މި ސަރުކާރުން ހަތަރު އަހަރުގެ ތެރޭގައި 20،000 ވަޒީފާ އުފައްދައިފި: މަހްލޫފު

ކުރީގެ ރައީސް އަބްދުﷲ ޔާމީންގެ ވެރިކަމުގައި އުފެއްދި ވަޒީފާ އަށް ވުރެ ގިނަ ވަޒީފާ މި ސަރުކާރުން ހަތަރު އަހަރު ދުވަހުގެ ތެރޭގައި އުފައްދާފައިވާ ކަމަށް ޔޫތު މިނިސްޓަރު އަހްމަދު މަހްލޫފު ރޭ ވިދާޅުވެއްޖެ އެވެ.

ސޯޝަލް ސެންޓަރުގައި ބޭއްވި މި އަހަރުގެ ޒުވާނުންގެ އެވޯޑް ހަފުލާގައި، ޕެންޝަން އޮފީހުގެ ތަފާސްހިސާބުތަކާ ހަވާލާ ދެއްވައި އޭނާ ވިދާޅުވީ، ކުރީގެ ސަރުކާރުގެ ފަސް އަހަރު ދުވަހުގެ ތެރޭގައި އުފައްދާފައި ވަނީ 18،000 ވަޒީފާ ކަމަށެވެ. އެކަމަކު މި ސަރުކާރަށް މިވީ ހަތަރު އަހަރުގެ ތެރޭގައި 20،000 އަށް ވުރެ ގިނަ ވަޒީފާ އުފައްދާފައިވާ ކަމަށް ވިދާޅުވި އެވެ.

"ކުރީ ސަރުކާރުގެ ފަސް އަހަރުން އުފެއްދުނީ 18،000 ވަޒީފާ. ނަމަވެސް މި ސަރުކާރުގެ، ރައީސް އިބްރާހިމް މުހައްމަދު ސޯލިހުގެ ހަތަރު އަހަރުގެ ތެރޭގައި މިހާތަނަށް 20،000 ވަޒީފާ އުފެދިގެން ގޮސްފައިވޭ،" މަހުލޫފު ވިދާޅުވި އެވެ.

އޭނާ ވިދާޅުވި ގޮތުގައި މީގެ ކުރިން ޔޫތު މިނިސްޓްރީ ސިފަވެފައި އޮތީ ވަރަށް ކުޑަ ވުޒާރާއެއްގެ ގޮތުގަ އެވެ. ހުދު އޭނާ އަށް ވެސް ފެނިވަޑައިގަތީ އެ މިނިސްޓްރީ އަކީ މާ ބައިވަރު މަސައްކަތެއް ނުކުރާ އަދި ޕްރޮޖެކްޓުތައް ނުހިންގާ ތަނެއްގެ ގޮތުގައި ކަމަށް ވިދާޅުވި އެވެ. ނަމަވެސް މި ސަރުކާރުން އެ ވިސްނުން ބަދަލުކޮށްލައިފި މަހުލޫފު ވިދާޅުވި އެވެ.

"ނަމަވެސް މިއަދު މި ޕޯޑިއަމް ކައިރީގައި ހުރެ އަޅުގަނޑު ވާހަކަ ދައްކާއިރު، މި ސަރުކާރުގައި ހިންގާ ޕްރޮޖެކްޓުތަކުގައި ވެސް ދެވަނަ އަށް އެންމެ ގިނަ މަސައްކަތްކުރާ މިނިސްޓްރީ އަކީ މި މިނިސްޓްރީކަން އަޅުގަނޑު އުފަލާ އެކީގައި ފާހަގަކުރަން،" އޭނާ ވިދާޅުވި އެވެ.

ކުޅިވަރު ވަސީލަތްތައް ގާއިމުކުރުމަށާއި ޒުވާނުންގެ ތަރައްގީ އެ މިނިސްޓްރީން މިހާރު ވެސް 550 އަށް ވުރެ ގިނަ ޕްރޮޖެކްޓުތައް ހިންގަމުން އަންނަ ކަމަށް މަހްލޫފު ވިދާޅުވި އެވެ.

އެހެން މިނިސްޓްރީތަކުގެ މަސައްކަތްތަކުގެ ބޮޑު ބައެއް ޒުވާނުންނަށް ހާއްސަ ކޮށްގެން ކުރުމަކީ ޔޫތު މިނިސްޓްރީން ޒުވާނުންގެ ތަރައްގީ އަށް ކުރަމުން އަންނަ މަސައްކަތްތަކުގައި ލިބޭ ވަރަށް ބޮޑު ބާރެއް ކަމަށް މަހްލޫފު ވިދާޅުވި އެވެ. މި ސަރުކާރުން ފަހިކޮށްދެމުން އަންނަ ތައުލީމާއި ވަޒީފާ އާއި އަދި ތަރައްގީގެ މަސައްކަތްތަކުގައި ޒުވާނުންގެ ބޮޑު ހިއްސާއެއް އޮންނަ ކަމަށް ވެސް އޭނާ ވިދާޅުވި އެވެ.

"ޒުވާނުންނަށް ކިޔެވުމުގެ މަގުފަހިކުރުމަށް ސްޓޫޑެންޓް ލޯނަށް އެއް ބިލިއަނަށް ވުރެ ގިނަ ރުފިޔާ ހޭދަކޮށްފައިވޭ. އަދި 1.7 ބިލިއަން ރުފިޔާ، 1،119 އެސްއެމްއީ ލޯނަށް ދީފައިވާއިރު، މީގެ ތެރެއިން 400 ލޯނަކީ ސީދާ ޒުވާނުންނަށް ދީފައިވާ ލޯނުތައް،" މަހްލޫފު ވިދާޅުވި އެވެ.

ޒުވާނުންގެ ކުރިއެރުމަށް ބޮޑެތި މަސައްކަތްތަކެއް ފެށިފައި ވިޔަސް، އަދިވެސް އެ ދާއިރާގެ ތަރައްގީ އަށް ކުރަން ޖެހޭ ވަރަށް ގިނަ މަސައްކަތްތައް ހުރި ކަމަށް ޒުވާނުންނާއި ކުޅިވަރާ ބެހޭ ވަޒީރު ވިދާޅުވި އެވެ. ޔޫތު މިނިސްޓްރީ އާއި ގައުމީ ޔުނިވާސިޓީ (އެމްއެންޔޫ) ގުޅިގެން ކުރި ޒުވާނުންނާ ގުޅޭ ދިރާސާއިން ހާމަވި ކަންކަން ބަލައި، ޒުވާނުންގެ ތަރައްގީގެ ކަންކަމުގައި ބަދަލުތައް ގެންނަވާނެ ކަމަށް ވެސް އޭނާ ވިދާޅުވި އެވެ.

ރޭގެ ހަފުލާގައި، މި އަހަރުގެ ޒުވާނުންގެ އެވޯޑް 10 މީހަކަށް ސަރުކާރުން ދިނެވެ.

އެއީ އެކި ދާއިރާތަކުން ޒުވާނުން ކުރާ މަސައްކަތުގެ އަގު ވަޒަންކޮށް، ހިތްވަރުދިނުމުގެ ކޮންމެ އަހަރަކު ވެސް ސަރުކާރުން ދެމުން އަންނަ އެވޯޑެކެވެ.