އިންސްޓަގްރާމް އާއި މެސެންޖާ ޑައުންވެއްޖެ

ދުނިޔޭގެ އެންމެ ގިނަ ބަޔަކު ބޭނުންކުރާ އެއް ސޯޝަލް މީޑީއާ އިންސްޓަގްރާމް އާއި ފޭސްބުކްގެ މެސެންޖާ ގިނަ ބަޔަކަށް ޑައުން ވެއްޖެ އެވެ.

ފޭސްބުކްގެ ބެލުމުގެ ދަށުގައި ހިމެނޭ އިންސްޓަގްރާމް އާއި ފޭސްބުކްގެ މެސެންޖާ އެޕްލިކޭޝަނަކީ ކޮންމެ ދުވަހަކު ވެސް އެތައް މިލިއަން އެކްޓިވް ޔޫސަރުން އުޅޭ ދެ ޕްލެޓްފޯމެވެ.

ނަމަވެސް އިއްޔެއިން ފެށިގެން މި ދެ ޕްލެޓްފޯމަށް ވެސް އަންނަނީ ތަފާތު އެކި މައްސަލަތައް ދިމާވަމުންނެވެ. އޭގެ ތެރޭގައި މެސެންޖާ އެއްވެސް ވަރަކަށް ބޭނުން ނުކުރެވުމާއި އިންސްޓަގްރާމުން ފޮނުވާ މެސެޖުތައް ގެއްލުން ހިމެނެ އެވެ. އަދި އޭގެއިތުރުން އިންސްޓަގްރާމްގެ ހޯމް ޕޭޖް ވެސް ރިފްރެޝް ނުވާ މައްސަލައަކީ ވެސް ބައެއް މީހުންނަށް ދިމާވި މައްސަލަ އެކެވެ.

އިއްޔެއިން ފެށިގެން މި މައްސަލަތައް ދިމާވަމުން އަންނަ އިރު ދުނިޔޭގެ އެކި ސަރަހައްދުތަކުން މި މައްސަލަ ދިމާވަމުން އަންނަ ކަމަށް ރިޕޯޓު ކުރަމުން އެބަ ދެ އެވެ. އޭގެތެރޭގައި އޭޝިއާގެ ބޮޑު ބައެއްގެ އިތުރުން ޔޫރަޕުގެ ސަރަހައްދުތައް ވެސް ހިމެނެ އެވެ. އަދި އެމެރިކާގެ ބައެއް ސަރަހައްދުތަކުގައި ވެސް މި ޕްލެޓްފޯމުތައް ބޭނުން ކުރުމުގައި ދަތިތައް ކުރިމަތިވަމުންދާ ކަމަށް ރިޕޯޓު ކުރެ އެވެ.

މި މައްސަލަތަކާ ގުޅިގެން އާންމުންގެ ގިނަ ބަޔަކު އަންނަނީ ޓްވިޓާގައި ނުރުހުން ފާޅުކޮށް މީމްތައް ޕޯސްޓުކުރަމުންނެވެ.

އިންސްޓަގްރާމް އާއި މެސެންޖާގެ މައްސަލަތައް އަދިވެސް ހައްލުވެފައި ނުވާއިރު އެކަމާ ގުޅޭގޮތުން ފޭސްބުކް އިން ވަކި އެއްޗެއް ބުނެފައެއް ނުވެ އެވެ. އެހެންވީމާ އެ މައްސަލަތައް ހައްލުވާނެ އިރެއްވެސް އަދި ސާފުވާގޮތެއް ނުވެ އެވެ.