ބިލު ފާސްކުރިޔަސް އިންތިހާބު ލަސްވުމުގެ ފުރުސަރު އެބަ އޮތް: އަލީ ނިޔާޒް

ކޮވީޑް-19ގެ ބަލިމަޑުކަމާ އެކު ލޯކަލް ކައުންސިން އިންތިހާބު ލަސްކުރަން މިދިޔަ އަހަރު ފާސްކުރި ގާނޫނު އިސްލާހުކުރިޔަސް، އެ އިންތިހާބު އަނެއްކާވެސް ފަސްވުމުގެ ފުރުސަތު އެބަ އޮތް ކަމަށް ހުޅުމާލެ ދާއިރާގެ އެމްޑީޕީ މެމްބަރު އަލީ ނިޔާޒް (ނިޔާ) މިއަދު ވިދާޅުވެއްޖެ އެވެ.

މިދިޔަ އަހަރު އިންތިހާބު ބޭއްވޭ ގޮތް ނުވުމުން ސަރުކާރުން ހުށަހަޅައި ފާސްކުރި ސަންސެޓް ގާނޫނު، ލޯކަލް ކައުންސިލްތަކުގެ އިންތިހާބުގެ ހާއްސަ ގާނޫނު، އިސްލާހުކުރަން ސަރުކާރުން ފޮނުވި ބިލް މަޖިލީހުގެ ޖަލްސާއަށް ހުށަހެޅުއްވީ ނިޔާ އެވެ. އަންނަ މަހު ހަތަރަކާ ހަމައަށް ޗުއްޓީގައި އޮތް މަޖިލީހުގެ ދައުރުން ބޭރުގައި ބާއްވާ ދެވަނަ ޖަލްސާގައި ބިލު ހުށަހަޅުއްވަމުން އޭނާ ވިދާޅުވީ އިންތިހާބާ ބެހޭ ހާއްސަ ގާނޫނަށްް އިސްލާހެއް ހުށަހެޅުއްވީ އިންތިހާބަށް އޮތް ހުރަހަކަށް ނުވުމަށް ކަމަށެވެ.

އެކަމަކު ކޮވިޑާ ގުޅިގެން އެންމެން އަމަލްކުރަން ހަދާ ގައިޑްލައިންތައް ހެދުމުގެ ބާރު އަދިވެސް އޮންނާނީ އެޗުޕީއޭގެ ޑިރެކްޓަ ޖެނެރަލްގެ އަތްޕުޅުގައި ކަމަށް ވާތީ، އެފަދަ ގައިޑްލައިނެއްގެ ސަބަބުން އިންތިހާބު ފަސްވުމުގެ ފުރުސަތު އޮންނާނެ ކަމަށް، ނިޔާގެ ވާހަކަތަކުން އެނގެ އެވެ.

އެކަމަކު އޭނާ ވިދާޅުވީ ލޯކަލް ކައުންސިިލްތަކުގެ ހާއްސަ ގާނޫނު އެހެން އޮތް ނަމަވެސް އިންތިހާބާ ބެހޭ އިދާރީ މަަސަައްކަތްތައް ކުރެވޭނެ ކަމަށް ގަބޫލުކުރައްވާ ކަމަށެވެ.

"އެއީ އެބޭފުޅުން މާނަކުރައްވާ ގޮތް، އަދި އެބޭފުޅުންންނަށް ގާނޫނީ ލަފާ ވެސް ލިބޭ ގޮތް. އަޅުގަނޑުމެން ދެކި ތިބީ އެގޮތަށް އޮތް ނަމަވެސް އިދާރީ ގޮތުން ކުރަން ޖެހޭ މަސައްކަތްތަކާއި އިންތިހާބަށް ތައްޔާރުވުމުގެ ގޮތުން ކުރެވޭ މަސައްކަތްތައް އިލެކްޝަންސް ކޮމިޝަނުގެ ތެރޭގައި ކުރެވެން ވާނެ ކަމަށް،" ނިޔާ ވިދާޅުވި އެެވެ.

އޭނާ ވިދާޅުވި ގޮތުގައި ހާއްސަ ގާނޫނު އިސްލާހުކުރަން ސަރުކާރުން ހުށަހެޅި ބިލުގައި ހެލްތު ޕްރޮޓެކްޝަން އެޖެންސީ (އެޗްޕީއޭ)ގެ ޑިރެކްޓަ ޖެނެރަލަށް ގިނަ އިޚުތިޔާރުތަކެއް އެބަ އޮތެވެ. ބިލާ ހަވާލާދެއްވައި އޭނާ ވިދާޅުވީ އެގޮތަށް އިހުތިޔާރު އޮތީ ކޮވިޑް-19 ފެތުރޭތީ އިއުލާނުކޮށްފައިވާ ކުއްލި ނުރައްކަލުގެ ހާލަތު އޮތުމުންނެވެ.

އިންތިހާބު ބޭއްވުމުގައި ވެސް އަމަލުކުރަން ޖެހޭނީ އެޗްޕީއޭގެ ގައިޑްލައިނާ އެއްގޮތަށެވެ.

"އަޅުގަނޑުމެން މި ތަޅު މިއަދު ނައްޓާލިޔަސް އަދިވެސް މި އިންތިހާބު ބޭއްވުމުގައި ޑިރެކްޓަ ޖެނެރަލް އޮފް ޕަބްލިކް ހެލްތު ދެއްްވާ އިރުޝާދަކާއި ދެއްވާ ގައިޑްލައިނެއްގެ ސަބަބުން، އަދިވެސް މި އިންތިހާބު ލަސްވުމުގެ ފުރުސަތު އޮތްކަން [ބިލުން] އެބަ އެނގޭ،" ނިޔާ ވިދާޅުވި އެވެެ.

އޭނާ ވިދާޅުވި ގޮތުގައި އެޗްޕީއޭގެ ގައިޑްލައިންގެ އިތުރުން އިންތިހާބާ ބެހޭ ގޮތުން އެކި ފަރާތްތަކުން ކޯޓަށް ހުށަހަޅާފައިވާ މައްސަލަތަކެއް ވެސް އެބަ ހުއްޓެވެ. އެ މައްސަލަތައް ވެސް އަވަހަށް ނިންމައި އިންތިހާބު ބޭއްވުމަށް ދައުލަތުގެ ހުރިހާ ފަރާތަކުން ވެސް އެއްބާރުލުން ދޭން އޭނާ ގޮވާލެއްވި އެވެ.

ލޯކަލް ކައުންސިލްތަކުގެ އިންތިހާބުގެ ހާއްސަ ގާނޫނު ފާސްކުރީ މިދިޔަ އަހަރު އިންތިހާބު ނުބޭއްވޭނެކަން ޔަގީންވުމުން އޭގެ ސަބަބުން ކުރިމަަތިވާ ގާނޫނީ ހުސްކަމަށް ހައްލެއް ހޯދައިދޭށެވެ. އެފަދަ ގާނޫނެއް ހަދަން، ސުޕްރީމް ކޯޓުން ވެސް އޭރު ލަފާދިނެވެ.

ކުރީގެ ކައުންސިލަރުން މަގާމުތަކުގައި ދެމި ތިބީ އެ ގާނޫނުގެ ދަށުންނެވެ.