މިސްކިތުގައި ބަރަހަނާވި ބިދޭސީ މީހާ އަންހެނުންތަކަކަށް ފޮށިގެން އަނެއްކާވެސް ހައްޔަރުކޮށްފި

މީގެ ދެ ދުވަސް ކުރިން އިސްލާމީ މަރުކަޒަށް ވަދެ ބަރަހަނާވި ބަންގްލަދޭޝް މީހާ، ޑޮލަރު އޭޓީއެމް ކައިރީ ހުރެ އެ ތަނަށް ދިޔަ އަންހެނުންތަކަކަށް ފޮށުނު މައްސަލައެއްގައި އަނެއްކާވެސް ހައްޔަރުކޮށްފި އެވެ.

ފުލުހުން ބުނީ އުމުރުން 50 އަހަރުގެ އެ ފިރިހެން މީހާ ހައްޔަރު ކުރީ މިއަދު މެންދުރު 1 ޖަހާކަންހާ އިރު ކަމަށެވެ. އަދި އެ މައްސަލަ ފުލުހުން ދަނީ ތަހުގީގު ކުރަމުންނެވެ.

އޭނާ އަކީ ނަފްސާނީ މައްސަލަތަކެއް ހުރި މީހެއް ކަމަށް ފުލުހުން ވަނީ ބުނެފަ އެވެ.

މިދިޔަ ބުރާސްފަތި ދުވަހު އޭނާ ހައްޔަރު ކުރީ، މިސްކިތަށް ވަނުމަށްފަހު އަޑުގަދަކޮށް، ލައިގެން ހުރި އެއްޗެހި ބާލައި ބަރަހަނާވުމުންނެވެ. އަދި އޭނާ ރަށަށް ފޮނުވައިދޭން އެދި ހަޅޭއްލަވަން ފެށި އެވެ. ނަމަވެސް އޭގެ ފަހުން އޭނާ ދޫކޮށްލައި، ބަންގްލަދޭޝް އަށް އަލުން ފޮނުވަން އޭނާގެ ސްޕޮންސަރުންނާ އެކު މަސައްކަތްކުރަމުން އަންނަ ކަމަށް ފުލުހުން ބުނެފައިވެ އެވެ.