުގައި ވާދަކުރެވޭނެ ކަމުގެ ޔަގީންކަން ވެސް އެ ޕާޓީން މިއަދު ދިނެވެ.

ޕާޓީއެއްގެ ގޮތުގައި ރަޖިސްޓަރީ ކުރުމަށްޓަކައި ހުށަހަޅަން ޖެހޭ 3،000 މެމްބަރުންގެ ފޯމު ހަމަކުރުމުގެ މަސައްކަތް ރަސްމީކޮށް މިއަދު މާލެއިން ފަށާނެ ކަމަށް އެ ޕާޓީން ބުންޏެވެ.