މިދިޔަ އަހަރު ފެމިލީ ކޯޓުގައި 2،500 ކައިވެނި، 1،300 އަށް ވުރެ ގިނަ ވަރި

މިދިޔަ އަހަރު ފެމިލީ ކޯޓުގައި 2،500 ކައިވެނި ކުރިއިރު، އޭގެ ދެ ބައި ކުޅަ އެއްބަޔަށް ވުރެ ގިނަ އަދަދަކަށް ވަރި ކޮށްފައިވާ ކަމަށް އެ ކޯޓުގެ ތަފާސް ހިސާބުތަކުން ދައްކައިފި އެވެ.

ފެމިލީ ކޯޓުން އާންމުކުރި މިދިޔަ އަހަރުގެ ތަފާސް ހިސާބުތައް ދައްކާ ގޮތުން މިދިޔަ އަހަރު އެ ކޯޓުގައި 2،514 ކައިވެނި ކުރިއިރު 1،346 ވަރި ކޮށްފައިވެ އެވެ. އެހެންވެ، މިއީ މިދިޔަ އަހަރު ކުރި ކައިވެނީގެ ދެ ބައިކުޅަ އެއް ބަޔަށް ވުރެ ބޮޑު އަދަދެކެވެ.

އެ ހިސާބުތައް ދައްކާ ގޮތުން އެންމެ ގިނައިން ހުށަހަޅާފައިވަނީ ކޯޓުން ބޭރުގައި ވަރިކުރުމަށް ފަހު ވަރި ސާބިތުކުރުމަށް ހުށަހެޅި މައްސަލަތަކެވެ. އެފަދަ 662 މައްސަލައެއް ހުށަހެޅިއިރު، ވަރިވުމަށް އެދި 660 މައްސަލައެއް އަދި ވަރިކުރުމަށް 312 މައްސަލައެއް މިދިޔަ އަހަރު ހުށަހަޅާފައިވެ އެވެ.

ވަރިއާ މެދު ޝައްކުވެގެން ވެސް 18 މައްސަލައެއް މިދިޔަ އަހަރު ހުށަހެޅި އެވެ. ވަރީގެ ގިނަ މައްސަލަތައް މިދިޔަ އަހަރު ވަނީ ނިންމައިފަ އެވެ.

ރާއްޖެއިން ބޭރުގައި ކުރި 176 ކައިވެންޏެއް ރަޖިސްޓްރީކުރަން ވެސް މިދިޔަ އަހަރު ފެމިލީ ކޯޓަށް ހުށަހެޅި އެވެ. އޭގެ ކުރީ އަހަރުތަކުގެ ކައިވެނިތައް ހިމެނޭ ގޮތަށް އެފަދަ 184 ކައިވެންޏެއް މިދިޔަ އަހަރު ރަޖިސްޓްރީކޮށްދިނެވެ.

އެ ހިސާބުތައް ދައްކާގޮތުން މިދިޔަ އަހަރު އެކި ބާވަތުގެ 2،300 އަށް ވުރެ ގިނަ މައްސަލަ ހުށަހެޅިއިރު، އޭގެ ކުރީ އަހަރުގެ މައްސަލަތަކާ އެކު 2،454 މައްސަލައެއް މިދިޔަ އަހަރު އެ ކޯޓުން ނިންމި އެވެ. އަދި އަހަރު ނިމުނުއިރު ބާކީ ނުނިމި ހުރީ 242 މައްސަލައެކެވެ.

ގެވެށި އަނިޔާއާ ގުޅޭ 66 މައްސަލައެއް އަދި ކުޑަކުދިންގެ ހައްގުތަކާ ގުޅޭ 56 މައްސަލައެއް ވެސް މިދިޔަ އަހަރު ހުށަހެޅި އެވެ. އޭގެ ތެރެއިން ދެ މައްސަލައެއް ފިޔަވައި އެހެން ހުރިހާ މައްސަލައެއް މިދިޔަ އަހަރު ނިންމި އެވެ.

ދަރިންގެ ހަޟާނަތު ހޯދަން 24 މައްސަލައެއް ހުށަހެޅިއިރު 17 މައްސަލައެއް މިދިޔަ އަހަރު ނުނިމި އޮތް ކަމަށް ވެސް އެ ހިސާބުތަކުން ދައްކަ އެވެ. އަދި މިދިޔަ އަހަރު ދަރިންގެ ހަރަދުގެ ގޮތުގައި އެކަނި ވެސް 39 މިލިއަން ރުފިޔާ ފެމިލީ ކޯޓުން ބަލައިގަތް ކަމަށް އެ ހިސާބުތަކުން ދައްކަ އެވެ.