ސްވިމިން ޓްރެކާއި ފޭސް ދެއަކުން 755 ކިލޯގެ ކުނި ބީއެމްއެލުން ނަގައިފި

ބީއެމްއެލްގެ މުވައްޒަފުން މާލޭގެ ސުވިމިން ޓްރެކާއި ހުޅުމާލޭގެ ދެވަނަ ފިޔަަހީގެ ބީޗް ސަރަހައްދު މިއަދު ސާފުކޮށްފި އެވެ.

އަންނަ އާދިއްތަ ދުވަހު ފާހަގަކުރާ "އިންޓަނޭޝަނަލް ޑޭ އޮފް ހެޕިނަސް" އާ ގުޅުވައިގެން ކުރިޔަށް ގެންދިޔަ ހަރަކާތުގައި ސްވިމިން އެސޯސިއޭޝަނާއި ޑައިވް ކްލަބް މޯލްޑިވްސް އާއި ޑައިވް ޑެސްކް އަދި ޕާލޭ އިން ވެސް ބައިވެރިވި އެވެ.

ބީއެމްއެލްގެ މެނޭޖަރު ޕަބްލިކް ރިލޭޝަންސް މުހައްމަދު ސައީދު ވިދާޅުވީ މީގެ ތިން އަހަރު ކުރިން ވެސް ސްވިމިންގް ޓްރެކް ސާފްކުރި ކަމަށާއި އެ ފަހަރާ އަޅާބަލާއިރު މިހާރު އެ ސަރަހައްދު ސާފުކަން ފާހަގަކުރެވުނު ކަމަށެވެ.

"އަދިވެސް ކޮންމެވެސް ވަރަކަށް ދަޅާއި ޕްލާސްޓިކް ފުޅި މޫދަށް އަޅާފައި ހުންނަ ތަން މި ފެންނަނީ. އަޅުގަނޑުމެންގެ އެދުމަކީ އެންމެހާ ބޭފުޅުން ވެސް މި ތާނގައި ހުންނަ ޑަސްބިން ބޭނުން ކުރެއްވުން. އަދި މޫދަށް ކުނި ނޭޅުން،" އޭނާ ވިދާޅުވި އެވެ.

ބީއެމްއެލްގެ މުވައްޒަފުން މިއަދު ވަނީ ހުޅުމާލޭގެ ދެވަނަ ފިޔަވަހީގެ ބީޗް ސަރަހައްދު ވެސް ސާފުކޮށް، އެ ތަނުން 500 ކިލޯގެ ކުނި ނަގައިފަ އެވެ.

މި ދެ ސަރަހައްދުން 755 ކިލޯގެ ކުނި ނެގި އިރު އޭގެ ތެރެއިން 84 ކިލޯގެ ޕްލާސްޓިކް ވަނީ ރީސައިކަލް ކުރުމަށް ފާލޭއާ ހަވާލުކޮށްފަ އެވެ.

މި ހަރަކާތުގައި ބީއެމްއެލްގެ 80 އަށް ވުރެ ގިނަ މުވައްޒަފުން ބައިވެރިި އެވެ.