މޭކަޕް ކޮށްލަން ބޭނުން ކުރެވޭނެ އާ އީޖާދެއް

ޔޫޓިއުބްގައި ބިއުޓީ ބްލޮގަރުން ދާދި ފަހުން އިންތިހާއަށް އިތުރުވެއްޖެކަން ފާހަގަވެ އެވެ. މި ފުރުސަތު ބޭނުންކޮށްގެން ކޮސްމެޓިކްސް އުފައްދާ ކުންފުނިތަކުން ތަފާތު މޭކަޕް ޕްރޮޑަކްޓްތައް އެބަ ތައާރަފުކުރެ އެވެ.

ޔޫޓިއުބް ބްލޮގަރުން އާއްމުކޮށް ބޭނުންކުރާ އެއް އުފެއްދުމެއް ކަމަށްވާ ބިއުޓީ ބްލެންޑާ އަކީ ވަރަށް ގިނަ ބައެއްގެ ތެރޭގައި މަގުބޫލުވި، އުފެއްދުންތެރި އަދި މޭކަޕް ޖައްސާލަން ފަސޭހަ އީޖާދެކެވެ. އަދި މި އުފެއްދުމާ ވާދަކުރާނެ އެހެން ޕްރޮޑަކްޓެއް ނެރެވޭތޯ ގިނަ ބްރޭންޑުތަކުން މަސައްކަތް ކޮށްފި އެވެ. އެގޮތުން ހޮންގް ކޮންގްގެ ކޮސްމެޓިކް ބްރޭންޑެއް ކަމަށްވާ މޮލީ ކޮސްމެޓިކްސް އިން ވަނީ ސިލިކޮން ސްޕޮންޖެއް ތައާރަފުކޮށްފަ އެވެ. އެއަށް ދިން ނަމަކީ 'ސިލިސްޕޮންޖެ' އެވެ.

ބިއުޓީ ބްލެންޑާއެއް ގޮތަށް ބޭނުން ކޮށްލެވޭ މި ކުޑަ ސްޕޮންޖުން މޭކަޕް އިސްރާފެއް ނުވާނެ ކަމަށް އެ އުފެއްދި ފަރާތްތަކުން ބުނެ އެވެ. އާދަވެގެން ބިއުޓީ ބްލެންޑާއަކުން ފައުންޑޭޝަން އަދި ހައިލައިޓާ ފަދަ މޭކަޕް ޖައްސާއިރު އޭގެ ގިނަ ބައި ދަނީ ސްޕޮންޖުގެ ތެރެއަށެވެ.

މިއީ އިސްރާފެއްކަމަށް މޭކަޕް ކުރާ ގިނަ މީހުން ވެސް ގަބޫލުކުރެ އެވެ. އެއާ ހިލާފަށް، ސިލިސްޕޮންޖް ތައްޔާރު ކޮށްފައިވަނީ ސިލިކޮން އިން، ނޮން ޕޯރަސް ކޮށެވެ. ވީމާ މޭކަޕް ޖައްސާއިރު އޮމާންކޮށް ޖައްސާލެވި އަދި ދޮވެލައި ސާފުކޮށްލަން ވެސް ފަސޭހަ އެވެ. އަދި މި ސްޕޮންޖް ގިނަ ދުވަސްތަކެއް ވަންދެން ބޭނުން ވެސް ކުރެވެ އެވެ.

މި ޚާއްސަ ސްޕޮންޖްގެ އަގަކީ ނުވަ ޑޮލަރެވެ. އެކަމަކު އޭގެ ފުރަތަމަ ބައި ނެރުނު ތަނުން ވަނީ ވިކި ހުސްވެފަ އެވެ. ގިނަ ބަޔަކު އަނެއްކާ ޕްރީއޯޑާ ވެސް މިހާރު ދީފި އެވެ.