ލޮކްޑައުންއާ އެކު އެމްއެމްޕީއާރުސީގެ ތަހުގީގަށް ހުރަސްތަކެއް

ކޮވިޑް-19 އާ ގުޅިގެން އިއުލާންކޮށްފައިވާ ލޮކްޑައުންއާ އެކު އެމްއެމްޕީއާރުސީގެ 3.3 ބިލިއަން ރުފިޔާގެ ޚިޔާނާތުގެ ތަހުގީގަށް ހުރަސްތަކެއް އެޅިފައިވާ ކަމަށް، އެންޓި ކޮރަޕްޝަން ކޮމިޝަން (އޭސީސީ) އިން ރޭ ބުނެފި އެވެ.

ރައްޔިތުންގެ މަޖިލީހުގެ މިނިވަން މުއައްސަސާތަކުގެ ކޮމެޓީގައި އެމްއެމްޕީއާރުސީގެ ތަހުގީގާ ގުޅޭގޮތުން އޭސީސީގެ މެމްބަރު އިބްރާހިމް ޝަކީލް ވިދާޅުވީ މީހުން ހާޒިރުކޮށް ބަޔާން ނެގުމަށް ބޮޑެތި ދަތިތަކެއް ކުރިމަތިވެފައިވާ ކަމަށެވެ. އޮންލައިންކޮށް ބަޔާން ނަގަން ބަލާއިރު ގާނޫނީ މައްސަލަތަކެއް ކުރިމަތިވާތީ އެކަން ނުކުރެވި ވާ ކަމަށް ވެސް ޝަކީލް ވިދާޅުވި އެވެ.

"ބަޔާން ނެގުމުގެ ކަންކަން ރިމޯޓްކޮށް ކުރިއަށް ގެންދެވިދާނެތޯ؟ އަދި ކުރިއަށް ގެންގޮސްފިއްޔާ އެއީ ހެކީގެ ގޮތުގައި ނުވަތަ ސްޓޭޓްމަންޓެއްގެ ގޮތުގައި ކޯޓުން ބަލައި ގަތުމުގައި އެއްވެސް އިޝޫއެއް އުޅޭ ކަމަށް ވެއްޖެއްޔާ އެއީ ކުރީބައިގައި އަޅުގަނޑުމެން އެޑްރެސް ކުރަން ޖެހޭނެ ކަމެއް،" ޝަކީލް ވިދާޅުވި އެވެ.

އެކަމަށް ހައްލެއް ހޯދުމުގެ ގޮތުން ޕްރޮސިކިއުޓާ ޖެނެރަލް އާއި ފުލުހުންނާ އެކު މަޝްވަރާ ކުރަމުން އަންނަ ކަމަށް ވެސް އޭނާ ވިދާޅުވި އެވެ.

އެމްއެމްޕީއާރުސީގެ ތަހުގީގުގައި އޭސީސީގެ އިތުރުން ފުލުހުންނާއި އެސެޓް ރިކަވަރީ ކޮމިޝަނާއި ޕްރޮސިކިއުޓާ ޖެނެރަލް އޮފީސް ގުޅިގެން މަސައްކަތް ކުރާއިރު މިހާރު ގިނަ މަސައްކަތްތައް ކުރަމުން އަންނަނީ ގޭގައި ތިބެގެން ކަމަށް ވެސް ޝަކީލް ވިދާޅުވި އެވެ.

ކުރީގެ ނައިބު ރައީސް އަހްމަދު އަދީބު އިސްވެ މި ބޮޑު ޖަރީމާ ހިންގި އިރު، ހިޔާނާތުގެ ފައިސާގެ ތެރެއިން 3.3 ބިލިއަނަށް ވުރެ ގިނަ ރުފިޔާ ވަގަށް ނަގާފައިވާ ކަމަށް ކަމަށް ކަމާ ބެހޭ އިދާރާތަކުން ވަނީ ހާމަކޮށްފަ އެވެ. އަދި ހިޔާނާތުގެ މަންފާ ލިބުނު ކަމަށް ތުހުމަތުކުރެވޭ މީހުންގެ އަދަދު 267 އަށް އަރަ އެވެ. އެ މައްސަލަތައް އަންނަނީ ތަހުގީގު ކުރަމުންނެވެ.

ރިސޯޓް ހަދަން ދޫކުރި ރަށްރަށާއި ފަޅުތަކަށް ދައުލަތަށް ދެއްކި ފައިސާ، އެމްއެމްޕީއާރުސީގެ އެކައުންޓަށް ވެއްދުމުގެ ބަދަލުގައި، ޖަމާކޮށްފައި ވަނީ އަދީބުގެ ގާތް އެކުވެރިއެއްގެ ކުންފުނި ކަމަށް ވާ އެސްއޯއެފްގެ އެކައުންޓްތަކަށެވެ. އެއަށް ފަހު ރިޝްވަތުގެ ގޮތުގަޔާއި އެކިގޮތްތަކަށް އެ ފައިސާ ވަނީ ގިނަ ބަޔަކަށް ބަހައިފަ އެވެ.

އެމްއެމްޕީއާރުސީގެ ހިޔާނާތުން ލިބުނު ފައިސާ، ލޯންޑާ ކުރިކަން ސާބިތުވެ ކުރީގެ ރައީސް އަބްދުﷲ ޔާމީންގެ މައްޗަށް ފަސް އަހަރުގެ ޖަލު ހުކުމެއް ވަނީ އިއްވައިފަ އެވެ. އަދި ކުރީގެ ނައިބު ރައީސް އަދީބާއި އެމްއެމްޕީއާރުސީގެ ކުރީގެ މެނޭޖިން ޑިރެކްޓާ އަބްދުﷲ ޒިޔަތުގެ މައްޗަށް ދައުވާކޮށް، ޝަރީއަތް ވަނީ ފަށައިފަ އެވެ.

ތަފާތު ތިން މައްސަލައެއްގައި އަދީބު 33 އަހަރަށް ޖަލަށްލާން ކުރިން ހުކުމް ކުރިޔަސް، ފަހުން މަތީ ކޯޓުތަކުން ވަނީ އެ ހުކުމްތައް ބާތިލްކޮށްފަ އެވެ. ރައީސް ޔާމީން ޖަލުގައި ހުންނެވިއިރު އަދީބާއި ޒިޔަތު ހުންނެވީ ގޭ ބަންދުގަ އެވެ.