ޓީއެމްއޭ އަށް ޓާމިނަލުން ލިބޭ ފައިދާ ރިޕޯޓަކު ނެތް: އޮޑިޓާ ޖެނެރަލް

ސީޕްލޭން ޓާމިނަލުން ލިބޭ ފައިދާ، ޓީއެމްއޭގެ އިންޓާނަލް އޮޑިޓުން ރަނގަޅަށް ފެންނަން ނެތް ކަމަށާއި ހަަގީގީ ފައިދާ އިނގޭނީ ޓީއެމްއޭއިން ރިސޯޓްތަކަށް ދަތުރުކުރާ ފަސިންޖަރުންގެ އަތުން ނަގާ އަގުތައް ވެސް އެނގިގެން ކަމަށް އޮޑިޓާ ޖެނެރަލް ހަސަން ޒިޔަތު އިއްޔެ ވިދާޅުވެއްޖެ އެވެ.

ރައްޔިތުންގެ މަޖިލީހުގެ މާލިއްޔަތު ކޮމިޓީގެ އިއްޔެ ބައްދަލުވުމުގައި މެމްބަރުން ކުރެއްވި ސުވާލުތަކަށް ޖަވާބު ދެއްވަމުން ހަސަން ވިދާޅުވީ ޓީއެމްއޭއިން ދީފައިވާ އެ ކުންފުނީގެ އިންޓާނަލް އޮޑިޓުން ފެންނަނީ ހަމައެކަނި ލައުންޖުން އެކަނި ލިބޭ އާމްދަނީ ކަމަށެވެ. އޭނާ ވިދާޅުވީ ލައުންޖަށް ލިބެނީ 2.8 މިލިޔަން ޑޮލަރު ކަމަށް ބުނެފައިވާ އިރު، އެއީ ޓާމިނަލުން ލިބޭ މުޅި އާމްދަނީ ނޫން ކަމަށެވެ.

"ރިސޯޓްގެ ޕެސެންޖާއެއް އުފުލައިދޭ އަގަކީ ކޮބައިތޯ ހަގީގަތުގައި ބެލީމާ އެނގޭނީ [ޖުމަލް ލިބޭ އާމްދަނީ]،" އޭނާ ވިދާޅުވި އެވެ.

އޭނާ ވިދާޅުވީ ޓީއެމްއޭއިން ޓޫރިސްޓުން އުފުލައިދޭ ރޭޓްތައް ބަލަން ބައެއް ރިސޯޓްތަކާ އެ ކުންފުންޏާ ދެމެދު ވެފައިވާ އެއްބަސްވުންތައް ހޯދަން އޮޑިޓް އޮފީހުން އެދުނު ކަމަށާއި އެހެން ނަމަވެސް އެ މައުލޫމާތު ނުދޭން ޓީއެމްއޭއިން ރިސޯޓްތަކަށް އަންގާފައިވާ ކަމަށެވެ.

"އަޅުގަނޑުމެންގެ އޮފީހާ މައުލޫމާތު ހިއްސާނުކުރަން [ރިސޯޓްތަކަށް] އެންގި ވާހަކަ އަދި އަޅުގަނޑުމެންނަށް އެންގީ،" ހަސަން ވިދާޅުވި އެވެ.

އޮޑިޓާ ޖެނެރަލް އިއްޔެ މިހެން ވިދާޅުވި އިރު އޭގެ ކުރީ ދުވަހު މާލިއްޔަތު ކޮމިޓީން ބޭއްވި ބައްދަލުވުމުގައި ޓީއެމްއޭއިން ބުނީ އޮޑިޓަށް މައުލޫމާތު ދިނަ ނުދޭން ރިސޯޓްތަކަށް އެއްވެސް ނުފޫޒެެއް ފޯރުވާފައި ނުވާނެ ކަމަށެވެ.