ސިޓީ ކައުންސިލްގެ ނައިޓް މާކެޓަށް ވަގުތު ނެތުމުން ކެންސަލްކޮށްފި

ރޯދަމަސް ފެށެން ވަގުތު ކުޑަތަން ވެފައިވާތީ، އިންތިޒާމުތައް ހަމަޖައްސަން ދަތިވެ، މިއަދު ފަށަން އުޅުނު ނައިޓް މާކެޓް މާލޭ ސިޓީ ކައުންސިލުން ކެންސަލްކޮށްފި އެވެ.

ސިޓީ ކައުންސިލްގެ މީޑިއާ އޮފިޝަލް މަރިޔަމް ޝިއުނާ "މިހާރު" ވިދާޅުވީ އެއީ 10 ދުވަހަށް ތާވަލުކުރި ނައިޓް މާކެޓަކަށް ވިޔަސް، މިއަދު ފަށައިގެން ރޯދަމަހުގެ ފުރަތަމަ ދެތިން ދުވަސް ނުލައި އެ މުއްދަތު ހަމަނުކުރެވޭނެތީ އެ މާކެޓް ނުބާއްވަން މިހާރު ނިންމާފައިވާ ކަމަށެވެ.

ނައިޓް މާކެޓް ކެންސަލްކުރި އިރު، އުސްފަސްގަނޑުގައި އެ މާކެޓް ބާއްވަން ޕްލޭނިން މިނިސްޓްރީން ހުއްދަ ހޯދައި، ވިޔަފާރިވެރިންނަށް ސްލޮޓްތައް ވެސް ދޫކުރި އެވެ. އަދި އެ ނައިޓް މާކެޓް އިންތިޒާމުކުރުމަށް ސިޓީ ކައުންސިލުން ކުންފުންޏަކާ ވެސް ހަވާލުކުރި އެވެ.

ނައިޓް މާކެޓް ކެންސަލް ކުރިޔަސް، މާލޭގެ ދެ ސަރަހައްދެއްގައި މިހާރު ހަދަމުން އަންނަ ވަގުތީ ދެ މާރުކޭޓް ރޯދަމަހުގެ ފުރަތަމަ ދުވަހު ހުޅުވާނެ ކަމަށް ސިޓީ ކައުންސިލުން ބުންޏެވެ. އެއީ ރޯދަމަހަށް ހާއްސަ ކޮށްގެން، މޭވާ އާއި ތަރުކާރީ ވިއްކުމަށް ހަދާ މާރުކޭޓުތަކެވެ.

ކަލަންޑަރުގައިވާ ގޮތުން މި އަހަރުގެ ރޯދަމަހުގެ ފުރަތަމަ ދުވަހަކީ އަންނަ ހޮނިހިރެވެ.

އާ އަހަރާ ދިމާކޮށް، ސިޓީ ކައުންސިލުން ވަނީ މިދިޔަ އަހަރުގެ ޑިސެމްބަރުގައި ވެސް މާލޭގައި ނައިޓް މާކެޓެއް ބާއްވައިފަ އެވެ.