އުސޫލުތަކާ ހިލާފުވުމުން ޖޫހީގެ 5ޖީ ނެޓްވޯކްގެ މައްސަލަ ކޯޓުން ބޭރުކޮށްލައިފި

އިންޓަނެޓްގެ އާ ޖީލު 5ޖީ އަކީ އިންސާނުންނަށާއި ހުރިހާ ދިރޭ ތަކެއްޗަށް އޮތް ގެއްލުމެއް ކަމަށް ބުނެ އެ ނެޓްވޯކް އިންޑިއާގައި ގާއިމުކުރަން ކުރާ މަސައްކަތްތަކާ ދެކޮޅަށް ބޮލީވުޑްގެ ބަތަލާ ޖޫހީ ޗާވްލާ ނިއު ދިއްލީ ހައި ކޯޓަށް ހުށަހެޅި މައްސަލަ ހުކުރު ދުވަހު ބޭރުކޮށްލައިފި އެވެ.

މީޑިއާތަކުން ބުނީ 53 އަހަރުގެ ބަތަލާ މިދިޔަ އަންގާރަ ދުވަހު ހުށަހެޅި މައްސަލަ ބޭރުކުރީ ކޯޓަށް ހުށަހަޅާ މައްސަލަތަކާ ގުޅޭ ގޮތުން އަމަލުކުރަން ޖެހޭ ގޮތްތަކާ ވެސް ޖޫހީ ހިލާފުވުމުން ކަމަށެވެ. މައްސަލަ ކޯޓަށް ވެއްދުމަށް ފަހު ޖޫހީ ވަނީ ސޯޝަލް މީޑިއާގައި އެ މައްސަލައާ ބެހޭ ޕޮތުން ވާހަކަ ދައްކައި ވީޑިއޯއެއް ވެސް އާންމުކޮށްފަ އެވެ.

އެހެންވެ ހުކުރު ދުވަހު ކޯޓުން މައްސަލަ ބޭރުކުރީ އުސޫލުތަކާ ހިލާފުވުމުން 20 ލައްކަ ރުޕީސް އިން ޖޫރިމަނާ ވެސް ކުރުމަށް ފަހު އެވެ.

މައްސަލަ ކޯޓުން ބޭރުކޮށްލި އިރު، އޭގެ ފުރަތަމަ އަޑު އެހުން ބުދަ ދުވަހު ވާޗުއަލްކޮށް ބޭއްވި އެވެ. އެ އަޑު އެހުމުގެ ވާހަކަ މީޑިއާތަކުގައި އެންމެ ބޮޑަށް ދެކެވުނީ އަޑު އެހުން ފަށަން ތައްޔާރުވިތަނާ އޭގައި ބައިވެރި މީހުންގެ ތެރެއިން މީހެއްގެ ފަރާތުން ޖޫހީގެ ފިލްމެއްގެ ލަވައެއް އަޑު އިވުމާ ގުޅިގެންނެވެ. އެ ލަވަ އަކީ ޖޫހީ އާއި ޖެކީ ޝްރޮފްގެ 1993 ގެ ފިލްމު "އާއިނާ" ގެ "މޭރީ ބަންނޯ ކީ އާއޭގީ ބާރާތު" އެވެ.

ޖޫހީގެ ފަރާތުން 5ޖީ ނެޓްވޯކް މައްސަލާގައި ވަކާލާތުކުރެއްވީ ދީކަޕް ކޯސްލާ ކިޔާ ވަކީލެކެވެ.

ޖޫހީ ބުނެފައިވާ ގޮތުގައި 5ޖީ ނެޓްވޯކްގެ މައްސަލަ ކޯޓަށް ހުށަހެޅީ އިންސާނުންނާއި ޖަނަވާރުންނާއި ޖުމްލަކޮށް މުޅި ވެށީގައި އުޅޭ ހުރިހާ ދިރުންތަކަށް ގެއްލުންދޭ ވަރުގަދަ ރޭޑިއޭޝަންތަކެއް އެކުލެވޭ ވިއުގައެއް ކަމަށް ގަބޫލުކުރެވޭތީ އެވެ. އޭނާ ބުނެފައި ވަނީ 5ޖީ ނެޓްވޯކްގެ ރޭޑިއޭޝަނަކީ މިހާރު އެފަދަ ވަސީލަތްތަކުން ބޭރުކުރާ ރޭޑިއޭޝަނަށް ވުރެ 100 ގުނަ ގެއްލުން ބޮޑު އެއްޗެއް ކަމަށެވެ.