ދޮންދަރިންނަށް އަނިޔާކުރި ކަމަށް ބުނެ ކުރި ދައުވާ ސާބިތެއް ނުވި

ދޮންދަރިންނަށް އަނިޔާކުރި ކަމަށް ބުނެ ދައުލަތުން ދައުވާކުރި އަންހެނެއްގެ މައްޗަށް ކުށް ސާބިތު ނުވާ ކަމަށް ކްރިމިނަލް ކޯޓުން މިދިޔަ ހަފުތާގައި ހުކުމްކޮށްފި އެވެ.

އުތުރުގެ ރަށެއްގައި ދޮންދަރިންނަށް އަނިޔާކުރި ކަމަށް ބުނާ މައްސަލައެއްގައި އަންހެނެއްގެ މައްޗަށް ދައުލަތުން އުފުލީ ގައިގައި އަތްލުމުގެ ދައުވާ އެވެ. އެ ދައުވާގައިވާ ގޮތުން އެ އަންހެން މީހާ ވަނީ 2019 ވަނަ އަހަރުގެ އެކި ދުވަސް މަތިން އޭނާގެ ދެ ދޮންދަރިންނަށް އަންނައުނު އަޅުވަން ގެންގުޅޭ ކޮނޑުުންނާއި ފައިވާނުން ޖަހައި އަނިޔާކޮށްފަ އެވެ.

އެ އަންހެން މީހާ އަނިޔާކުރި ކަމަށް ދައުލަތުން ބުނަނީ އޭނާގެ އުމުރުން 11 އަހަރާއި އުމުރުން ނުވަ އަހަރުގެ ފިރިހެން ދޮންދަރިންނަށެވެ.

އެ މައްސަލައިގައި ކްރިމިނަލް ކޯޓުން މިދިޔަ ހަފުތާގެ އަންގާރަ ދުވަހު ކުރި ހުކުމުގައި ވަނީ، މީހަކު ކުށެއް ކޮށްފި ކަން އެކަށީގެންވާ ޝައްކެއް ނެތް މިންވަރަށް ޝަރީއަތަށް ސާބިތު ކުރުމަށް ބޭނުންވާ މިންވަރަށް ހެއްކާއި ގަރީނާ ލިބިފައި ނުވާތީ، އޭނާގެ މައްޗަށް ދައުވާ ސާބިތު ނުވާ ކަމަށެވެ.

އެނގިފައިވާ ގޮތުގައި އެ މައްސަލަ ސާބިތު ނުވާ ކަމަށް ކަނޑައެޅީ ޝަރީއަތުގައި ހެކިންގެ ހެކިބަސް ލިބިފައި ނުވާތީ އެވެ.

ދައުލަތުން އެ އަންހެން މީހާގެ މައްޗަށް ކުރި ދައުވާ އަކީ ސާބިތުވެއްޖެ ނަމަ އަަސާސީ މިންގަނޑުން އެއް މަހާއި ހަ ދުވަހުގެ ޖަލު ހުކުމެއް އަންނާނެ ދައުވާ އެކެވެ.

އެއީ ކުޑަކުދިންތަކެއްގެ މަސްލަހަތު ހިމެނޭ މައްސަލައަކަށް ވާތީ ކްރިމިނަލް ކޯޓުން މައްސަލައިގެ ހުކުމް އާންމެއް ނުކުރެ އެވެ.