ދިވެހި ރުފިޔާގެ ނިޝާން ހިމެނޭ ނޫޓު ނެރެފި

ދިވެހި ރުފިޔާގެ ނިޝާން ހިމަނައިގެން ފުރަތަމަ ފަހަރަށް ނޫޓު ނެރެފި އެވެ.

ދިވެހި ރުފިޔާގެ ނިޝާން ހިމަނާފައިވަނީ 50ރ. ގެ ނޫޓުގަ އެވެ. އެމްއެމްއޭ އިން ބުނީ އަލަށް ނެރުނު 50ރ. ނޫޓުގެ ވައަތް ފަރާތުން މޫނުމަތީ އަގާ އެކު އާއި ނޫޓުގެ ފަހަތުގެ ކަނާތް ފަރާތުން މަތީގައިވާ މޫނުމަތީ އަގާ އެކު ދިވެހި ރުފިޔާގެ ނިޝާން ހިމަނާފައިވާނެ ކަމަށެވެ.

އެ ނޫޓް ދައުރުކުރަން ނެރޭ ތާރީހު އަދި އެމްއެމްއޭއިން އިއުލާނެއް ނުކުރެ އެވެ.

ދިވެހި ފައިސާގެ ނިޝާންގައި ތާނަ އަކުރު "ރ" ގައި ކައްޗަށް އިތުރު ރޮނގުބުރިއެއް އިނދެ އެވެ. މި ނިޝާން ތައާރަފް ކުރީ މިދިޔަ ޖުލައި މަހު އެވެ.

ދިވެހި ރުފިޔާގެ ނިޝާން ފަރުމާކުރަން މިދިޔަ އަހަރު އެމްއެމްއޭ އިން ހުޅުވާލުމުން 70 ހުށަހެޅުމެއް ލިބިފައިވެ އެވެ. އެ ހުށަހެޅުންތަކުގެ ތެރެއިން އެންމެ ރަނގަޅު ހުށަހެޅުމެއް ކަނޑައެޅީ ފަންނީ ޖަޖުންގެ ޕެނަލަކުންނެވެ.